Iburasirazuba: Abanyamuryango ba FPR-Inkotanyi biyemeje gukurikirana ibibazo biri muri serivisi z’ubutaka

Yanditswe na Hakizimana Jean Paul
Kuya 9 Gashyantare 2020 saa 09:34
Yasuwe :
0 0

Abanyamuryango ba FPR-Inkotanyi mu ntara y’Iburasirazuba biyemeje gukurikirana ibibazo bigaragara mu mitangire ya serivisi z’ubutaka, abagaragaweho amakosa bagahanwa abandi bakagirwa inama.

Ibi babyiyemeje kuri uyu wa Gatandatu tariki ya 08 Gashyantare mu nama yaguye y’abanyamuryango ba FPR-Inkotanyi yabereye mu Karere ka Kayonza.

Muri iyi nama, abanyamuryango bagaragarijwe bimwe mu bibazo bibangamiye imibereho y’abaturage birimo serivisi zo mu buzima, serivisi mbi zigaragara mu gutanga ibyangombwa by’ubutaka n’ibindi.

Umuyobozi wa FPR-Inkotanyi mu ntara y’Iburasirazuba Mufulukye Fred yavuze ko ikibazo cy’imitangire mibi ya serivisi kigaragara mu butaka gikwiriye gukurikiranwa ababigiramo uruhare bakagirwa inama.

Yakomeje agira ati “ Hari hamwe tugenda tubona ko umuturage adahabwa serivisi uko bikwiye rimwe bikajyana n’igihe yaranditse agasubirayo ntibikunde. Twiyemeje nk’abayobozi b’inzego z’umuryango ko dukwiriye gukurikirana by’umwihariko imitangire ya serivisi y’ubutaka kugira ngo tumenye ikibazo kiri hehe.”

Mufulukye yavuze ko bagiye gushyiraho uburyo bwihariye kuko akenshi izo serivisi zitangwa n’abakozi b’abanyamuryango ba FPR Inkotanyi.

Ati “ Dufite inzego z’umuryango zishinzwe imyitwarire na ngenzuzi nazo zikwiriye kuba zibikurikirana zikamenya ibyo bibazo hanyuma abanyamuryango bagaragayeho imitangire mibi y’iyo serivisi bakaba bagirwa inama bakagaragarizwa ko ibyo bakora bitajyanye n’amahame y’umuryango wa FPR-Inkotanyi.”

Mu turere twavuzweho imitangire mibi ya serivisi z’ubutaka harimo Akarere ka Kayonza.

Umukozi ushinzwe serivisi z’ubutaka muri ako karere, Gakunzi Emmanuel yabwiye IGIHE ko zimwe mu mpamvu zatumaga iyi serivisi itagenda neza harimo kuba nta bakozi bashinzwe serivisi y’ubutaka babaga ku murenge.

Ati “ Ubu turi kubikemura kuko mu mirenge 12 igize Akarere kacu ibiri niyo isigaye idafite abakozi bashinzwe serivisi z’ubutaka . Twongereye imbaraga ku kwegera abaturage ku buryo babona ubufasha byoroshye, ikindi ubu buri cyumweru abakozi bo ku murenge baza gufata ibyangombwa byarangiye ari nako batuzanira ibibazo bibakomereye tukabyikurikiranira.”

Muri iyi nama y’abanyamuryango ba FPR-Inkotanyi hafatiwemo indi myanzuro irimo; Gushyiraho uburyo buhamye bwo gukurikirana umusaruro w’abaturage kugira ngo utononekara, kugira ibigo mbonezamikurire bitatu kuri buri mudugudu.

Hari kandi gukomeza kubungabunga isuku mu mashuri, gukosora no kwandika abanyamuryango mu ikoranabuhanga bitarenze Gashyantare, guhuza no kunga abakozi bafitanye amakimbirane kandi ari abanyamuryango mu rwego rwo kwihutisha imitangire ya serivisi bakoreramo, korohereza ababyeyi bo mu cyiciro cya mbere n’icya kabiri kuri gahunda yo kugaburira abana babo ku mashuri hakanajyaho komite zihariye zikurikirana imirire y’abana ku ishuri.

Abanyamuryango banafashe umwanzuro uvuga ko abakora muri serivisi z’ubutaka bakwiye kujya bagaragaza mu gitabo abantu baje gusaba serivisi muri iki kigo nuko bazihawe mu rwego rwo gukemura imitangire mibi ya serivisi yarangwagamo.

Abahagarariye FPR-Inkotanyi mu turere bitabiriye iyi nama
Abanyamuryango biyemeje gukemura ikibazo cya serivisi mbi kigaragara mu serivisi z'ubutaka
Abanyamuryango biyemeje no gutangiza ubukangurambaga bwo kurengera umwana
Umuyobozi wa FPR-Inkotanyi mu ntara y'Iburasirazuba, Mufulukye Fred yavuze ko abakora muri serivisi z'ubutaka bagiye kwegerwa abakora nabi baganirizwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .