00:00:00 IGIHE NETWORK KN KINYARWANDA EN ENGLISH FR FRANCAIS

IBUKA yasabye ko abagize uruhare muri Jenoside bakorwaho ubushakashatsi bwimbitse

Yanditswe na Prudence Kwizera
Kuya 22 April 2022 saa 02:00
Yasuwe :

Perezida wa IBUKA, Nkuranga Egide, yavuze ko hakwiye gukorwa ubushakashatsi ku miterere y’abantu batinyutse gukora ubwicanyi ndengakamere muri Jenoside yakorewe Abatutsi mu Rwanda mu 1994 kuko ibyo bakoze bidakwiye ku kiremwamuntu.

Yabivuze ku wa 21 Mata 2022 ubwo yifatanyaga n’abaturage bo mu Murenge wa Tumba mu Karere ka Huye kwibuka ku nshuro ya 28 Jenoside yakorewe Abatutsi.

Icyo gikorwa cyitabiriwe n’abayobozi barimo Minisitiri w’Ubutegetsi bw’Igihugu, Gatabazi Jean Marie Vianney; Minisitiri w’Ubuzima, Dr Ngamije Daniel, Amb Polisi Denis n’abandi.

Ubuhamya bwahatangiwe bwagaragaje uburyo muri Jenoside, Abatutsi bagiye bicwa urupfu rubi bikozwe n’abari abaturanyi babo, inshuti zabo ndetse bigera n’aho umugabo yica umugore we bashakanye cyangwa umubyeyi akica abana be abaziza ko ari Abatutsi.

Nkuranga yavuze ko iyi myitwarire yaranze abakoze Jenoside idakwiye, asaba ko abayigizemo uruhare bazakorwaho ubushakashatsi bwihariye.

Ati “Kumva ko umuntu ashobora kureba umugore we babyaranye abana akamwica, agafata abana akabacamo ibice bibiri bamwe akabita Abahutu abandi akabita Abatutsi abo yise Abatutsi akabica. Aha rero ndagira ngo ntange undi mukoro, hari abantu b’abahanga mumaze kwandika ibitabo kuri Jenoside hari abandika ubuhamya, ariko ndagira ngo nibarize abahanga mu mibanire ya muntu n’abahanga mu mitekerereze kuki badakora ubushakashatsi bwimbitse kugira ngo bandike ibitabo n’inkuru twige ku bantu, umuntu wa mbere ya Jenoside no mu gihe cya Jenoside.”

“Umuntu twita umuntu ushobora kurenga inyamaswa ku buryo ashobora gukora ibintu byabaye mu Rwanda.”

Yakomeje avuga ko iyo baganiriye n’abanyamahanga batandukanye bababwira ko ibyabereye mu Rwanda batabasha kubyiyumvisha no kubisobanukirwa.

Ati “Ba nyakubahwa ba Minisitiri muri aha ni ukuri iki kintu muzakiganirize abantu, ngira ngo amafaranga siyo azabura ariko bakore ubushakashatsi. Ngira ngo nitwe dukwiye kubyikorera kuko nitwe tuzi iby’u Rwanda, nta muzungu uzabidukorera.”

Ingengabitekerezo iracyari ikibazo

Perezida wa IBUKA, Nkuranga Egide, yavuze ko mu bihe byo kwibuka, ingengabitekerezo ya Jenoside ikomeza gukwirakwizwa n’abahakana bakanapfobya Jenoside yakorewe Abatutsi.

Yasabye ko haba ubufatanye mu kurwanya abahakana bakanapfobya Jenoside yakorewe Abatutsi, by’umwihariko asaba urubyiruko guharanira kumenya neza amateka y’ukuri y’u Rwanda.

Ati “Ndagira ngo mpe umukoro abakiri bato, abafite amahirwe mukaba mugifite ababyeyi muganire nabo. Abagifite abo muganira mubaganirize kuko mugomba kubimenya mukazagira n’ibyo mubwira abana banyu kugira ngo bwa bumwe dushaka bwubakire ku mateka nyakuri.”

Minsitiri w’Ubutegetsi bw’Igihugu, Gatabazi Jean Marie Vianney, yavuze ko muri Jenoside yakorewe Abatutsi mu 1994 habaye ibikorwa bibi birenze ukwemera, aho abantu bamwe bishe abavandimwe babo babaziza ko ari Abatutsi.

Yagize ati “Hari abishe abababyaye muri batisimu, ababigishije, ababagabiye, abo bashakanye, hari abishe ababagiriye neza, ababagabiye, ababacumbikiye ku buryo nk’uko Egide yabivuze abantu bakwiye gukomeza gutekereza kuri uriya muntu umeze kuriya wa kiriya gihe.”

Yakomeje asaba Abanyarwanda gukomeza inzira nziza yo kunga ubumwe birinda amacakubiri kandi bagaha abana babo uburere bwiza buzira urwango.

Ati “Dusubize amaso inyuma twigire kuri aya mateka tunavanemo amasomo tunavanemo n’imbaraga zo gufasha abana bacu kugira ngo mu gihe tuzaba tutakiriho twebwe tubisobanura uyu munsi, tukaniyemeza ko hatazongera kuboneka abantu nk’abo ngabo [bakora jenoside].”

Yabibukije ko abigisha amacakubiri baticaye kuko bakoresha uburyo bwose bushoboka, asaba Abanyarwanda bose guhuza imbaraga bagaharanira kubarwanya no kunga ubumwe ndetse no kwigisha ubwiyunge n’amahoro.

Ababyeyi basabwe kwigisha abana babo ineza n'urukundo.
Abiciwe ababo muri Jenoside bahumurijwe.
Kwibuka Jenoside yakorewe Abatutsi mu Murenge wa Tumba byitabiriwe n'abayobozi batandukanye.
Minisitiri w'Ubutegetsi bw'Igihugu, Gatabazi Jean Marie Vianney, yasabye Abanyarwanda bose kunga ubumwe.
Perezida wa IBUKA, Nkuranga Egide, yavuze ko hakwiye gukorwa ubushakashatsi ku miterere y’abantu batinyutse gukora ubwicanyi ndengakamere muri Jenoside yakorewe Abatutsi mu Rwanda mu 1994.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .