Ibizibandwaho mu gihembwe cy’ihinga cya 2021 A n’uburyo Leta izunganira abahinzi

Yanditswe na Prudence Kwizera
Kuya 14 Kanama 2020 saa 01:01
Yasuwe :
0 0

Ikigo cy’Igihugu gishinzwe iterambere ry’Ubuhinzi n’Ubworozi, RAB, cyasabye abahinzi gutangira gutegura imirima n’ibindi bizakenererwa kuko ibihe bigaragaza ko hagati mu kwezi kwa Nzeri 2020 bazatera imbuto y’igihembwe cy’ihinga cya 2021 A.

Byagarutsweho n’Umuyobozi Mukuru wungirije wa RAB ushinzwe iyamamazabuhinzi n’ubushakashatsi, Dr Bucagu Charles, mu kiganiro yagiranye na IGIHE ubwo yari yitabiriye umuganda wo guca imirwanyasuri mu Karere ka Ruhango.

Yavuze ko bari mu myiteguro isabwa ku buryo ku itari ya 15 Nzeri 2020 abahinzi bazaba bujuje ibisabwa byose kugira ngo batere imbuto mu butaka.

Ati “Tugiye gutangira igihembwe cy’ihinga 2021 A, ariko dutangira ibikorwa hakiri kare bijyanye no gutegura ubutaka, ibikorwa bijyanye no kugira ngo inyongeramusaruro zigere ku bahinzi hakiri kare batazakererwa. Mu by’ukuri turi mu myiteguro yose kugira ngo kuri 15 Nzeri bazabe bashobora gutera.”

Dr Bucagu yavuze ko bari no mu bikorwa byo gukangurira abaturage kwiyandikisha ku rubuga rutuma bunganirwa na Leta ruzwi nka ‘Smart Nkunganire’ kuko kugira ngo inyongeramusaruro zigere ku muhinzi agombwa kuba yariyandikishije.

Yasabye abaturage kwitabira kwiyandikisha muri ‘Smart Nkunganire’ kugira ngo ayo mahirwe yo kunganirwa ntabacike, avuga ko muri iki gihe batangiye n’ibikorwa byo guhugura abahinzi kugira bazahinge neza hakiri kare ntibacikanwe n’imvura.

Ikindi gikomeye yagarutseho bari gukora ni ukwibutsa abaturage gushaka ifumbire y’imborera bazakoresha kuko itererwa rimwe n’ifumbire mvaruganda bahabwa ku buryo bwa nkunganire.

Ibihingwa 10 bizibandwaho

Dr Bucagu yavuze ko kuri iyi nshuro bazibanda ku bihingwa 10 bizunganirwa ku buryo bwa nkunganire ya Leta y’ifumbire, ari byo ibigori, soya, ingano, ibishyimbo, imyumbati, ibirayi, urutoki, imboga, umuceri n’imbuto. Ku buryo bw’imbuto hazunganirwa ibigori, soya n’ingano.

Biteganyijwe ko ubutaka buzahingwaho bwose bungana na hegitari 780.496 naho imbuto zizatangwa muri gahunda ya nkunganire ari toni 5431 mu gihe ifumbire mvaruganda ingana na toni 28.000.

Umujyanama wa Minisitiri w’Ubuhinzi n’Ubworozi, Dr Ndabamenye Télésphore, yibukije abahinzi ko iteganyagihe ryerekana ko imvura yenda kugwa, abasaba kwihutira gushaka imbuto n’ifumbire.

Ati “Ndagira ngo nibutse kandi mbwire abahinzi-borozi ko iyo urebye hejuru uhabona igicu kandi igicu kivuga igihembwe cy’ihinga. Twibuke kugura imbuto n’ifumbire. Nkaba ngira ngo mbabwire ko byatangiye gutegurwa, imbuto n’ifumbire bikegerezwa abahinzi kandi n’aho bitaragera birihutishwa.”

Abaturage bibukijwe ko 60% by’ubutaka buhingwaho mu Rwanda buri i musozi basabwa kwita ku kurwanya isuri kugira ngo umusaruro uzabe mwinshi kandi mwiza.

Minisiteri y’Ubuhinzi n’Ubworozi kandi yakanguriye abahinzi kwitabira guhinga imbuto nziza ituburiwa mu Rwanda. Uyu mwaka hamaze gutuburwa imbuto nziza y’ibigori toni 2700, toni 350 za Soya, toni 300 z’ingano, toni 26,000 z’ibirayi na toni 400 z’ibishyimbo. Imbuto y’ibigori, soya n’ingano zitangwa kuri nkunganire ya Leta naho ibishyimbo n’ibirayi byunganirwa ku ifumbire.

Abahinzi batangiye imyiteguro y'igihembwe cy'ihinga cya 2021 A
Umuyobozi Mukuru wungirije wa RAB ushinzwe iyamamazabuhinzi n’ubushakashatsi, Dr Bucagu Charles, afatanya n'abaturage bo mu Karere ka Ruhango guca imirwanyasuri
Umujyanama wa Minisitiri w’Ubuhinzi n’Ubworozi, Dr Ndabamenye Télésphore, yasabye abahinzi kwihutira gushaka imbuto n’ifumbire

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .