Ibizamini bya ADN byateye impaka mu rubanza rw’ushaka kuzungura uwazize Jenoside

Yanditswe na Evariste Nsengimana
Kuya 8 Ugushyingo 2019 saa 12:13
Yasuwe :
0 0

Aksante Job n’umwunganira mu mategeko mu rubanza Tuyishimire Yves amuregamo kwikubira imitungo ya Se [Gusenga Innocent n’umuryango we] bazize Jenoside yakorewe Abatutsi mu 1994, abaregwa bateye utwatsi raporo y’ibizamini byakozwe bigaragaza isano iri hagati yabo.

Uru rubanza rumaze imyaka isaga itanu rwatangiye Tuyishimire wagizwe impfubyi na Jenoside yakorewe Abatutsi yahitanye se Gusenga Innocent, Nyirasenge Nyirabarera Jacqueline n’abandi bo mu muryango we, arega Aksante ko yikubiye imitungo yabo.

Aksante yaburanye avuga ko Tuyishimire atari umwana wo mu muryango wa Gusenga Innocent na Nyirabarera Jacqueline [Aksante] avuga ko ari abavandimwe be naho Tuyishimire akavuga ko Gusenga ariwe se naho Nyirabarera akaba nyirasenge.

Mu maburanisha yabanje Tuyishimire yakomeje kugenda atsinda ariko Aksante akomeza gutsimbarara kugeza mu rukiko rw’Ikirenga aho yasabye ko hakorwa ibizamini bya ADN kugira ngo hemezwe isano iri hagati yabo.

Bitegetswe n’Urukiko rw’Ikirenga hemejwe ko hapimwa ADN y’imibiri ya Gusenga na Nyirabarera ishyinguye mu Rwibutso rwa Jenoside ku Gisozi bigahuzwa na ADN za Tuyishimire na Aksante.

Iburanisha ryo kuri uyu wa 7 Ugushyingo 2019, ryatangiye uwunganira Aksante asaba ko urubanza rwaburanishwa mu muhezo ku nyungu z’umuburanyi we ariko nyuma yo kwiherera Perezida w’Urukiko rw’Ikirenge, Prof Sam Rugege ategeko ko ruburanwa mu ruhame kuko nta mpamvu n’imwe yatuma ruburanishwa mu muhezo.

Yavuze ko urubanza ruburanishwa mu muhezo igihe bigaragara ko kuruburanisha mu ruhame bishobora guteza imvururu, bibangamira umuco cyangwa imibereho bwite y’umuntu, avuga ko urwo nta na kimwe rubangamira kuko inkiko zose zaruburanishije kurinda rugero mu rw’Ikirenga rwaburanishijwe mu ruhame nta mbogamizi byigeze bigira.

Prof Rugege yasabye umucamanza wakurikiranye urwo rubanza gusoma raporo y’ibizamini bya ADN.

Iyi raporo y’isuzuma ryakozwe na Laboratwari y’u Rwanda y’ibimenyetso bya gihanga byifashishwa mu butabera (RFL) igaragaza ko Gusenga ashobora kuba ari Se wa Tuyishimire ku gipimo kirenga 99.99% naho Nyirabarera akaba mushiki wa Gusenga ku kigero kirenga 99.99%.

Ku bijyanye n’isano hagati ya Gusenga na Aksante, iyi raporo yakozwe ku wa 15 Ukwakira 2019, igaragaza ko bashobora kugirana isano ku kigero cya 2.312%, bisobanuye ko amahirwe yo kuba nta sano bafitanye ari hejuru ya 97.56%.

Bigaragaza ko Nyirabarera afitanye isano na Tuyishimire ku kigero kirenga 99.99% mu gihe isano hagati ya Aksante na Tuyishime iri munsi ya 2.31%.

Uwunganira uregwa [Aksante] yavuze ko iyo raporo nta buziranenge we n’umukiliya we bayiha kubera kuba ivuguruzanya, kuba idafite inyandiko isobanura imvugo za gihanga ziyirimo ku buryo buri wese yayumva kandi ikaba nta nyandiko y’umuyobozi mukuru wa RFL iyiherekeza.

Yavuze ko raporo bahawe mbere y’umunsi umwe w’iburanishwa hari amakuru amwe itagaragazaga kubera ikoranabuhanga basobanuriwe ko ritari rihari bikaba bitumwika ukuntu iyasomwe uyu munsi amakuru yose iyatanga.

Uyu munyamategeko yavuze ko uwo yunganira afite impungenge ku buziranenge bw’iyo raporo ishobora kuba yarakozwe hashingiwe ku bushake bw’uwo baburana.

Yavuze ko bashingiye kuri izo mpamvu yagaragaje, ‘Ibyatanga umucyo n’ubutabera ari uko yakoherezwa mu mahanga mu bigo bifite ubushobozi buhambaye bwo gushakisha isano iri hagati y’umuntu n’undi kandi igakorwa n’abanyamahanga.’

Abunganira Tuyishimre bavuze ko ibyo nta shingiro bifite kuko raporo yakozwe mu buryo bwemewe n’amategeko kandi igakorwa n’ikigo cyemewe kandi kibifitiye ubushobozi. Bavuze kandi ko nta tegeko riteganya ko iyo raporo yagombaga guherekezwa n’inyandiko y’umuyobozi mukuru wa RFL.

Prof Rugege yabajije uwunganira Aksante, itegeko risobanura ko ‘Raporo ya gihanga yagombaga kuza iherekejwe n’inyandiko y’Umuyobozi mukuru w’ikigo cyayikoze [RFL], asubiza ko ingingo atayifite ariko yahabwa umwanya wo kuza kuyishaka.

Yavuze kandi ko bidashimishije kuba umunyamategeko wunganira Aksante anenga abahanga bashyizweho gukora ibyo bizamini ko bashobora kuba barakoze ibyo bategetswe na Tuyishimire.

Bavugirije Pascal ushinzwe Ishami ry’Ibizamini bya ADN muri RFL, yasobanuye ko ‘Ikoranabuhanga ryari rifite ikibazo kurivugurura bidasaba gutanga amasoko ahubwo ko ryari rishaje [expired] kandi kurivugurura byasaba kugura uburenganzira bwo kongera kurikoresha [Product Key] bityo kuba ibyaburaga muri raporo abaregwa bahawe mbere y’umunsi umwe nta gitangaje ko ibyasomwe mu rubanza hari ibyiyongereyemo.’

Tuyisenge yavuze ko ibisabwa n’uwo baburana n’umwunganira byo gukora ibindi bizamini bitahabwa agaciro kuko ari ugutinza urubanza, kurushya ubutabera no gusuzugura inzego zashyizweho n’igihugu asaba ko bitahabwa agaciro ahubwo akazahabwa indishyi z’akababaro za miliyoni 10 Frw.

Nyuma yo kumva impande zombi Perezida w’Urukiko rw’Ikirenga yavuze ko urubanza ruzasomwa ku wa 22 Ugushyingo 2019, saa tanu zuzuye.

Tuyishimire (hagati) n'abamwunganira ubwo bari mu rukiko imbere y'uko iburanisha ritangira
Bamwe mu bitabiriye iburanisha ryo ku wa Kane, tariki ya 7 Ugushyingo 2019
Ubwo Inteko Iburanisha iyobowe na Prof Sam Rugege yageraga mu rukiko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza