Ibitaro bya Kirehe byashyikirijwe imashini ikora umwuka ya miliyoni 140Frw

Yanditswe na Hakizimana Jean Paul
Kuya 26 Werurwe 2019 saa 04:25
Yasuwe :
0 0

Ibitaro by’Akarere ka Kirehe byabonye imashini ikora umwuka wifashishwa n’abarwayi mu gihe usanzwe uba wabaye muke, yatanzwe n’umuryango Partners in health ufasha aka karere mu bikorwa bitandukanye by’ubuzima.

Iyi mashini yatanzwe mu mpera z’icyumweru gishize ifite agaciro ka miliyoni 140 Frw, ifite ubushobozi bwo gutanga litiro 1750 z’umwuka ku munsi.

Umuyobozi w’ibitaro bya Kirehe Dr. Ngamije Patient yavuze ko batangaga amafaranga menshi bagura umwuka hanze.

Ati "Mu cyumweru kimwe twajyaga i Kigali kugura umwuka nibura ungana na litiro 2500, litiro imwe twayiguraga 350 Frw, ni ukuvuga mu cyumweru twatakazaga ibihumbi hagati ya 770Frw na 875 Frw.”

“Ayo mafaranga rero twatakazaga mu kugura umwuka tugiye kujya tuyifashisha mu kugura imiti n’ibindi bikorwa bijyanye no gufasha abarwayi bacu no kubaha serivisi zinoze.”

Dr. Ngamije avuga ko bizanorohereza abaganga babanzaga kurwana no gukura ku muntu icupa ryashizemo umwuka.

Ati “Mbere twakoresha amacupa manini umwuka washiramo bigatwara umwanya munini kugira ngo bajye kuzana irindi barishyireho ariko ubu ng’ubu, bikoze ku buryo amatiyo ahita atanga umwuka ako kanya, twarayubakiye ku buryo bitazagorana, bizajya binorohera abaganga babanzaga guterura amacupa bakayigizayo bakajya kuzana andi.”

Umuyobozi wa Partners in Health mu Karere ka Kirehe, Kaitesi Daniella, yavuze ko iyi mashini yazanywe n’inzobere z’Abafaransa zifite uburambe mu gukora ibyuma bitanga umwuka hirya no hino ku isi.

Ni mu rwego rwo gufasha ibi bitaro gukomeza kunoza serivisi biha ababigana.

Partners in Health ni umwe mu bafatanyabikorwa b’imena b’Akarere ka Kirehe, ihamaze imyaka 13. Uretse iyi mashini, bari no kubaka inzu izajya ihugurirwamo abaganga n’inzu izajya yakirirwamo abana bavutse badashyitse.

Kaitesi yanavuze ko mu Karere ka Kirehe Partners in Health ikoresha amadorari ari hagati ya miliyoni imwe n’igice n’ebyiri ku mwaka mu bikorwa birimo gufasha abatishoboye, inyubako z’ubuvuzi, kongerera abakozi ubushobozi n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza