00:00:00 IGIHE NETWORK KN KINYARWANDA EN ENGLISH FR FRANCAIS

Ibisubizo byijejwe abamotari imbere ya Perezida Kagame byaheze he?

Yanditswe na IGIHE
Kuya 28 Ukuboza 2022 saa 03:20
Yasuwe :

Mu mezi abiri byagombaga kuba byakemutse, ariko ubu abaye ane. Ibibazo by’abamotari bikomeje kubaremerera, uhereye ku kiguzi cy’ubwishigizi, n’ibindi batangaho amafaranga, bituma bavuga ko gukora umwuga wabo bibahenda cyane.

Ku wa 25 Kanama 2022 nibwo umumotari Bizimana Pierre yagejeje kuri Perezida Paul Kagame wari wasuye Akarere ka Ruhango, bimwe mu bibazo bigoye abamotari.

Yagize ati "Dufite ikibazo cy’ubwishingizi buhenze cyane, ku buryo moto yanjye nyishyurira ubwishingizi bwa 156,000 Frw, tukishyura ibintu bitandukanye, ‘autorisation’, ipatante, umusoro ku nyungu, tukishyura byinshi ku buryo utabasha no kugura umwenda cyangwa ngo urihire umwana mu ishuri. Turabasaba kugira ngo ikibazo cyacu kibe icyanyu, mukidukurikiranire."

Perezida Kagame yavuze ko acyumvishe, ati "Icyo kibazo rwose nanjye ndagishyiramo uruhare rwanjye, turaza kugikemura."

Minisitiri w’Ibikorwa remezo Dr Nsabimana Ernest, yavuze ko kirimo gukurikiranwa n’inzego zirimo MININFRA ayoboye, Banki Nkuru y’u Rwanda, Minisiteri y’Imari n’Igenamigambi n’izindi,

Yakomeje ati "Nyakubahwa, mu gihe kitarenze amezi abiri kizaba cyakemutse."

Ku wa 28 Kanama 2022 - ku wa 28 Ukuboza 2022, iminsi 126 irashize, ariko intambwe zo gukemura ikibazo mu buryo burambye bisa n’aho zikiri nyinshi.

Umuvugizi wungirije wa Guverinoma y’u Rwanda, Alain Mukurarinda, yatangaje ko byagaragaye ko hari ibyuho mu mategeko bigomba kubanza kuzibwa.

Icya mbere, ni itegeko rishyiraho igipimo ntarengwa kigaragaza ubwo Umwishingizi ashobora kwishyura (limit on claims), kugeza ubu "riri kwigaho", kimwe n’itegeko rishyiraho umushahara fatizo, naryo "riri kwigwaho" nk’uko Mukuralinda yakomeje abisobanura.

Yakomeje ati "Ibi nibimara gutungana nibyo bizagena ubwishingizi bushya bwa moto. Ntabwo rero ikibazo cyatereranywe."

Mu bindi bibazo bikirebwaho, harimo ‘kibazo cya raporo z’abaganga rimwe na rimwe zikabya ku birebana n’ubumuga budahoraho n’ubuhoraho.

Mukuralinda yakomeje ati "Nabyo hagomba kujyaho umurongo ufatika bikorerwamo".

Kuva mu myaka ishize, byagaragaye ko ibigo by’ubwishingizi bikora bihomba, ku buryo mu 2018 ibiciro byabaye ngombwa ko bizamurwa, nk’ubwishingizi bwa moto buva ku 30 000Frw, byarazamutse cyae ubu bigeze ku 153,200 kuri moto itarengeje imyaka 5.

Ni ibiciro biri hejuru kuko hari nk’imodoka zishyura agera muri 85,000 Frw.

Mu mwaka ushize, Radiant itanga cyane ubwishingizi bwa moto, yavuze ko ibiciro byazamutse biturutse ku bwiyongere bw’amafaranga bishyura nk’indishyi bitewe n’impanuka za moto, aruta kure amafaranga y’ubwishingizi zitanga.

Nibura mu myaka itatu yari ishize, ikigereranyo cy’izamuka ryazo cyageze kuri 330%. Kugeza mu 2018, BNR yatangaje ko muri myaka itatu yari ishize, abashoramari bo mu bigo bitanga ubwishingizi bongeyemo miliyari 33Frw kubera guhomba.

Kutagira umushahara fatizo ugenderwaho ngo uwakoze impanuka yishyurwe, bikaba biri mu byakomeje kugaragazwa nk’izitizi, kuko amafaraga atangwa ashingira kubushishozi bw’umucamanza.

Umuyobozi Mukuru w’ikigega cyihariye cy’ingoboka Special Guaranty Fund, Joseph Nzabonikuza, mu mwaka ushize, yavuze ko kuba hari abamotari badafite ubwishingizi binashyira Leta mu gihombo iyo habaye impanuka.

Ati ’’Dufashe nk’umwaka ushize w’ingengo y’imari amafaranga twasohoye twishyura abantu bagize impanuka zo mu muhanda agera kuri miliyoni 660 , muri izo ngizo abakomerekejwe na moto ni nka 80% ni ukuvuga miliyoni 586, uyu mwaka turangije w’ingengo y’imari hiyongereyeho miliyoni 200 ku buryo igihombo twatewe n’izo mpanuka zituruka ku bamotari ni nka miliyoni 267.’’

Nubwo ibiciro bikiri hejuru, impanuka na zo zakomeje kwiyongera kandi moto zikaba mu zikora impanuka nyinshi.

Imibare igaragaza ko impanuka zavuye ku 4160 mu 2020 zigera ku 8639 mu 2021, ndetse muri uyu mwaka wa 2022 nubwo utararangira, kugeza mu byumweru bibiri by’Ukuboza hari hamaze kuba impanuka 8,660.

Abamotari bavuga ko bishyura ibintu byinshi ku buryo umwuga wabo utakibasha kubatunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .