00:00:00 IGIHE NETWORK KN KINYARWANDA EN ENGLISH FR FRANCAIS

Ibintu 10 u Rwanda ruhanze amaso mu 2023

Yanditswe na Rabbi Malo Umucunguzi
Kuya 4 Mutarama 2023 saa 07:32
Yasuwe :

Umwaka wa 2022 wabaye amateka, ubu amaso ahanzwe uwa 2023. Umwaka ushize wabaye uw’icyizere kuko wasize benshi batangiye kubura umutwe, nyuma yo kuzahazwa n’icyorezo cya COVID-19 mu buryo bumwe cyangwa ubundi.

Mu gihe umwaka wa 2023 ukiri mu ntangiriro, hari byinshi biwitezwemo bifite icyo bivuze gikomeye ku buzima bw’igihugu, ku buryo umusaruro uzabivamo utegerejwe na benshi.

Hari n’ingingo zavuzwe cyane mu mwaka ushize, ku buryo igisubizo cyitezwe muri uyu mwaka. Izi ni ingingo 10, buri wese ashobora gukora ubusesenguzi ku giti cye wenda akabona izindi yumva zakongerwa ku rutonde cyangwa zikavanwaho.

Icyerekezo cya COVID-19

Benshi bamaze gusezera udupfukamunwa, ibirori byose ubu birafunguye, ariko COVID-19 iracyahari kuko mu cyumweru gishize yishe umugore w’imyaka 58.

Kugeza ubu abaturarwanda miliyoni 9,9 bamaze guhabwa doze ebyiri z’inkingo za COVID-19, ndetse miliyoni 5,6 bahawe n’ishimangira.

Mu bana bafite imyaka 5-11, abasaga miliyoni 1.1 bamaze guhabwa doze ya mbere. Ibyo ni ibimenyetso by’uko indwara yahagurukiwe.

Nyamara nko mu Bushinwa, tumaze iminsi tubona uburwayi bukaza umurego, kandi nta wakwibagirwa ko ari ho indwara yaturutse, igasakara isi yose.

Ibihugu byinshi byatangiye kugira ubwoba ku iherezo ry’iyi nkubiri, ku buryo byasubijeho uburyo bwo gupima abagenzi bava mu Bushinwa.

Aho iki cyorezo kigana ni kimwe mu bintu bizahozwaho ijisho muri uyu mwaka, cyane ko kubera uburyo cyandura cyane, ingamba zo kugikumira zigira ingaruka zikomeye ku mibereho y’abantu.

U Rwanda rwashyize imbaraga nyinshi mu gukingira COVID-19

Amatora y’abadepite

Umwaka ushize, impera zawo ntizaguye neza abadepite kuko zasize hibazwa ku budahagarwa bwabo kugeza n’aho Umukuru w’Igihugu abugarukaho.

Izo mpaka zasize batatu beguye mu buryo bwavuzwe ko bufitanye isano na ka manyinya, kumwe uyikura mu icupa ikagukura mu bagabo. Uko ari batatu nta n’umwe wabashije gusimburwa, kubera ko kuri manda hari hasigayeho igihe kitagera ku mwaka.

Muri uyu mwaka hategerejwe amatora y’abadepite bashya, intumwa za rubanda, bategerejweho guhagararira abaturage kandi bagatora amategeko ababereye, ajyanye n’aho igihugu kigana.

Ni urugendo rutegerejwe na benshi, baba abakandida bigenga cyangwa amashyaka yifuza kuzamura umubare w’abayahagarariye mu Nteko.

Manda y'abadepite irimo gusozwa yatangiye ku wa 19 Nzeri 2018, ubwo barahiraga

Intambara y’u Burusiya na Ukraine

Ubwo twumvaga ko Ingabo z’u Burusiya zagose Uburasirazuba bwa Ukraine, nta watekerezaga ko nk’umusaza wibereye za Nyabihu, muri kilometero zirenga 8000 uvuye iyo za Donetsk, utanagira pasiporo ngo azakenere kujyayo mu ndege ihure na missile, uyu munsi yaba yateshejwe umutwe n’ingaruka z’iyi ntambara.

Ibikomoka kuri peteroli byarahenze kuko hari byinshi byashyirwaga ku isoko n’u Burusiya, ibiciro bya gaz byaratumbagiye, reka ibinyampeke n’ifumbire mvaruganda byo ntiwarora! Abakoraga umugati batinye kuzamura igiciro cyawo kubera ko ifarini yahenze cyane, banusura ku bunini bw’uwo bakoraga.

Nubwo ntawe ubona neza aho iyi ntambara igana kuko abanyaburayi na Amerika bakajije umurego mu gufasha Ukraine, u Burusiya nabwo bugakaza umurego mu gutera za missile ku bikorwa remezo by’ingenzi, iyi ntambara n’ingaruka zayo birarambiranye.

Yatangiye ku wa 24 Gashyantare 2022 benshi bibwira ko mu mezi make izaba irangiye, Ukraine ifashwe cyangwa Putin atsinzwe, ariko mu kwezi gutaha, umwaka uzaba wihiritse.

Izamuka ry’ibiciro

Ya COVID-19 twahereyeho ndetse n’iyi ntambara y’u Burusiya na Ukraine, byagize ingaruka zikomeye ku buryo uretse n’ibicuruzwa biva mu mahanga byahenze cyane, urusenda rwa pilipili, umufungo wa dodo, igitunguru, ibiciro byarazamutse cyane.

Imibare y’Ikigo cy’Ibarurishamibare mu Rwanda iheruka kwerekana ko mu Ugushyingo, izamuka ry’ibiciro ryageze kuri 21,7%, ndetse iby’ibiribwa n’ibinyobwa bidasembuye byo byiyongereyeho 45,4%.

Ni nyuma yo kugabanyuka ku gipimo cya 3.4 ku ijana mu 2020, no kuzamuka ku 10.9% mu 2021 na 7.7% mu gice cya mbere cy’uyu mwaka wa 2022.

Ntabwo imibare y’izamuka ry’ibiciro ry’Ukuboza ndetse n’iry’umwaka wa 2022 riratangazwa, ariko byitezwe ko riri hejuru ya 8% wafatwaga nk’igipimo fatizo cyo hejuru mu Rwanda, ku buryo iteganyamibare ryavugaga ko bishobora kuzamuka kuri 13.2%, nubwo bishobora kurenga.

Byitezwe ko bitewe n’imiterere y’ikirere gishobora kuba cyiza ku buhinzi, icyizere mu imanuka ry’ibiciro by’ibikomoka kuri peteroli no kubasha guhangana neza n’ingaruka z’intambara y’u Burusiya na Ukraine, muri uyu mwaka izamuka ry’ibiciro rishobora kudohoka.

Biteganywa ko rizaba rimaze gusubiza mu mbago BNR yifuza, itarenga 8%, mu gice cya kabiri cy’uyu mwaka. Ni uguteganya ariko, nta wamenya!

Amatora yo muri Congo

Imwe mu ngingo zishyushye cyane mu Karere, ni amatora ya perezida wa Repubulika ya Demokarasi ya Congo, aho abanyapolitiki barimo Moise Katumbi, Martin Fayulu n’abandi, bahagurukiye guhangana na Felix Tshisekedi ushaka manda ya kabiri, mu gihe amatora azaba ku wa 20 Ukuboza 2023.

Ni amatora yatangiye kuvugwa mu gihe muri RDC hari umwuka mubi, kuko Ingabo za Leta, FARDC, zihanganye n’umutwe wa M23, umutwe Guverinoma y’icyo gihugu ivuga ko ufashwa n’u Rwanda, rwo rukabyamaganira kure.

Byageze n’aho abasesenguzi bamwe bavuga ko RDC irimo kwitwaza u Rwanda, ngo ubuyobozi bwayo bushake impamvu yatuma busubika amatora kuko impamvu zigaragaza ko Tshisekedi ashobora gutsindwa ari nyinshi.

Icyakora ntabwo abanyapolitiki bemeranya ku muntu ufite imbaraga wamutsinda.

Imidegendekere y’aya matora (naramuka abaye) ni ingenzi cyane mu byo u Rwanda ruhanze amaso, kuko hari nk’abanyapolitiki baba bingingira Tshisekedi kurugabaho ibitero. Icyacura batowe, buri wese yagikeka.

Umwuka mubi wanazamuye ubushotoranyi bwa RDC, aho ku nshuro zitandukanye yarashe mu Rwanda, indege yayo y’intambara imaze kuvogera ikirere cy’u Rwanda ubugira kabiri, n’ibindi.

Tshisekedi ahanzwe amaso cyane ku bijyanye n'amatora muri uyu mwaka

Imikoranire ya FARDC na FDLR n’intambara ya M23

Guverinoma y’u Rwanda imaze iminsi igaragaza ko FARDC irimo gukorana na FDLR, umutwe washinzwe na bamwe mu bagize uruhare muri Jenoside yakorewe Abatutsi mu 1994.

Ni umutwe uteye inkeke ku mutekano w’u Rwanda n’akarere k’ibiyaga bigari, nyamara Leta ya Congo ikabyima amatwi, igakorana na wo cyane cyane mu guhangana na M23.

Raporo y’impuguke yagejejwe ku kanama k’Umuryango w’Abibumbye gashinzwe umutekano ku wa 10 Kamena 2022, yagaragaje ko "Colonel" Ruvugayimikore Protogène alias Ruhinda, hamwe n’Umwungiriza we "Silencieux", ari bo bayobora uyu mutwe wihariye uzwi nka Commando (CRAP).
Colonel Ruhinda yanayoboye ibijyanye n’Imyitozo muri FDLR-FOCA.

Raporo iheruka gushimangira imikoranire y’Ingabo za Repubulika ya Demokarasi ya Congo (FARDC) n’imitwe irimo FDLR ndetse ko yakomeje kuyiha intwaro.

Ku wa 23 Gicurasi 2022, nibwo Guverinoma y’u Rwanda yatangaje ko Ingabo za Congo, FARDC, zarashe ku butaka bw’u Rwanda, mu mirenge ya Nyange na Kinigi mu Karere ka Musanze na Gahunga mu Karere ka Burera.

Raporo y’impuguke za Loni igaragaza ko ubwo Itsinda rihuriweho rishinzwe kugenzura ibibazo byo ku mipaka (EJVM) ryajyaga mu iperereza, ryasanze hararashwe ibisasu umunani bya rokete za 122 mm.

Ivuga ko byakomerekeje bikomeye abantu babiri, byagiza n’ibintu byinshi. Icyakora, ngo EJVM ntiyabashije kumenya neza inkomoko yabyo.

Ikomeza iti "Nk’uko byatangajwe n’abantu batatu bigenga, harimo babiri bafite imikoranire ya hafi n’imitwe yitwaje intwaro muri Rutshuru, Colonel Ruvugayimikore Protogène, alias Ruhinda, wa FDLR ni we wategetse ingabo ze kurasa ku butaka bw’u Rwanda."

Iryo tsinda ngo ryakomeje gukora iperereza ku nkomoko y’ibi bisasu kimwe n’ababirashe cyangwa abatanze amabwiriza yabyo.

Raporo ikomeza iti "Itsinda ryasanze FARDC ifite ibisasu bya 122 mm, ariko izi ntwaro ntabwo iri tsinda ryazisanganye FDLR."

Muri bwa buryo bwo gutanga intwaro, birashoboka ko ibisasu byavuye ku basirikare ba Leta, bikaraswa n‘abandi bo muri FDLR.

Ubu bufatanye kimwe n’ingaruka z’intambara ya M23, ni bimwe mu bibazo bihanzwe amaso muri uyu mwaka.

Perezida Paul Kagame, mu birori byo gusoza umwaka yavuze ko bene ibi bibazo birimo "kuvugutirwa umuti", kandi w’Ikinyarwanda.

Bamwe mu barwanyi ba FDLR bafatiwe ku rugamba rwa M23

Impunzi z’Abarundi n’Abanye-Congo

Kugeza muri Gicurasi 2022, u Rwanda rwabaruraga impunzi 127,369, aho 60.43% zari Abanye-Congo, mu gihe 39.15% zari Abarundi.

Umunyamabanga Uhoraho muri Minisiteri y’Umutekano mu Burundi Lt Gen. de Police, André Ndayambaje aheruka mu Rwanda azaniye impunzi z’Abarundi ziri mu Rwanda indamukanyo zivuye kuri Perezida w’icyo gihugu, Evariste Ndayishimiye.

Ati "Hari abazi ko ibyo basizeyo, umutekano muke, intambara n’ibindi bibi byose aribyo biri iwabo. Ntabwo ariko bimeze, aka kaga mumazemo igihe mukavemo."

Mu gihe ku Burundi hari ihumure, ku banye-Congo bamaze imyaka isaga 20 mu Rwanda, agahinda ni kose kuko bene wabo basigayeyo barimo kwicwa bazira ko ari Abatutsi, ku buryo gaheruka kubegura bakajya mu mihanda bakigaragambya.

Umwe mu bigaragambyaga mu kwezi gushize, yaguye igihumure ubwo yabonaga amashusho yahawe kuri telefoni agaragaza umutwe wa musaza we uri ukwawo n’igihimba ukwacyo, amaze kwicirwa iwabo muri RDC azira ko ari Umututsi.

Ibi bibazo bya Jenoside irimo kunuganugwa muri RDC, byiyongera ku mpamvu zateye ubuhunzi zitarangira, mu gihe ibitunga impunzi bimaze gukendera ku rwego mpuzamahanga kuko ababitangaga nabo ubu iwabo batorohewe, ni ibyo gucungirwa hafi muri uyu mwaka.

Uruganda rw’inkingo

Uruganda rwa BioNTech rwo mu Budage, mu kwezi gushize rwatangaje ko kontineri esheshatu zizaba zigize igice kimwe cy’uruganda rw’inkigo mu Rwanda kizwi nka BioNTainer, zamaze gukorwa, zisuzumwa n’inzobere ndetse byitezwe ko zizagera i Kigali mu gihembwe cya mbere cya 2023.

Ni uruganda rwagenewe ubutaka bwa metero kare 30.000 mu cyanya cy’inganda i Masoro, mu buryo bw’ibanze rukazaba rugizwe n’inyubako ebyiri zigizwe na kontineri ziteranyije, BioNTainers.

Biteganywa ko inkigo zizakorwa zizaba zigenewe ibihugu bigize AU, hagamijwe kubifasha kwikorera inkingo n’imiti bikenera, ubu biri kuri 1%, kuko ibindi 99% bitumizwa mu mahanga.
Intego ni uko nibura kugeza mu 2040, Afurika yazaba yikorera 60% by’inkingo ibihugu byayo bikenera.

BioNTech yatangaje ko igeze kure ubushakashatsi ku nkingo za malaria n’igituntu, zifashishijwemo ikoranabuhanga rya mRNA. Biteganywa ko kugeragereza izo nkingo ku bantu bizatangira mu mpera z’uyu mwaka cyangwa mu ntangiro za 2023.

Uwo ni umushinga witezweho gutanga umusaruro muri uyu mwaka.

Imiterere ya BioNTainer izaba ikorerwamo inkingo, igizwe na kontineri esheshatu

Amasezerano y’u Rwanda n’u Bwongereza

Muri Mata 2022 nibwo u Rwanda rwasinyanye amasezerano n’u Bwongereza, rwemera kwakira abimukira binjiye mu Bwongereza mu buryo unyuranyije n’amategeko, rwemera kubakira mu gihe ubusabe bwabo bugisuzumwa, ariko u Bwongereza bukabatunga.

Inzu bagombaga kwakirirwamo n’ibindi bari gukenera byarateguwe, ariko ku munota wa nyuma, Indege ya mbere yagombaga gukora urugendo ruva mu Bwongereza rugana i Kigali itwaye abimukira binjiye muri iki gihugu mu buryo bunyuranyije n’amategeko, ihagarikwa habura amasaha make ngo itangire urugendo, kubera ibirego byatanzwe kuri ayo masezerano.

Urugendo rw'iyi ndege rwahagaritswe habura amasaha make ngo ihaguruke, ubu byitezwe ko nta rutangira izabaho

Icyakora, ku wa 19 Ukuboza 2022, Urukiko Rukuru rwo mu Bwongereza rwemeje ko gahunda y’icyo gihugu yo kohereza abimukira mu Rwanda yakurikije amategeko, ku buryo amasezerano yashyizweho umukono n’ibihugu byombi ashobora gutangira gushyirwa mu bikorwa.

Byitezwe ko aya masezerano ashobora kubahirizwa, muri uyu mwaka tubakona indege zitwaye aba bimukira.

Mu mwaka ushize baranarumbutse, kuko abantu 45,728 binjiye mu Bwongereza baciye mu nzira y’amazi izwi nka English Channel bari mu bwato butoya, aho biyongereyeho hejuru ya 60% ugereranyije n’umwaka wabanje.

Inama n’ibirori bitegerezanyijwe amatsiko

Nk’uko umwaka wa 2022 wabaye uw’amahirwe no kwicinya icyara ku ruganda rw’amahoteli no kwakira abantu, uwa 2023 na wo usa n’uzakorera mu ngata uwawubanjirije.

Uyu mwaka uteganyijwemo inama nyinshi zikomeye zizabera mu Rwanda, kimwe n’ibikorwa by’imyidagaduro bizahuza abantu benshi.

Twavuga nka Tour du Rwanda iteganyijwe ku wa 19 - 26 Gashyantare 2023, Inteko rusange ya 73 ya FIFA izaba ku wa 16 Werurwe muri Kigali Convention Centre; Inama mpuzamahaga ihuza abayobora ibibuga by’indege (Airport Council International GA) n’Ihuriro mpuzamahanga ry’Avangilikani (Global Anglican - GAFCON IV) rizaba ku wa 17 - 21 Mata.

Hari kandi BAL 2023 izaba hagati ya tariki 15 - 31 Gicurasi muri BK Arena, IRONMAN 2023 izabera i Rubavu, Giants of Africa Festival, Kwita Izina 2023, Mobile World Congress Africa 2023; World Medical Association n’ibindi, aho tuvuzemo bike.

Ibirori n'inama bizarumbuka cyane muri uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .