Ibintu 10 Abanyarwanda banenga kuruta ibindi

Yanditswe na Cyprien Niyomwungeri
Kuya 25 Kanama 2020 saa 07:26
Yasuwe :
0 0

Mu myaka 26 ishize Jenoside yakorewe Abatutsi ihagaritswe n’ingabo zari iza FPR Inkotanyi, ni byinshi u Rwanda rumaze kugeraho mu ngeri zitandukanye z’ubuzima bw’igihugu kandi impinduka ku muturage wo hasi zirigaragaza.

Ubukungu bw’igihugu bwateye imbere ku kigero cyiza, urwego rw’ubuzima rwariyubatse, abararaga mu nyakatsi ubu baratengamaye mu ibati, imihanda yarubatswe mu mpande zose z’igihugu, uburezi n’ubuvuzi buragera kuri bose kandi urugendo rw’iterambere rurakomeje.

U Rwanda rwashyize imbere politiki yo kubazwa inshingano ibumbatiye kwishimira ibyakozwe ariko n’ibitakozwe bigakurikiranwa kandi hakagira ubazwa impamvu yabyo. Ni yo mpamvu hakorwa ubushakashatsi butandukanye bwerekana ishusho nyayo y’inguni z’ubuzima bw’igihugu.

Ubushakashatsi ku ishusho y’uko abaturage babona imiyoborere n’imitangire ya serivisi mu nzego zibegereye bwakozwe n’Urwego rw’Igihugu rw’Imiyoborere (RGB), bwagaragaje ibyo abanyarwanda bishimira ku kigero cyo hejuru n’ibyo banenga.

Ubu bushakashatsi bwakozwe umwaka ushize, bugaragaza ko abaturage bishimiye imiyoberere n’imitangire ya serivisi mu nzego zibegereye ku gipimo cya 70.4%.

Umutekano ni cyo gipimo gikomeje kuza ku isonga mu byo abaturage bashima kurusha ibindi kuko kiri ku gipimo cya 89.4% mu gihe ubuhinzi ari cyo gipimo gikomeje kuza inyuma mu byo abaturage bashima kuko kiri ku gipimo cya 55%.

Muri iyi nkuru, turabagezaho ibyiciro 10 abanyarwanda bishimira ku kigero cyo hasi ugereranyije n’ibindi.

-Ubuhinzi

Mu 2019, serivisi z’ubuhinzi muri rusange zishimwa ku gipimo cya 55.0% mu gihe abanenga ari 41.8%. Ni zo serivisi zinengwa kurenza izindi nk’uko ubu bushakashatsi bwabigaragaje.

Guhuza ubutaka, abaturage babinenga ku kigero cya 44.2%, kubona isoko ry’umusaruro babinenga ku kigero cya 51.84%, kubona inguzanyo mu mabanki n’ibigo by’imari iciriritse ku bahinzi babinenga ku kigero cya 46.73%, guhunika umusaruro babinenga ku kigero cya 64.30%.

Gutunganya no kongerera agaciro ibikomoka ku buhinzi babinenga ku kigero cya 70.19%, kuhira imyaka babinenga ku kigero cya 77.39% naho gukoresha imashini zihinga babinenga cyane kuri 83.21%.

-Ibikorwa remezo

Ubushakashatsi bwa RGB bwibanze ku mazi, amashanyarazi, imihanda n’amateme ndetse n’itumanaho n’ikoranabuhanga.

Muri rusange serivisi z’ibikorwa remezo zishimiwe n’abaturage ku gipimo cya 61.7% naho abazinenga ni 33.5%.

Uturere tw’umujyi wa Kigali nitwo dufite abaturage bashima serivisi z’ibikorwa remezo ku gipimo kiri hejuru ya 75%. Akarere ka Burera abaturage bashima serivisi z’ibikorwa remezo ku gipimo kiri hasi cya 49.3%.

Muri rusange serivisi z’ibikorwa remezo zakoreweho ubushakashatsi zishimwa ku gipimo kiri hasi. By’umwihariko serivisi z’amazi nizo abaturage banenga cyane.

-Ubworozi

Muri rusange serivisi z’ubworozi zishimwa ku gipimo cya 62.7% mu gihe 32.6% bazinenga.

Gutunganya no kongerera agaciro ibikomoka ku bworozi, abaturage babinenga ku kigero cya 63.36%, kubona inguzanyo mu mabanki n’ibigo by’imari iciriritse ni 42.36%, kubona isoko ry’amata binengwa kuri 43.63%.

Abaturage bagaragaje ko zimwe mu mpamvu zituma serivisi z’ubworozi zitanoga ari ukutabona amakusanyirizo y’amata ndetse n’ahari akaba adafite imikorere inoze bityo biteza igihombo aborozi babikora kinyamwuga.

Ikindi ni ubuziranenge bw’amata butanoze buterwa n’imitunganyirize yayo mbere yo kugera ku isoko. Bagaragaje ko nta bafasha myumvire mu bworozi bahari ngo bigishe abaturage kwiteza imbere banizigamira mu mabanki.

Hari n’imbogamizi muri gahunda ya Girinka, aho bagaragaje ko hari bamwe mu baturage bahabwa inka batabanje gutegurwa bityo ikababera umuzigo aho kubakura mu bukene. Hari kandi ikibazo cy’abatera intanga badahagije n’ibikoresho byo kuzibika bidahagije.

Bagaragaje kandi ko abaveterineri bafite ikibazo cy’uburyo bwo kugera ku baturage bigatuma serivisi zabo zitihuta uko bikwiye.

-Uburezi

Ubushakashatsi bwibanze ku kunoza ireme ry’uburezi, imfashanyigisho zihagije kandi zigezweho, ibikoresho by’ikoranabuhanga mu mashuri, umubare uhagije w’abarimu, uruhare rw’ababyeyi mu myigire y’abana, inyubako z’amashuri, amazi meza ku mashuri, amashanyarazi ku mashuri, gutanga ifunguro ryo ku manywa ku banyeshuri n’isuku ku mashuri.

Abaturage bagaragaje ko bishimiye serivisi bahabwa mu burezi ku gipimo cya 63.6% naho 30.5% ni abazinenga.

Uku kunenga kwatewe n’uko ibikorwa remezo n’ibikoresho by’ikoranabuhanga bitarakwirakwizwa uko bikwiye mu mashuri ndetse n’aho biri ntibyorohereza abafite ubumuga.

Gahunda yo gutanga ifunguro ryo ku manywa nayo ntiranoga ahanini bitewe n’uko ababyeyi batitabira gutangira ku gihe umusanzu wabo.

Bagaragaje kandi ko ubucucike mu mashuri bukiri hejuru bitewe n’ibyumba by’amashuri bidahagije ugereranije n’umubare w’abanyeshuri bigomba kwakira, ndetse n’ikibazo cy’amashuri y’imyaka 12 ataragera hose.

Urwego rw’abikorera

Ubushakashatsi bwagaragaje ko abaturage bashima serivisi z’abikorera ku gipimo cya 63.8% bakazinenga kuri 27.9%.

Mu mujyi wa Kigali niho abaturage bashima serivisi z’abikorera ku kigero kiri hejuru 70.6% naho mu ntara y’Uburasirazuba niho bashima ku gipimo kiri hasi cya 61.4%.

Serivisi z’amahoteli na restaurant nizo abaturage bashima ku kigero kiri hasi ya 58.02%. Abaturage bagaragaje ko serivisi z’abikorera zigifite imbogamizi zirimo imyumvire y’abakozi bakora mu mahoteli na restaurant ikiri hasi, serivisi zo gutwara abantu n’ibintu cyane mu mujyi zidashimishije haba mu gukerereza abagenzi n’umutekano muke wabo.

Ubutaka n’ibidukikije

Abaturage bashima serivisi z’ubutaka n’ibidukikije ku gipimo kingana na 63.9% naho abanega bakaba 32.7%.

Muri rusange serivisi zo gutanga ibyangombwa by’ubutaka zishimwa ku gipimo cya 57.23%. Nk’uko bigaragara abagore nibo bazishima ku gipimo cyo hejuru kurusha abagabo.

Gahunda zitsura imibereho myiza

Kuri iyi ngingo, ubushakashatsi bwibanze ku guhitamo abagenerwabikorwa ba VUP na Girinka no kubakira abatishoboye.

Muri rusange, ababajijwe bagaragaje ko bishimiye serivisi zitangwa mu rwego rwo kwita ku mibereho y’abaturage ku gipimo cya 67.3% naho 24.2% barazinenga.

Abaturage bagaragaje ko ku birebana na gahunda y’inguzanyo, abagenerwabikorwa batayitabira kubera inyungu ku nguzanyo ikiri hejuru ituma batinya kuyifata ndetse n’ubumenyi buke mu gutegura imishinga.

Ku birebana n’imirimo y’amaboko ihemberwa, baragagaje ko hakirimo ikibazo cyo gutoranya abagenerwabikorwa b’iyi gahunda no gutinda kwishyurwa.

Isuku n’isukura

Muri iki cyiciro, abaturage babajijwe uko babona isuku yo mu ngo z’abaturage no ku mubiri n’ahandi hantu hatandukanye harimo; mu mavuriro, mu masoko, mu mahoteli na restaurant, no mu biro by’inzego z’ibanze.

Abaturage babajijwe bagaragaje ko bishimiye isuku n’isukura ku gipimo cya 69.2% bakanenga ku gipimo cya 28.50%.

Abaturage bagaragaje ko mu byo batishimira ari uko hari abakirarana n’amatungo biterwa ahanini n’ubujura bw’amatungo. Hanagaragajwe ko hamwe mu hahurira abantu benshi hataba ubwiherero rusange n’aho buri bukaba budacungwa neza. Ikindi cyavuzwe ni imyumvire y’abaturage ku isuku n’isukura ikiri hasi.

Inzego z’ibanze

Ibyavuye mu bushakashatsi byagaragaje ko abaturage banyuzwe na serivisi zitangwa n’inzego z’ibanze ku gipimo cya 71.3% naho abanenga ni 25.9%.

Abaturage bagaragaje ko bimwe mu bituma serivisi zitangwa n’inzego z’ibanze zitishimirwa cyane harimo; abakozi badahagije ugereranyije na serivisi zisabwa biterwa ahanini n’abakozi badashyirwa mu myanya kandi iyo myanya iteganyijwe ku mbonerahamwe y’imyanya y’umurimo bigatuma inshingano z’abahari ziyongera.

Bagaragaje kandi ko aho gukorera hadahagije aho usanga mu biro bimwe nabwo bifunganye hatangirwamo serivisi nyinshi. Ikindi bagaragaje ni ibikorwaremezo by’ikoranabuhanga n’ibikoresho byo mu biro bidahagije ndetse n’amashanyarazi aho usanga ahenshi ku biro by’tugari atarahagera kandi ariho serivisi nyinshi zitangirwa.

Ikindi bagaragaje n’uko ingengo y’imari igenerwa umurenge ari nto ugereranyije n’ibikorwa baba bafite bisaba ubushobozi buhagije birimo kwegera abaturage n’ibikorwa remezo

Ubuzima

Muri rusange serivisi z’ubuzima zishimiwe ku gipimo cya 72.9% naho abazinenga ni 22.5%.

Mu turere 11 abaturage bishimiye serivisi z’ubuzima ku gipimo kiri hejuru ya 75%, naho utundi turere 19, abaturage bishimiye serivisi z’ubuzima ku gipimo kiri hagati ya 60 na 75%.

Serivisi zo kubona imiti nizo zinengwa cyane ku kigero cya 37.9%, kwakira no kwita ku barwayi binengwa ku gipimo cya 31.9%.

Abaturage baragagaje ko hakiri imbogamizi zituma badahabwa serivisi z’ubuzima uko bikwiye. Muri zo harimo; abakozi b’amavuriro badahagije, amavuriro atinda kwishyurwa ku bakoresha mutuelle de sante, poste de sante zitaragera hose ndetse no mu zihari hakaba harimo izidakora neza.

Hari kandi ikoranabuhanga rikoreshwa mu bwisungane mu kwivuza rigifite imbogamizi zidindiza imitangire ya serivisi ndetse n’umukozi ushinzwe mutuelle de sante udakora mu minsi y’impera y’icyumweru (weekend) bigatuma hari ababura serivisi bari bazikeneye.

Hari byinshi abanyarwanda bishimira mu myaka 26 ishize ariko hari n'ibyo banenga bifuza ko byanozwa
Ibyo abanyarwanda bishimira n'ikigero biriho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .