00:00:00 IGIHE NETWORK KN KINYARWANDA EN ENGLISH FR FRANCAIS

Ibindi bihe bikomeye u Rwanda rwaciyemo, rukabisohokamo rwemye

Yanditswe na Rabbi Malo Umucunguzi
Kuya 13 June 2022 saa 08:55
Yasuwe :

Ubwo Perezida Paul Kagame yiyamamarizaga gukomeza kuyobora Abanyarwanda muri Kanama 2017, mu Murenge wa Bumbogo mu Karere ka Gasabo, yabizezaga kubabera “shock absorber”, kwa kundi imodoka igwa mu kinogo ariko uyirimo ntahungabane.

Nubwo ari imvugo yakoreshejwe mu myaka isaga itanu ishize, yakomeje gushyirwa mu ngiro kuva mu myaka ishize.

Mbere na mbere, biragoye ko haboneka ibihe bigoye u Rwanda rwaciyemo byaruta Jesoside yakorewe Abatutsi mu 1994, ariko nayo rwabashije kuyisohakamo nubwo rugihanganye n’ingaruka zayo.

Nyuma yayo, hari ibihe bikomeye ubuyobozi bwarwo rwahuye na byo, burahatana kandi intsinzi iraboneka.

Ibibazo bya politiki

Ku wa 24 Werurwe 2000, nibwo inkuru yamenyekanye ko Pasteur Bizimungu wari Perezida kuva muri Nyakanga 1994, yeguye ku mpamvu ze bwite.

Mu 2002 ibyari impamvu bwite byaje gusobanuka, atabwa muri yombi akurikiranyweho ibyaha byo kunyereza umutungo wa Leta no kurema umutwe w’ingabo utemewe, aho yari amaze gushinga ishyaka PDR Ubuyanja.

Yaje gufunganwa na Charles Ntakirutinka wari Minisitiri w’ingufu n’imirimo rusange, waje no guhamwa n’ibyaha birimo gukangurira abaturage kwigumura no kurema umutwe w’abagizi ba nabi. Yakatiwe igifungo cy’imyaka icumi, ayirangiza mu 2012.

Bizimungu amaze kwegura, Gen Maj Paul Kagame wari Visi Perezida akaba na Minisitiri w’Ingabo, yahise amusimbura by’agateganyo.

Bizimungu yaje gukatirwa gufungwa imyaka 15, afungurwa ku wa 6 Mata 2007 ku mbabazi za perezida.

Icyo gihe yeguye nyuma y’igihe kitagera ku kwezi kumwe Minisitiri w’Intebe, Pierre-Celestin Rwigema na we yeguye, ahita ahungira muri Leta Zunze Ubumwe za Amerika.

Ibyo bibazo ni byo byatumye abagiyeho muri Guverinoma ya mbere ya nyuma ya Jenoside nka Twagiramungu Faustin wabaye Minisitiri w’Intebe yegura tariki 28 Kanama 1995 ndetse agahunga, hamwe n’uwari Minisitiri w’Itangazamakuru, Nkuliyingoma Jean Baptiste.

Abandi baje guhunga barimo Jean Marie Ndagijimana wabaye Minisitiri w’ububanyi n’amahanga na Seth Sendashonga wabaye Minisitiri w’Umutekano, warasiwe muri Kenya ku wa 16 Gicurasi 1998.

Ni ibihe bitari byoroshye muri politiki noneho ku gihugu cyari kikiva muri Jenoside ariko u Rwanda rwabashije kubirenga.

Grenades i Kigali n’ihunga rya Kayumba

Mu mwaka wa 2010, benshi mu bari batuye Umujyi wa Kigali bibuka ibitero bya grenades byatewe hirya no hino nko kwa Rubangura, Kicukiro, Nyabugogo n’ahandi.

Amakuru y’iperereza yaje kugusha ku bagabo babiri, Lt. Gen. Kayumba Nyamwasa na Colonel Patrick Karegeya nk’abari babiri inyuma.

Nko ku wa 19 Gashyantare 2010, grenade eshatu zatewe ahantu hatandukanye hategerwa imodoka mu Mujyi wa Kigali, zica abantu batatu naho 28 barakomereka.

Ni ibintu byakomeje, kugeza ubwo ku wa 26 Nyakanga 2013, nabwo Polisi y’u Rwanda yemeje hari grenade yatewe i Nyabugogo ahari hazwi nka “Marathon” habaga hakoraniye abantu benshi ku mugoroba, ihitana abantu babiri, abandi babiri bakomereka bikabije, naho 30 bakomereka byoroheje.

Ubushinjacyaha bwaje gutangaza ko mu buhamya bwakusanyijwe, abatangabuhamya baje guhuriza ku ruhare rwa Kayumba na Karegeya.

Kayumba wabaye Umugaba Mukuru w’Ingabo na Ambasaderi mu Buhinde, yahise ahunga igihugu anyuze muri Uganda, asanga muri Afurika y’Epfo Karegeya wahoze ayobora iperereza rya gisirikare.

Kayumba yaje gukatirwa gufungwa imyaka 24, nyuma yo guhamwa no kurema umutwe w’ingabo utemewe, kubangamira umutekano w’igihugu no gutoroka igisirikare.

Ni mu gihe Karegeya yapfiriye muri Afurika y’Epfo ku wa 31 Ukuboza 2013, muri Michelangelo Towers hotel mu Mujyi wa Johannesburg.

Abakekwaho ibyo byaha bakomeje gufatwa, agahenge kongera kuboneka.

Grenade zatewe mu Mujyi wa Kigali mu myaka ya 2012 zashyize igihugu mu icuraburindi ariko kibasha gusohoka muri ibyo bihe cyemye

M23 no guhagarikirwa inkunga

Ibirego byo gushinja u Rwanda gushyigikira umutwe wa M23 ntabwo ari bishya, kuko byakomeye cyane mu 2012 ubwo uwo mutwe wafataga umujyi wa Goma.

Waje gutsindwa mu 2013 mu bitero simusiga by’ingabo z’akarere zishyize hamwe, bamwe mu barwanyi bahungira mu Rwanda, abandi muri Uganda.

Ibintu byageze kure kuko u Rwanda rwaje gufatirwa ibihano, Leta Zunze Ubumwe za Amerika zihagarika inkunga ya gisirikare yahaga u Rwanda, irushinja gutera inkunga M23 yashinjwaga kwinjiza abana mu gisirikare.

Mu Ugushyingo 2012, u Bwongereza nabwo bwatangaje ko bufunze inkunga ya miliyoni 21£ yagombaga guhabwa u Rwanda, isanga izindi miliyoni 16£ yari yaratanzwe.

Ni ibikorwa byahaye imbaraga ishingwa ry’Ikigega Agaciro nk’ubwizigame bw’ibihe by’amage, nubwo iki kigega cyari cyamerejwe mu Nama y’Igihugu y’Umushyikirano ya cyenda mu 2011. Cyatangijwe ku mugaragaro na Perezida Paul Kagame wa 23 Kanama 2012.

Mu ijambo yavugiye mu ngoro y’Inteko Ishinga Amategeko ku wa 31 Ukuboza 2012, Perezida Kagame yavuze ko intambara yo muri Congo u Rwanda rutayigizemo uruhare, ndetse n’ababivuga babizi ko ataribyo.

Yashimangiye ko ko bene izi nkunga zishobora guhagarara igihe icyo ari cyo cyose, kuko impamvu zigenderwaho zigenwa n’abatanga iyo nkunga.

Ati “Intego yacu ikwiye kuba kugenda dukora ibishoboka byose tugabanya imfashanyo iva mu mahanga, cyane cyane twibanda ko havayo ishoramari rindi ry’abikorera.”

Yongeyeho ati “Guhagarika imfashanyo bikaba byashobora gusa kudindiza iterambere ryacu, ariko ntibizatubuza gukomeza gukora ibishoboka byose kugira ngo twivane aho turi."

Ibyo u Rwanda rwarabirenze, ndetse imfashanyo abazihagaritse barazirekura nyuma batanga izirenzeho.

U Rwanda rwashinjwe gufasha umutwe wa M23 bigeza n'aho ruhagarikirwa inkunga

Ibitero by’imitwe yitwaje intwaro

Ubwo Ingabo zari zimaze gutsindwa urugamba n’izari iza RPF Inkotanyi mu 1994, zahunganye ibikoresho byazo byinjira muri Zaire.

Icyo gihugu cyakoze ikosa ryo kubacumbikira hafi y’umupaka w’u Rwanda i Goma n’i Bukavu, bibaha urwaho bakagenda bagaba ibitero mu Rwanda, byishe abantu benshi.

Rumwe mu ngero ni ubwo mu ijoro rishyira ku wa 19 Werurwe 1997, Abacengezi bagabye igitero mu Ishuri ryisumbuye rya Nyange, basaba abanyeshuri kwitandukanya, Abahutu ukwabo n’Abatutsi ukwabo.

Barabyanze, maze abacengezi bicamo barindwi, abandi 40 bararokoka.

Abana bo mu Nyange bishwe n'Abacengezi bari mu mugambi wo gukomeza Jenoside

Ni ibikorwa byabaye cyane mu bice bya Gisenyi, Ruhengeri, Gitarama n’ahandi.

Nanone, tariki 19 Mutarama 1998, abari abakozi b’uruganda rwa Bralirwa) bagera kuri 39, biciwe muri bisi barashwe n’abacengezi, nyuma yo kubasohora ngo bice Abatutsi bonyine, bakavugira rimwe bati “twese turi Abanyarwanda”.

Abacengezi bishe abakozi 39 ba Bralirwa n’abandi bantu babiri bari muri bisi bajya mu kazi.

Byatwaye imbaraga nyinshi u Rwanda ariko rutsinda intambara y’abacengezi n’umutwe wa FDLR, bamwe mu bari abayobozi bawo nka Gen Maj (Rtd) Paul Rwarakabije, Gen Maj (Rtd) Jerome (Ngendahimana) na Brig Gen Murenzi Evariste, binjizwa mu Ngabo z’u Rwanda.

Abandi barimo nka Gen Maj Pacifique Ntawunguka wavuze ko azagaruka mu Rwanda “nta mututsi ukirurimo”, bakomeje kubuyera mu mashyamba babarizwa muri FDLR.

Mu gihe uwo mutwe wasaga n’ucecetse, hadutse umutwe wa FLN, ushamikiye ku mutwe wa politiki wa MRCD Ubumwe, wayoborwaga na Paul Rusesabagina.

We na Nsabimana Callixte Sankara wari umuvugizi wa FLN babaga mu mahanga, baje gufatwa ubu barimo kurangiza ibihano bakatiwe.

Uwo mutwe wakoze ibyaha byinshi by’iterabwoba, aho nko mu ijoro ryo ku wa 15 Ukuboza 2018, Minisiteri y’Ingabo yatangaje abantu bataramenyekana bagabye igitero ku modoka eshatu bakazitwika, abantu babiri bakahasiga ubuzima abandi umunani bagakomereka.

Ni ibitero byagabwe mu Murenge wa Cyitabi mu Karere ka Nyamagabe, n’abantu “baturutse mu gihugu cy’u Burundi banyuze mu ishyamba rya Nyungwe, ari nayo nzira banyuze basubirayo."

Uretse ibyo, mu ijoro ryo ku wa 19 Kamena 2018 bishe barashe abantu babiri muri Nyaruguru, bakomeretsa batandatu barimo n’Umunyamabanga Nshingwabikorwa w’Umurenge wa Nyabimata, batwika n’imodoka ye na moto y’umuturage.

Mu Ukwakira 2019 nabwo, bamwe mu bagize imitwe y’inyeshyamba ya P5 na RUD Urunana bagera kuri 67 bagabye igitero ku Rwanda binjiriye mu Majyaruguru mu Kinigi, baza gukwirwa imishwaro nyuma yo gukubitwa inshuro n’ingabo z’u Rwanda.

Ni igitero cyaguyemo abaturage b’inzirakarengane 14 mu gihe ingabo z’u Rwanda zishe 19 mu bari bagabye icyo gitero.

Benshi muri abo barafashwe, ubu abatakiri imbere y’ubutabera bari muri gereza.

Grenade zatewe mu Mujyi wa Kigali mu myaka ya 2012 zashyize igihugu mu icuraburindi ariko kibasha gusohoka muri ibyo bihe cyemye

Dosiye mpuzamahanga zo gufata abayobozi

Mu bibazo bikomeye byabayeho mu myaka ishize, harimo na dosiye zashyiriweho abayobozi bakuru mu Rwanda, cyane cyane mu nzego za gisirikare.

Harimo nka dosiye y’ihanurwa ry’indege ya Juvenal Habyarimana wayoboye u Rwanda kuva mu 1973-1994, yarashwe mu ijoro ryo ku wa 6 Mata 1994.

Hashingiwe ku birego byatanzwe n’imiryango y’abaguye mu ndege, mu 2006 Umucamanza Jean-Louis Bruguière - atageze ku butaka bw’u Rwanda - yatangaje ko iyo ndege yahanuwe na FPR Inkotanyi.

Yahise asohora impapuro mpuzamahanga zisaba ifatwa ry’abantu icyenda barimo abayobozi bakuru mu Ngabo z’u Rwanda: James Kabarebe, Faustin Kayumba Nyamwasa, Charles Kayonga, Jackson Nkurunziza (Jack Nziza), Rose Kabuye, Samuel Kanyemera (Sam Kaka), Jacob Tumwine, Franck Nziza na Eric Hakizimana.

Ni icyemezo cyateje umwuka mubi hagati y’u Rwanda n’u Bufaransa, ndetse umubano uzamba mu buryo bukomeye.

Muri Nzeri 2010, abacamanza Marc Trévidic na Nathalie Poux bakoze iperereza bo bagera ku butaka bw’u Rwanda no mu Burundi, basanga ya ndege yarahanuwe n’abantu bagomba kuba bari mu kigo cya gisirikare cya Kanombe, cyagenzurwaga n’Ingabo za Habyarimana.

Ku wa 21 Ukuboza 2018 abacamanza bakurikiranaga iyo dosiye bemeje ko bayihagaritse kimwe no gukurikirana ba bantu icyenda, kubera “ibura ry’ibimenyetso bidashidikanywaho”, bitewe n’uko hagendaga haboneka ubuhamya buvuguruzanya.

Ibirego bya Jean-Louis Bruguière byamaze igihe kinini bijegeza u Rwanda nubwo nyuma byateshejwe agaciro

Ni icyemezo cyashimangiwe n’Urukiko rw’Ubujurire rwa Paris muri Nyakanga 2020, giterwaho kashe n’Urukiko Rusesa imanza ku wa 15 Gashyantare 2022.

Iyo dosiye igifite agaciro ariko yateje ibibazo, ubwo ku wa 9 Ugushyingo 2008, Rose Kabuye wari Lieutenant Colonel mu Ngabo z’u Rwanda n’Umuyobozi mukuru wa porotokole (protocole) ya Leta, yafatirwaga ku kibuga cy’indege cya Frankfurt mu Budage.

Ni igikorwa cyateje imyigaragambyo ikomeye, kiba ikibazo cya dipolomasi, kugeza ubwo umucamanza yafashe icyemezo cyo kuba asubitse impapuro zimuta muri yombi.

Mu bindi birego u Rwanda rwahanganye nabyo, harimo n’inyandiko zatanzwe n’umucamanza Fernando Andreu Merelles wo muri Espagne mu 2008, zasabaga ifatwa ry’abanyapolitiki n’abasirikare 40 b’u Rwanda.

Yabashinjaga ko bakoze ibyaha bitandukanye hagati y’imyaka ya 1990 - 2002, birimo urupfu rw’abanya-Espagne batatu bakoreraga Medicos del Mundo.

Muri abo 40 harimo Lt Gen Karenzi Karake - ubu yasezerewe mu ngabo - wayoboraga Urwego rw’Iperereza n’Umutekano w’igihugu.

Mu buryo butunguranye yaje gufatirwa mu Bwongereza ku kibuga mpuzamahanga cya Heathrow, ku wa 20 Kamena 2015 nibwo

Impapuro zo kumufata, abantu benshi barimo n’abayaburayi bahamyaga zirimo gukoreshwa mu nyungu za politiki.

U Rwanda ntirwumvaga uburyo yafashwe ari mu butumwa bwa Leta buhesha umuntu ubudahangarwa.

Inzira zari zitahiwe zari iz’amategeko, Karake yunganirwa n’abarimo Cherie, umugore wa Tony Blair wahoze ari Minisitiri w’Intebe w’u Bwongereza.

Ku wa 25 Kamena 2015 yarekuwe by’agateganyo atanze ingwate ya miliyoni imwe y’amapawundi - arenga miliyari y’Amafaranga y’u Rwanda.

I Kigali, Urugaga rw’Abikorera mu Rwanda (PSF) rwahise rutangiza ikigega bise Ishema ryacu, kigamije gufasha Umunyarwanda wese ushobora guhura n’ikibazo nk’icyo.

Karake yategetswe kuguma muri Ambasade y’u Rwanda mu Bwongereza, akazajya yitaba Polisi buri munsi.

Ku wa 10 Kanama 2015 Urukiko mu Bwongereza rwarekuye Lt Gen Karake, wari umaze iminsi 50 afashwe.

Ku wa 24 Nzeri 2015 za nyandiko zarebaga abantu 40 zateshejwe agaciro n’Urukiko rw’Ikirenga rwa Espagne, ibyo bibazo u Rwanda rubisohokamo nubwo bitabuze kurukereza.

Inyandiko zatanzwe n’umucamanza Fernando Andreu Merelles wo muri Espagne mu 2008, zasabaga ifatwa ry’abanyapolitiki n’abasirikare 40 b’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .