00:00:00 IGIHE NETWORK KN KINYARWANDA EN ENGLISH FR FRANCAIS

Ibimenyetso by’amateka ya Jenoside bigiye kubikwa mu buryo bw’ikoranabuhanga mu mashusho n’amajwi

Yanditswe na Igizeneza Jean Désiré
Kuya 24 Ukuboza 2022 saa 07:05
Yasuwe :

Minisitiri w’Ubumwe bw’Abanyarwanda n’Inshingano Mboneragihugu (MINUBUMWE), Dr. Bizimana Jean Damascène, yatangaje ko bamaze imyaka myinshi bakusanya ubuhamya bugera hafi 1000 bw’abacitse ku icumu n’abarinzi b’igihango kandi bugomba kubikwa mu buryo bw’ikoranabuhanga mu mashusho n’amajwi.

Ni intambwe izaterwa hagamijwe gufasha abantu kurushaho kumenya amateka nyakuri ya Jenoside yakorewe Abatutsi mu 1994 kuko inzibutso nyinshi ubu buryo nta bubonekamo.

Minisitiri Dr. Bizimana yabitangaje ubwo abakozi ba MINUBUMWE n’abafatanyabikorwa bahugurwaga n’abashakashatsi, abanyamateka b’inzobere baturutse i Paris ku rwibutso rwa Jenoside yakorewe Abayahudi i Paris (mémorial de la SHOAH).

Aba bakozi bahuguwe ku bijyanye no kubongerera ubumenyi bw’amateka kuri Jenoside n’ubundi bwicanyi ndengakamere bwabaye ku Isi harimo n’u Rwanda.

Minisitiri Dr. Bizimana yavuze ko abakozi n’abo bafatanyije bakenera ubumenyi ku bijyana na Jenoside, kubungabunga amateka n’ubushakashatsi kuko kwiga bihoraho.

Yagize ati "Ubumenyi ni ikintu kidahagarara ni yo mpamvu abakozi bacu benshi ari bashya ku buryo bakeneye ubumenyi nko kubaka amahoro, kubungabunga amateka, ibimenyetso birimo nk’inzibutso, gushyiramo amateka kuko zimwe mu zo dufite nyinshi ntiharajyamo uburyo bw’amashusho, amajwi n’ibindi."

Yakomeje ati “Ndetse buriya no gukusanya ubuhamya bigira uburyo bikorwamo nk’uburyo bwo kububika ibyo rero ni byo bazatwigisha no kubungabunga inyandiko dufite zitari iza Gacaca gusa ndetse n’izindi zijyanye n’amateka kuko kenshi ni impapuro. Hari ikoranabuhanga Abayahudi bafite bakoresha mu kuzibungabunga igihe kirekire biri mu byo bazadufasha gukora.”

Yasoje avuga ko hari umushinga bafite bazakorana ubafasha kubika impapuro, amajwi n’amashusho ku buryo bishobora gukoreshwa igihe kinini bikabyazwa umusaruro kandi zigatangazwa ku mbuga nkoranyambaga zitandukanye kugira ngo n’urubyiruko rumenye amateka’

Kugeza ubu hamaze gukusanywa ubuhamya 1000 bw’abacitse ku icumu n’abarinzi b’igihango bakusanyije.

Ibimenyetso by’amateka ya Jenoside bifite akamaro mu kwigisha ababyiruka kuko abavutse nyuma ya Jenoside yakorewe Abatutsi bakenera kumenya amakuru yose y’uko yateguwe, uko yashyizwe mu bikorwa n’ingaruka zayo mu rwego rwo kubigisha kwirinda ko itazongera kubaho ukundi, ibyo byose bikaba bibitswe mu bimenyetso byose usanga mu nzibutso.

Bimwe mu byo abantu cyane cyane urubyiruko baba bafitiye amatsiko ni ukubona imibiri y’abishwe, amafoto, ibikoresho byifashishwaga n’uko byakoreshwaga ndetse bakanashaka kumenya bo uruhande barimo ariho bahera bagaragarizwa ububi bw’amacakubiri n’ivangura rishingiye ku moko, ahubwo bagakomeza kwiyumvamo Ubunyarwanda no kurwanya Jenoside.

Abari guhugurwa ni abakozi ba MINUBUMWE n'abandi bakora mu bijyanye no kubungabunga amateka ya Jenoside
Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, yatangaje ko bamaze gukusanya ubuhamya bugera hafi 1000 bw’abacitse ku icumu n’abarinzi b’igihango bugomba kubikwa mu buryo bw’ikoranabuhanga mu mashusho n’amajwi
MINUBUMWE yatangaje ko bamaze imyaka myinshi bakusanya ubuhamya bw'abacitse ku icumu mu rwego rwo kubungabunga ibimenyetso
Aya mahugurwa ari gutangwa n'inzobere mu by'amateka zaturutse mu Mujyi wa Paris
Minisiteri Dr. Bizimana yavuze ko hagiye kubyazwa umusaruro ibimenyetso by'amateka ya Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .