00:00:00 IGIHE NETWORK KN KINYARWANDA EN ENGLISH FR FRANCAIS

Ibilometero 70 by’imihanda bigiye kubakwa mu Mujyi wa Kigali

Yanditswe na Mukahirwa Diane
Kuya 15 August 2022 saa 11:57
Yasuwe :

Umujyi wa Kigali watangaje ko ugiye kubaka ibilometero 70 by’imihanda izahuza uduce dutandukanye mu gukomeza koroshya ingendo no kunoza ubuhahirane.

Iyi mihanda izubakwa muri gahunda Umujyi wa Kigali washyizeho yo kuba nibura mu 2024 uzaba wamaze kubaka ibilometero 215 by’imihanda n’ibiraro hirya no hino.

Biteganyijwe ko imirimo yo kubaka iyi mihanda igomba gutangira mu Ukwakira, izubakwa mu ngengo y’imari y’uyu mwaka, yitezwe kuba yuzuye muri Kamena 2023.

Imwe mu mihanda minini izubakwa yari ihangayikishije irimo uwa Mulindi-Gasogi-Rusororo-Kabuga, Miduha-Mageragere- Migina na Contrôle Technique.

Umuyobozi ushinzwe Imyubakire mu Mujyi wa Kigali, Emmanuel Asaba Katabarwa, yavuze ko iyi mihanda iri butangire kubakwa mu gihe cya vuba icyiciro cyo kwimura abantu kirangiye.

Yagize ati “Tugiye gutangira kubaka uduce 21 tw’imihanda muri iyi ngengo y’imari y’uyu mwaka. Ubu twatangiye gahunda yo kwimura abantu mu mihanda imwe n’imwe indi nayo iri mu nyigo, iki cyiciro ni kirangira tuzahita dutangira kubaka.”

Umuhanda Migina-contrôle Technique uzava ku Karere ka Gasabo ugera ku Cyicaro cya Airtel no kuri Sports View Hotel imbere ya Stade Amahoro, ukomeza uva contrôle Technique ukomeza Remera na Kimironko.

Undi muhanda uteganyijwe ukiri gutegurwa ni Zindiro-Masizi-Birembo-Kami-Gasanze uzaba ufite ibilometero 10.4. Hari kandi n’umuhanda Remera-Baho Hospital, uyu uzaba uva Nyabisindu ugana ku Bitaro bya Baho uzaba uhura kandi n’uva i Nyarutarama ugera ku Gishushu.

Muri uyu mushinga harimo n’Umuhanda Rugenge-Muhima Hospital-Nyabugogo, uzaba uturuka ahari kubakwa icyicaro gikuru cya RURA mu Kiyovu uyu uzajya wifashishwa mu gihe mu mujyi hari umuvundo mwinshi w’imodoka.

Harimo n’umuhanda wa Sonatubes-Sahara uzahuzwa n’ugana Kabeza. Umuhanda wundi witezwe ni Busanza-Muyange uzanyura Kicukiro Kagarama, uyu ugamije guhuza Kicukiro na Kanombe bidasabye guca mu Giporoso.

Umujyi wa Kigali wavuze ko byibuze abantu 2.009 batuye mu bice iyi mihanda izanyuramo bazimurwa, ari na yo mpamvu babashishikariza kugira ibyangombwa byuzuye kugira ngo bitazadindiza igikorwa cyo kubimura.

Kugeza ubu ntiharatangazwa ingengo y’imari iteganyirijwe iyi mihanda gusa haratangwa icyizere ko iratangira kubakwa vuba.

Umujyi wa Kigali watangaje ko ugiye kubaka ibilometero 70 by’imihanda izahuza uduce dutandukanye tw’Umujyi mu gukomeza koroshya ingendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .