Ibikwiye kwitonderwa mu gushyira ku karubanda abahamijwe gusambanya abana no gufata ku ngufu

Yanditswe na Cyprien Niyomwungeri
Kuya 19 Kanama 2020 saa 11:39
Yasuwe :
0 0

Abahamwe mu buryo budasubirwaho n’ibyaha byo gusambanya abana no gufata ku ngufu, bagiye kujya bandikwa mu gitabo gishyirwe ku karubanda buri wese abamenye, nk’imwe mu ngamba zo kugabanya ubwiyongere bw’ibi byaha.

Umuvugizi w’Ubushinjacyaha bw’u Rwanda, Faustin Nkusi, aherutse kubwira IGIHE ko iyi gahunda izatangira mu gihe cya vuba, igamije ko rubanda rumenya ababa bakoze biriya byaha biremereye kandi bigira n’ingaruka ku babikorewe mu buzima bwabo, yaba ku mubiri, guterwa inda bakiri bato, indwara, ingaruka mu mitekerereze ndetse n’ipfunwe muri sosiyete.

Yagize ati “Icyo tugamije ni ukugira ngo abantu babitinye, uretse no kuba hari ibihano bihari ariko n’utekereza kubikora amenye ko uretse kuba azahanwa, azanagaragara muri rubanda, bizamugiraho ingaruka mu buzima bwe bwose busanzwe. Niba yateye undi ingaruka z’ubuzima bwe, kuki rubanda we batamumenya?”.

Nkusi yakomeje asobanura ko ari ugushyiraho uburyo butuma abantu batinya icyaha no kugikumira ku rwego rw’uko n’ugiye kugikora atekereza ko uretse guhanwa azanagira icyasha agendana iteka kandi rubanda bose bakizi.

Hari ibyo kwitondera

Impuzamiryango y’abaharanira uburenganzira bwa muntu (CLADHO), isanga kwandika no gushyira ku karubanda abahamijwe ibyaha byo gusambanya abana no gufata ku ngufu, bishobora kumera nk’ibiteye abantu ubwoba bikaba byatuma biriya byaha bigabanuka.

Umuyobozi ushinzwe guhuza gahunda za CLADHO, akagira n’uburenganzira bw’umwana mu nshingano, Murwanashyaka Evariste, yabwiye IGIHE ko ‘kubatangaza nta kibazo kirimo byatuma hari ababikoraga bashobora kugira ubwoba, ariko hari ibikwiye kwitonderwa’.

Ati “Bigomba gukorwa ku buryo hatazigera hagaragaramo wa wundi icyaha cyakoreweho. Bajye batangaza izina ariko birinde kugira ahantu na hamwe bavuga ngo yateye umwana wo kwa runaka inda n’ibindi”.

Murwanashyaka yakomeje avuga ko bidakozwe neza byagira ingaruka zirimo gukomeretswa k’uwakorewe icyaha. Urugero niba uwasambanyijwe cyangwa uwafashwe ku ngufu yatewe inda, umwana uzavuka ashobora kuzabwirwa ko Se ari ku karubanda kubera ibyaha nk’ibyo, bikaba byamukomeretsa.

Ati “Izindi ngaruka bishobora kuba byatera ni nk’uriya mwana uba waratewe inda kuko buriya abenshi hari n’ababa batifuza ko uwabateye inda bamufunga, akazakura afite ipfunwe akajya abwira nk’uwo mwana muto wavutse ngo Papa wawe amanitse hariya cyangwa n’abaturanyi bakajya bahora babimubwira”.

Murwanashyaka yagarutse ku ngaruka bishobora kugira ku muryango uwakoze icyaha akomokamo, niba ari nk’umugabo ufite abana n’umugore bikaba byabatera ipfunwe.

Ati “Ni ikimwaro ku muryango uwakoze icyaha akomokamo kuko hari abaturage bashobora kubyakira ukundi, bashobora no guserereza abandi. Hari abaturage bamwe bashobora kubyitwaza bagakora ihohotera ribabaza umutima kuri ya miryango yavutsemo wa muntu”.

CLADHO yifuza ko gushyira ku karubanda abahamwe n’ibyaha byo gusambanya abana no gufata ku ngufu, bikoranwa ubushishozi ndetse n’abaturage bagasobanurirwa impamvu itumye bikorwa, bakabwirwa ko badakwiye kubiha umwanya ngo bitume bakomeretsanya.

Uyu muryango usanga hakwiye kwirinda kugaragaza imyirondoro yose y’umuryango w’uwakoze icyaha [nk’ababyeyi be...], ahubwo hakandikwa izina n’icyaha yakoze gusa. Usanga kandi igikwiye gushyirwamo ingufu cyane kurenza ibindi ari ugukumira.

Ibyaha byo gusambanya abana ni kimwe mu bihangayikishije cyane igihugu kubera uburyo bigenda bifata intera itari nziza ndetse ababikora bakiyongera nubwo bahanwa by’intangarugero.

Imibare y’uburyo ibirego byo gusambanya abana byatanzwe igaragaza ko mu 2016/17, Urwego rw’Igihugu rw’Ubugenzacyaha, RIB, rwakiriye ibirego 2091, mu 2017/18 biba 3060 naho mu 2018/19 yakira ibirego 3512.

Mu bantu bakurikiranyweho ibi byaha, mu 2018/2019 ni 3417, mu 2017/18 bari 3001 naho mu 2016/2017 ni abantu 2092.

Murwanashyaka asanga gushyira ku karubanda abahamijwe gusambanya abana no gufata ku ngufu ari igisubizo ariko hari ibyo kwitondera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .