Ibikubiye mu nyandiko Madamu Jeannette Kagame yasangije abantu nk’iyabafasha kubaka umuryango urambye

Yanditswe na Iradukunda Serge
Kuya 13 Mutarama 2020 saa 01:03
Yasuwe :
0 0

Madamu wa Perezida wa Repubulika, Jeannette Kagame, yasabye abantu gusoma inyandiko y’umuhanga mu mitekerereze ya muntu Dr Gary Olivier yitwa ‘7 keys to building strong families’ kuko ikubiyemo ingingo zabafasha kubaka umuryango urambye.

Ibiri muri iyi nyandiko yabigarutseho kuri uyu wa Gatandatu muri Kigali Convention Centre, ubwo yatangaga ikiganiro cyihariye cyiswe ‘Conversation with First Lady’, cyatangiwe mu biganiro byahuje abayobozi bakiri bato, mu rwego rwo gusengera igihugu, guhugurana no gushima Imana.

Ni ibiganiro bitegurwa n’umuryango, Rwanda Leaders Fellowship, byari bifite insanganyamatsiko ivuga ku ‘Kubaka umuryango muzima nk’ishingiro kamere ry’igihugu kizima’.

Muri ibi biganiro Madamu Jeannette Kagame yagaragaje ko mu miryango Nyarwanda uyu munsi harimo ibibazo bituma abato batifuza kubaka ingo.

Yagize ati “Dufite abakiri bato benshi bafite impungenge zo gushaka no kubaka imiryango, dufite abashakanye bapyinagaza abandi kugira ngo berekane ububasha babafiteho kandi n’ababikorerwa bakabyemera, ndetse n’imiryango n’inshuti zabo zirebera.”

Madamu Jeannette Kagame yagaragaje ko ihohotera ryo mu ngo atari ibintu by’i Rwanda ko ndetse nta naho byabaye mu muco warwo.

Ati “Dusubire mu mateka yacu y’ubudahemuka, byari igisebo kandi n’ikizira ko umuntu yahohotera undi, mu muco wacu iteka umubyeyi yarindaga abana be ntabwo gukubita no guhohotera uwo mwashakanye twigeze tubyigishwa n’umuco wacu. Ntabwo ari iby’i Rwanda”.

Muri ibi biganiro, yagaragaje ko ibi bibazo bibangamiye umuryango muri iki gihe binabangamiye ubushobozi bwo kugira igihugu gikomeye.

Madamu Jeannette Kagame yasangije abari muri ibi biganiro inama zirindwi ziri mu nyandiko ya Dr. Gary Olivier, nk’izabafasha gusohoka mu bibazo abashakanye barimo bityo bakubaka ingo nziza n’umuryango urambye.

Yagize ati “Nifuje kandi kubasangiza inyandiko yanditswe na Dr. Gary Olivier. Inyandiko yayise ‘Keys to building strong families’, ngenekereje mu Kinyarwanda nayita Imfunguzo z’ingenzi zo kubaka umuryango urambye”.

Dr. Gary nyuma yo gukora ubushakashatsi akanashingira no ku bunararibonye afite, yasohoye inyandiko ikubiyemo ingingo zirindwi abona ko zafasha mu kubaka umuryango ubanye neza kandi ukaramba.

Inama zrindwi za Dr. Gary Olivier

-Imbaraga ziri mu kuba intangarugero

Ibyo abana bawe bakura babona ukora, ni byo ufite amahirwe menshi yo kuzabona bakora bamaze gukura. Ni iki abana bawe bafatiraho urugero mu mico yawe? Ese babona ukuri, ubunyangamugayo ndetse n’ubudakemwa mu bikorwa?.

Ese bafite ingero zubaka ku bumenyi bwo gukemura amakimbirane? Ese uha agaciro kandi ugashyigikira umwihariko wabo? Ese uba intangarugero ukanashyigikira ibikorwa byubaka no kugaragaza amarangamutima? Impano ihebuje ushobora guha abana bawe ni uwo uri we.

Ubuzima abana bacu babona tubayemo buri munsi bufite imbaraga cyane kurusha ibyo tubabwira. Byombi ni ingenzi ariko hagomba kubaho guhuza hagati y’amagambo n’ibikorwa.

-Gutanga impano y’igihe

Igihe ni bwo buryo abana basobanukirwamo urukundo. Ababyeyi ba nyabo ntibashaka umwanya, bigomwa umwanya. Kuki bikomeye cyane? Turahuze cyane mu byo dukenewemo n’ibidushyira ku gitutu.

Hagati muri ibi dukora, abana bacu bagaragara byoroshye nka kirogoya. Ntibyumvikana kuri twe ko buri gihe twareka buri kimwe tugatanga ibyo abana bacu bakeneye.

Dukeneye kandi kwibuka ko abana badafite uburyo bwo kumva igihe nk’ubwo dufite. Ni gute twashyiraho igihe? uburyo bumwe ni ukubashyirira ku ruhande umwanya w’umwihariko, bahe umwanya babyutse mu gitondo cyangwa igihe bageze mu rugo bavuye ku ishuri cyangwa mu kindi gikorwa. Teganya ku ruhande umwanya uhagije rimwe na rimwe mu gihe cy’impera z’icyumweru.

-Imbaraga ziri mu kugaburira urukundo

Iga uko bavuga ‘ndagukunda’ mu buryo burenze bumwe. Mu Abefeso igice cya 5, Intumwa Pawulo atanga inama zuje ubwenge ku bagabo n’abagore. Atubwira ko ibikorwa bibiri by’ingenzi mu mubano urimo urukundo, ari ukwiga gukunda no kugaburira mugenzi wawe.

Gukunda ni ingingo yoroshye. Iyo ukunda ikintu bivuze ko ugiha agaciro kandi ukakibungabunga. Ni ingirakamaro kuri wowe, gusa ushobora kutabyerekana, aha niho kugabura biziramo. Uburyo bwiza bwo kugabura bukubiyemo guhagarika, kureba, kumva ndetse no kwiga uwo muntu udasanzwe.

-Kubaka uburyo bufasha mu gukomeza kujya imbere

Ahantu hatera akanyabugabo ni aho tumara umwanya munini twubaka kandi tunereka abo dukunda ko bashoboye kuruta uwo tumara tubatonganya tunabakosora.

Ni aho tubaha agaciro tubavugisha mu cyubahiro. Ahantu hatera akanyabugabo ni aho ubushake bwacu tubushyira mu gusanga abo dukunda bari gukora neza aho kuzishyira mu kubasanga bakora amakosa.

Dushyira imbaraga nyinshi mu kubashima kubera kugera kuri byinshi kuruta uko tubaciraho iteka tukanabahana kubera kutagera neza ku byo twari tubategerejeho.

-Impano y’umujinya wubaka

Ni iki utekereza iyo wumvise umujinya wubaka? Ese umujinya wose ni mubi? Ese ibi byiyumviro bitifuzwa bikanasenya cyane, bishobora gufatwa nk’impano aho kuba igisasu kiregeye?.

Urugo rufite ubuzima ni aho abantu bagaragaza umujinya mu buryo budasenya. Ukuri gutangaje ni uko igihe umuntu yumvise neza umujinya ndetse akaniga kuwugaragaza mu buryo budasenya, ushobora kukubera inshuti ndetse ukakugeza ku cyizere, ibyiyumviro bihebuje n’umubano ukomeye.

Nubwo dushobora kugira ubushobozi buke bwo kwigenzura igihe turakaye, ariko dufite ubushobozi bwuzuye bwo kugena uburyo tugaragaza ubwo burakari.

-Gukuza uburyo bwiza bwo kuganira

Ubushakashatsi bwakozwe mu gihe cy’imyaka 10 bwagaragaje ko abantu babaye mu rushako bishimye batandukanye n’abarubayemo batishimye mu buryo baganira hagati yabo, mu byiyumviro byo kugaragaza ko bumva ibyo babwirwa, kurinda uburyo bunyuzwamo ibiganiro ndetse bukaguma bufunguye, mu kwerekana ko bumva ibyiyumviro bya bagenzi babo ndetse no kumva akamaro ku buryo bwo kuganira hakoreshejwe ibimenyetso.

Kuba uburyo bwiza bwo kuganira butizana, imiryango isobanutse yibikira umwanya uhoraho buri cyumweru kugira ngo wite ku kuganira.

-Kudahamanya: inzira iganisha kubudatana

Abenshi muri twe ntituramenya agaciro ko kudahamanya. Twumva nabi ubushobozi bwabyo ndetse tukaba twabisobanura nk’ibitubangamiye. Kudahamanya ni inzira tunyuramo n’igiciro twishyura ubudatana. Iyo twirinda ukudahamanya tuba turwanya gukura.

Ubutaha mu gihe uhuye no kudahamanya uzagerageze ubu buryo butatu; mbere na mbere intego y’ingenzi yigire iyo kumva mugenzi wawe, fata iminota mike wemere, usesengure ndetse usobanure icyo mutumvikanaho nyuma utege amatwi.

Icya kabiri, ibaze uruhare rwawe mu guteza ikibazo. Abenshi muri twe tworoherwa no kubona uruhare rw’abandi mu kibazo, uko bakeneye guhinduka ndetse n’itandukaniro bakora aho kureba ibitureba. Icya gatatu ni ukwiyemeza.

Muri ibi biganiro Jeanette Kagame kandi yagarutse ku nama 12 zikubiye mu Nyandiko ya Michelle Obama yise ‘Hardcore Truth About marriage’ igaruka k’ukuri umuntu akwiriye kumenya mu mubano w’abashakanye.

Aya masengesho ngarukamwaka abaye ku nshuro ya 25, akaba ari urubuga rwo kuganira ku bikorwa by’umwaka ushize no gushyiraho ingamba zafasha kurushaho gukora neza mu mwaka mushya banasengera igihugu ndetse n’abayobozi bacyo mu nzego zose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .