00:00:00 IGIHE NETWORK KN KINYARWANDA EN ENGLISH FR FRANCAIS

Ibikomere Kwizera yatewe na se wakoze Jenoside, nyina akazira kuvugisha ukuri

Yanditswe na Prudence Kwizera
Kuya 12 July 2022 saa 09:42
Yasuwe :

Kwizera Adidas wo mu Murenge wa Gashora mu Karere ka Bugesera, avuga ko yakuranye ibikomere ku mutima yatewe n’abo mu muryango we barimo se, bagize uruhare muri Jenoside yakorewe Abatutsi mu 1994.

Uwo musore w’imyaka 26 y’amavuko mu buhamya aherutse gusangiza urubyiruko rwiga muri Kaminuza y’u Rwanda ishami rya Huye, yagarutse ku buzima bwe n’uko yavutse akisanga mu muryango w’abakoze Jenoside, ibikomere yagize n’uko yaje kubikira.

Hari mu biganiro byateguwe na Unity Club Intwararumuri bifite insanganyamatsiko igira iti “Ndi Umunyarwanda umurage tugomba guharanira gusigasira no kwimakaza”.

Kwizera yavukiye muri Zaïre [kuri ubu ni Repubulika ya Demokarasi ya Congo] mu 1996 aho ababyeyi be bari barahungiye. Nyuma mu 1998 iwabo baratahutse, se ahita afungwa kubera uruhare yagize muri Jenoside yakorewe Abatutsi.

Ati “Njyewe nk’umwana nkaba nkomoka mu muryango w’abahekuye igihugu kuko data, sogokuru na data wacu, abo bose bagize uruhare mu kwica abo batutsi.”

Yakomeje avuga ko bitari byoroshye kuko yamenye ubwenge asanga se adahari, yabaza mama we akamubwira ko azabimubwira namara gukura ariko nyuma aza kumenya ko afungiye icyaha cya Jenoside yakorewe Abatutsi.

Umunsi umwe yajyanye na nyina gusura se kuri gereza, bagezeyo amubaza impamvu batabana amusubiza ko ari uko yabeshyewe ko yishe Abatutsi muri Jenoside.

Nyina yarozwe azira gutanga amakuru…

Kwizera yavuze ko mu gihe yari mu gahinda k’ibyaha se yakoze bigatuma afungwa akabasiga bonyine, yaje kubura nyina arozwe azizwa gutanga amakuru kuri Jenoside yakorewe Abatutsi.

Ati “Gacaca zitangira mama umbyara yatanze amakuru yahamyaga ibyaha data na bamwe bo mu muryango data akomokamo. Aho niho nakuye igikomere gikomeye cyane kuko naje kuhaburira n’umubyeyi, mama yahise arogwa ava mu buzima.”

Yibuka ko ubwo nyina yari agiye gupfa amwicaye iruhande mu cyumba yamubwiye yamubwiye ukuri ku ifungwa rya se.

Ati “Ambwira ko data data afunzwe azira jenoside yakoze, atabeshyerwa nk’uko abivuga. Icyo gihe data yari afunze akatiye imyaka 25 kuri gereza ya Rilima.”

Icyo gihe ngo nyina yamubwiye ko umuryango yashatsemo ari wo umuhitanye wihimura ko yatanze amakuru ku mugabo we.

Kwizera yumvise bimuyobeye abwira nyina ko azamuhorera ariko uwo mubyeyi aramubuza aramubwira ngo ‘muhungu wanjye si icyo ngutumye ndahari’. Yamusabye kujya hanze agarutse asanga yamaze kwitaba Imana.

Inzangano mu miryango yombi…

Kwizera avuga ko hahise haduka inzangano hagati y’umuryango wo kwa se n’uwo kwa nyina, bituma aba mu rungabangabo abura uruhande ahereramo.

Ati “Umuryango wo kwa mama warambwiraga ngo ‘umwana wacu iwanyu baramwishe’, kwa mama simbashe kujyayo. Kwa papa naho nahagera bakambwira ngo ‘nyoko yadufungishirije umwana n’abavandimwe be’, naho kwisanzura bikaba birabuze.”

Usibye kutisanga mu miryango ye, Kwizera wari ufite imyaka 10 y’amavuko ntabwo yari atuje muri sosiyete kuko yitwaga umwana w’Interahamwe akumva ubuzima bumubihiye ava mu ishuri.

Ati “Ntabwo byari byoroshye kwitwa umwana w’umwicanyi, cyari igisebo gikomeye kuko icyo gihe byahise bikurizamo no kuva mu ishuri.”

Nyuma yagize amahirwe yo gusubira ku ishuri ariko yaba yicaye mu ishuri abandi bana bakamubwira ko ‘ari umwana w’umwicanyi’ bituma atiga neza atangira kugira amanota make kubera kwiga ahangayitse.

Mu 2003 se yafunguwe ku mbabazi z’Umukuru w’Igihugu, aza mu rugo batangira kubana.

Ati “Na data afunguwe nagira ngo ndabimubabjije akambwira ko arengana ko ndi igicucu nka mama.”

Nyuma mu 2006 yongeye gufungwa kubera ibyaha atari yarireze, bituma Kwizera ashaka gucukumbura ngo amenye amateka ya se neza.

Mu muryango wo kwa se ngo yakomeje gufatwa nabi kubera ko babonaga ashaka kumenya ukuri cyane. Mu 2011 se yongeye gufungurwa agaruka mu rugo.

Kwizera yavuze ko mu 2016 yateye intambwe abifashijwemo n’urubyiruko rukomoka mu miryango y’abarokotse Jenoside binyuze mu itsinda bari barashinze mu murenge wa Ririma ryitwa ‘Humura Rwanda’.

Ati “Umwe muri bo yarantumiye njyayo baranyakira njya muri club [itsinda] yabo ntangira gake gake, bya bikomere nari mfite bigenda bishira.”

Nyuma yaho yahuye n’abantu bashaka kongera kumukomeretsa ariko basanga yaramaze gukomera, ahagaze yemye.

Ati “Hari mu gihe cyo kwibuka [Jenoside yakorewe Abatutsi] tugiye kwibuka, umuntu umwe arambaza ngo ‘ese ko abandi bibuka ababo bishwe, wowe uribuka nde?’ Bitewe n‘umutima ukomeye nari maze kugira ndamubwira ngo njyewe iki gihe iyo kigeze nibuka ubunyamaswa, nibuka ubugome, nibuka umutima wo kwanga umuntu ababyeyi banjye n’umuryango nkomokamo bagize bigatuma ndira bitaguma mbabara; ariko nzi neza ko bitazasubira.”

Kwizera avuga ko yanyuze mu buzima bukomeye ariko iryo tsinda ry’urubyiruko ndetse na bimwe mu biganiro ku bumwe n’ubwiyunge byamufashije kwiyakira no gukira ibikomere.

Ati “Iyo bitaba ibyo ntabwo mba ndi hano ntabwo mba nkomeye ariko ndakomeye kandi nzi ko bitazongera.”

Kwizera Adidas ni umwana wa gatatu muri batandatu bavukana. Asaba urubyiruko kunga ubumwe rwirinda amacakubiri, bagafatanya kubaka igihugu cyiza.

Asaba n’ababyeyi kujya babwiza ukuri abana babo birinda kugoreka amateka yaranze igihugu.

Kwizera Adidas [hagati] yatanze ubuhamya bw'uko yusanze abyarwa n'umubyeyi wakoze Jenoside
Urubyiruko rwiga muri Kaminuza y'u Rwanda Ishami rya Huye rwakurikiranye ubuhamya bwa Kwizera Adidas

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .