00:00:00 IGIHE NETWORK KN KINYARWANDA EN ENGLISH FR FRANCAIS

Ibihumbi 60 bararahiye: Ibyakozwe n’urubyiruko rushamikiye kuri FPR Inkotanyi mu myaka itanu

Yanditswe na Akayezu Jean de Dieu
Kuya 23 Ukuboza 2022 saa 11:17
Yasuwe :

Ku wa 18 Kanama 2017, nibwo Perezida Paul Kagame yarahiriye kuyobora u Rwanda muri Manda ya Gatatu y’imyaka irindwi [2017-2024] atangira urugendo rushya rwo kugeza Abanyarwanda ku iterambere agendeye ku byo yabemereye ubwo yiyamamazaga.

Kuva icyo gihe Abanyamuryango ba FPR Inkotanyi bahise bajya mu ngamba, batangira gusohoza ibyo basezeranye kugeza ku Banyarwanda. Urubyiruko narwo ntirwasigaye.

Mu gihe habura imyaka ibiri ngo Abanyarwanda bagere mu 2024, ibikorwa birivugira ndetse by’umwihariko urubyiruko rukomeje kuba ku ruhembe mu guteza imbere igihugu.

Ibikorwa byagezweho n’urubyiruko, byamurikiwe mu Nama Nkuru y’Urugaga rw’Urubyiruko rushamikiye ku Muryango FPR Inkotanyi, ku Cyumweru tariki 18 Ukuboza 2022.

Hari mu kiganiro ku byagezweho n’urubyiruko mu myaka itanu ishize ndetse no kureba ibiteganyijwe gukorwa mu myaka ibiri iri imbere. Hibanzwe ku nkingi eshatu zirimo imibereho myiza, ubukungu n’imiyobore

Ni ikiganiro cyayobowe na Perezida w’Urugaga rw’Urubyiruko rushamikiye ku Muryango FPR Inkotanyi mu Ntara y’Amajyaruguru, Robert Byiringiro.

Cyari kirimo Perezida w’Urugaga rw’Urubyiruko muri FPR Inkotanyi ku rwego rw’igihugu Tuyisenge Joseph, Umuyobozi Mukuru ushinzwe Iterambere ry’Urubyiruko muri Minisiteri y’Urubyiruko n’Umuco, Tetero Solange ndetse na Komiseri Bayisenge Eric.

Mu myaka itanu ishize Urugaga rw’Urubyiruko rushamikiye kuri FPR Inkotanyi rwubakiye abatishoboye inzu 878 ndetse hasanwa 765.000 harimo 51.200 zakurungiwe hubakwa n’uturima tw’igikoni 919.063

Ni mu gihe rwubakiye abatishoboye ubwiherero 15.787. Binyuze muri gahunda y’umuganda rusange wagiye ukorwa n’urubyiruko, hasanywe ibibuga 712.

Hakozwe ubukangurambaga 18.386 bugamije gukangurira abana kudata ishuri.

Umuyobozi wa Komisiyo y’Imibereho myiza mu Rugaga rw’Urubyiruko rushamikiye kuri FPR Inkotanyi, Bayisenge Eric yavuze uko urubyiruko rwitwaye mu rwego rw’imibereho myiza y’abaturage

Ati ‘‘Harimo n’ubundi ibikorwa urubyiruko rukora umunsi ku munsi biciye mu miganda ndetse n’izindi gahunda bahuriramo, ibyo twakita n’ibikorwa by’amaboko.’’

Umuyobozi Mukuru ushinzwe Iterambere ry’Urubyiruko muri Minisiteri y’Urubyiruko n’Umuco, Tetero Solange yavuze ko urubyiruko rwashyiriweho uko rubona akazi, arushimira ko rwakoresheje ayo mahirwe rugakura amaboko mu mifuka.

Ati ‘‘Twakoze ibikorwa byinshi mu cyiciro cy’urubyiruko bigamije guteza imbere ubukungu bw’urubyiruko cyane cyane hibandwa ku kubashakira imirimo.’’

Perezida w’Urugaga rw’Urubyiruko muri FPR Inkotanyi ku rwego rw’igihugu, Tuyisenge Joseph, yavuze ko haguwe Umuryango FPR Inkotanyi hinjizwamo urundi rubyiruko.

Ati ‘‘Muri iyi myaka itanu twabashije kwigisha, duhugura kandi twinjiza abanyamuryango by’urubyiruko basaga gato ibihumbi 177.’’

Mu rubyiruko ibihumbi 177 byinjijwe mu Murango FPR Inkotanyi, abagera ku bihumbi 60 nibo bamaze kurahizwa”.

Ibikorwa byagizwemo uruhare n’Urubyiruko rwa FPR Inkotanyi mu myaka itanu ishize

Muri iyi myaka itanu ishize, Urugaga rw’Urubyiruko rushamikiye kuri FPR Inkotanyi rwakoze cyane ibikorwa by’ubukangurambaga bugamije gukumira no kurwanya inda ziterwa abangavu.

Hakozwe ubukangurambaga 26.683. Ni ibikorwa byitabiriwe n’urubyiruko rusaga 433.757. Muri ubu bukangurambaga kandi urubyiruko rwashishikarijwe kwirinda ibiyobyabwenge, kurwanya ihohoterwa rishingiye ku gitsina n’ibindi.

Hashinzwe amatsinda ashinzwe kurwanya ibiyobyabwenge mu Tugari 1.132, aho kuri ubu agizwe n’abanyamuryango 118.971.

Aya matsinda kandi yagejejwe no mu mashuri 94 yo hirya no hino mu gihugu aho agizwe n’abanyamuryango 8.486.

Urubyiruko kandi rwatangije filime y’uruhererekane ya ‘Ejo si Cyera’ kuri ubu uduce 48 nitwo tumaze gutambuka kuri radio zitandukanye na televiziyo.
Hakozwe ubukangurambaga 5.543 harimo siporo rusange 2.882, no kurwanya indwara zitandura.

Gufasha imishinga y’urubyiruko

Imishinga yafashijwe kubona igishoro ni 25.837, harimo imishinga 24.561 yafashijwe n’Ikigega gitera inkunga imishinga y’Iterambere , BDF ku nguzanyo ya 46.813.516.844 Frw n’ingwate ya 16.998.489.737 Frw nayo yatanzwe na BDF.

Hatewe inkunga kandi ibigo by’urubyiruko 153 bikora mu bijyanye no gufata neza imihanda y’ibitaka. Imishinga 156 yahawe inkunga binyuze mu kigega cy’ingoboka cyihariye cy’urubyiruko aho yahawe miliyoni 500Frw.

Mu mirimo 942.319 imaze guhangwa mu myaka itanu ya NST1, iy’urubyiruko ingana na 797.546 bingana na 84%

Abanyarwanda bose bitabiriye ‘‘Ejo Heza’’ bangana na 2.267.303 muri bo ni urubyiruko rungana na …, abizigama muri ‘‘Ejo Heza’’ ni 19%.

Ubwuzigame bwose bw’Abanyarwanda ni miliyari 29,04, urubyiruko ni miliyari 4.4

Guteza imbere imyuga n’ubumenyingiro mu rubyiruko

Binyuze muri gahunda yo guteza imbere impano z’urubyiruko, hashyizweho gahunda 130 za ArtRwanda-Ubuhanzi, kuri miliyoni 350 Frw. Hashyizweho amarushanwa 148 mu mashuri y’imyuga n’ubumenyingiro (TVET Challenge).

Hashyizweho gahunda ya Igira ku Murimo yitabiriwe n’urubyiruko 32.224. Hashyizweho amashuri y’imyuga 471 avuye kuri 350 yariho muri 2019, aboneka mu Mirenge 299. Hubatswe amashuri mashya 87 mu Mirenge itari ifite ishuri na rimwe rya TVET.

Perezida w’Urugaga rw’Urubyiruko rushamikiye ku Muryango FPR Inkotanyi mu Ntara y’Amajyaruguru, Robert Byiringiro yavuze ko imbaraga z'urubyiruko ari umusingi mu kubaka igihugu
Perezida w’Urugaga rw’Urubyiruko muri FPR Inkotanyi ku rwego rw’igihugu Tuyisenge Joseph atanga ikiganiro
Umuyobozi wa Komisiyo y’Imibereho myiza mu Rugaga rw’Urubyiruko rushamikiye kuri FPR Inkotanyi, Bayisenge Eric avuga ko imibereho myiza y'abaturage iza ku isonga
Umuyobozi Mukuru ushinzwe Iterambere ry’Urubyiruko muri Minisiteri y’Urubyiruko n’Umuco, Tetero Solange, yerekanye ko urubyiruko rwahawe inguzanyo rukiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .