00:00:00 IGIHE NETWORK KN KINYARWANDA EN ENGLISH FR FRANCAIS

Ibihugu bya Afurika byasabwe kongera ingengo y’imari ishyirwa mu buhinzi

Yanditswe na Akayezu Jean de Dieu
Kuya 9 Ukuboza 2022 saa 07:39
Yasuwe :

Abadepite bagize Ihuriro riharanira Iterambere ry’Ubuhinzi n’Imirire muri Afurika y’Iburasirazuba, basabye guverinoma z’ibihugu kongera ingengo y’imari zigenera ubuhinzi n’indi mirimo ishamikiye ku buhinzi n’ubworozi kuko aribyo bizatuma abaturage bihaza mu biribwa bakanaca ukubiri n’imirire mibi.

Ni ibyatangarijwe mu Nama Mpuzamahanga yiga ku kwihaza mu biribwa no kurandura imirire mibi muri Afurika y’Iburasirazuba yateguwe ku bufatanye n’ Ishami ry’Umuryango w’Abibumbye ryita ku buhinzi, FAO.

Iyi nama izwi nka EAPAFSN4 [General Assembly of the Eastern Africa Parliamentary Alliance for Food Security and Nutrition] iramara iminsi itatu iri kubera i Kigali.

Yafunguwe ku mugaragaro kuri uyu wa 8 Ukuboza 2022, na Perezida w’Umutwe w’Abadepite mu Nteko Ishinga Amategeko y’u Rwanda, Mukabalisa Donatille.

Yavuze ko inama nk’iyi ari andi mahirwe mu gushakira umuti ikibazo cy’igabanuka ry’ibiribwa ryugarije isi n’akarere u Rwanda ruherereyemo.

Ati “Kuri twebwe aba ari umwanya mwiza wo kuganira n’abagize inteko zishinga amategeko zo mu bindi bihugu kugira ngo turebe ibibazo bihari, turebe n’ibisubizo twashaka nk’abahagarariye abaturage. Ubwo rero ni umwanya mwiza wo kugira ngo abantu baganire barebe icyakorwa kugira ngo abantu babashe kubona imirire myiza.”

Depite Mukabalisa yavuze ko u Rwanda ruhora ruharanira ko abaturage barwo bihaza mu biribwa nk’uko biri mu ntego z’iterambere rirambye. Yasabye uruhare rw’Abadepite mu gusaba za guverinoma kongera ingengo y’imari igenerwa ubuhinzi.

Ati “Nk’uko bimeze ku Isi muri rusange, ibihugu byacu by’umwihariko biri guhura n’ibibazo birimo bitandukanye. Ibiganiro byateguwe bifite intego yo gushora imari mu buhinzi kugira ngo twihaze mu biribwa muri Afurika y’Iburasurazuba, abadepite nitwe dukwiye kugira uruhare kugira ngo amafaranga y’ingengo y’imari agenerwa ubuhinzi yiyongere.”

Umuyobozi Mukuru w’iri huriro, Depite Abdi Ali Hasaan avuga ko abadepite n’abasenateri bashobora kugira uruhare rufatika mu mpinduka zikenewe kugira ngo abatuye umugabane wa Afurika bihaze mu biribwa.

Yagize ati ’’Ni yo mpamvu turimo gushishikariza buri wese mu bagize inteko zishinga amategeko ngo akoreshe ububasha afite mu kuzamura ubushobozi bw’abaturage mu kubona ibiribwa bihagije no kurwanya imirire mibi,binyuze mu bufasha minisiteri z’ubuhinzi n’ubworozi ziha abahinzi ,abatanga serivisi z’ubuhinzi ndetse n’abongerera agaciro umusaruro w’ubuhinzi ’’.

Umuyobozi wa FAO mu Karere ka Afurika y’Iburasirazuba, Dr Jean -Léonard Touadi avuga ko ihungabana ry’ubukungu riri ku isi muri iki gihe ryatumye harushaho gutekerezwa ku ruhare rw’inzego zinyuranye mu guhangana n’ibituma abantu batihaza mu biribwa kandi ari ryo shingiro ry’iterambere n’imibereho y’abatuye isi.

Ati ’’Tugomba guhanga udushya,duhereye ku myanzuro ifatirwa mu nteko zishinga amategeko ibereye abaturage, FAO isanga uruhare rw’inteko zishinga amategeko ari ingenzi cyane cyane mu gihe baba bemeje ingengo y’imari ikwiye ku bikorwa guverinoma ziteganiriza urwego rw’ubuhinzi ,ariko kandi hagashyirwaho uburyo inzego zose zirebwa n’ubuhinzi n’ubworozi zitanga umusaruro uhagije.’’

N’ubwo u Rwanda rwakomeje kugenda rwongera amafaranga Leta igenera urwego rw’ubuhinzi,bamwe mu baturage basanga hagikenewe kongera imbaraga no kunoza politiki n’ingamba z’ubuhinzi kugira ngo ikibazo cy’igabanuka ry’ibiribwa kigabanuke.

Biteganijwe ko abitabiriye iyi nama bazasuzumira hamwe ibirebana n’ishyirwamubikorwa ry’umwanzuro w’abakuru b’ibihugu byo ku Mugabane wa Afurika bemeje ko ingengo y’imari ibi bihugu bigenera ubuhinzi itazongera kujya munsi ya 10%.

Iyi nama yitabiriwe n'abadepite bavuye hirya no hino mu karere
Ibihugu bitandukanye birahagarariwe muri iyi nama
Perezida w’Umutwe w’Abadepite mu Nteko Ishinga Amategeko y’u Rwanda, Mukabalisa Donatille yasabye Abadepite guhuza ijwi bagasaba ko ingengo y'imari igenerwa ubuhinzi yongerwa
Abitabiriye iyi nama bafashe ifoto y'urwibutso
Umuyobozi wa FAO mu Karere ka Afurika y'Iburasirazuba, Dr Jean -Léonard Touadi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .