Ibihugu 11 byahurijwe i Gishari higwa ku kurwanya ihohoterwa muri Afurika y’Uburasirazuba

Yanditswe na IGIHE
Kuya 25 Kamena 2019 saa 08:14
Yasuwe :
0 0

Abantu 26 baturutse mu bihugu 11 bya Afurika bateraniye mu Ishuri rya Polisi rya Gishari rihereye mu Karere ka Rwamagana ahatangijwe amahugurwa y’ibyumweru bibiri agamije kurwanya ihohoterwa rishingiye ku gitsina mu Karere ka Afurika y’Uburasirazuba.

Aya mahugurwa ahurije hamwe inzego z’igisirikari, polisi n’abasivili, yatangijwe ku wa 24 Kamena 2019.

Yateguwe n’Ingabo z’Umuryango wa Afurika y’Uburasirazuba zihora ziteguye gutabara aho rukomeye (Eastern Africa Standby Force -EASF), aterwa inkunga na Leta ya Norvège.

Abayitabiriye barimo abaturuka mu Rwanda, Comoros, Ethiopie, Kenya, Seychelles, Somalie, Sudan, Uganda n’ibindi.

Aya mahugurwa agamije kurebera hamwe ibitera ihohoterwa rishingiye ku gitsina, kwigira hamwe no guhanahana ubumenyi n’uburyo iperereza ryakorwa ngo hakumirwe ihohoterwa.

Umuyobozi w’Ishuri rya Polisi rya Gishari, CP Vianney Nshimiyimana yavuze ko aya mahugurwa ari urubuga rwiza rwo kuganiriramo ibibazo bitera ihohoterwa rishingiye ku gitsina n’ibyaha by’inzaduka hagamijwe kubahiriza amategeko.

Yagize ati “Aya mahugurwa ni ay’agaciro ku Rwanda no ku bindi bihugu birajwe ishinga no guhangana n’ibibazo by’ihohoterwa no kubungabunga amahoro n’umutekano w’ababituye.”

CP Nshimiyimana yavuze ko aya mahugurwa ari umurongo uhamye wo kubaka iterambere n’ubushobozi bufasha ingabo za EASF mu kunoza ibikorwa n’inshingano zazo za buri munsi.

Yagize ati “Ni igisubizo cy’imbogamizi mwahuraga na zo mu gukora iperereza no gukumira ibyaha bigaragara mu bihugu byinshi mukoramo ibikorwa byo kubungabunga amahoro.”

ACP Dinah Kyasiimire yagaragaje ko ihohoterwa rishingiye ku gitsina rigira ingaruka ku warikorewe, umuryango we n’igihugu ndetse rikadindiza n’iterambere.

Aya mahugurwa abaye ku nshuro ya mbere, azamara ibyumweru bibiri, akaba azafasha mu gukemura ibibazo by’ihohoterwa bikunze kugaragara mu bihugu byo muri Afurika y’Uburasirazuba.

Aya mahugurwa azamara ibyumweru bibiri
Abantu 26 baturutse mu bihugu 11 bateraniye i Gishari mu mahugurwa agamijwe kwiga ku kurwanya ihohoterwa muri Afurika y’Uburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza