Ibigo bya Leta n’ibyigenga bigiye guhabwa imisozi bizateraho amashyamba

Yanditswe na Iradukunda Serge
Kuya 27 Ugushyingo 2020 saa 03:43
Yasuwe :
0 0

Minisitiri y’Ibidukikije yatangaje ko ibigo bya Leta, ibyigenga n’imiryango itandukanye bigiye guhabwa imisozi bizateraho amashyamba bikayakurikirana kugeza akuze hagamijwe gukomeza kwirinda ko amashyamba acika no gukomeza kongera ingano yayo.

Ibi byagarutsweho mu nama yabaye kuri uyu wa 27 Ugushyingo ihuza Minisiteri y’Ibidukikije, ibigo biyishamikiyeho ndetse n’ibigo bitandukanye bikoresha ibicanwa, mu rwego rwo kureba uko harushaho gukoreshwa izindi ngufu mu gucana zitangiza ibidukikije.

Muri iyi nama Minisiteri y’Ibidukikije yagaragaje ko nibura buri cyumweru mu Mujyi wa Kigali hinjira imifuka y’amakara arenga toni ibihumbi 62, ziba zavuye kuri hegitari 400 z’amashyamba.

Minisitiri w’Ibidukikije, Dr Mujawamariya Jeanne d’Arc, yavuze ko bafashe iki cyemezo nyuma yo kubona ko hari imisozi myinshi n’inkombe z’imigezi zambaye ubusa, ndetse n’umubare munini w’amashyamba yamaze gusaza akeneye gusazurwa.

Dr Mujawamariya yavuze ko aka kazi ko gutera amashyamba Leta itari kukifasha yonyine aricyo cyatumye yegera ibigo bitandukanye kandi nabyo biza kubyakira neza.

Ati “Twiyemeje kwegera ibyo bigo navuze, ari ibigo by’abikorera ari sosiyete sivile tukumvikana ko tugiye kubaha aho batera amashyamba, icyadushimishije ni uko bose babyishimiye. Ni igitekerezo cyavuye mu kureba uko imisozi yacu isa.”

Yakomeje agira ati “Ntabwo Abanyarwanda bagomba kuba bafite imisozi yambaye ubusa, ntabwo bidusa; niyo mpamvu tugomba kugira imisozi iriho amashyamba nicyo kibereye Abanyarwanda, ni nayo mpamvu twashyizeho izo ngamba.”

Minisiteri y’Ibidukikije yavuze ko mu byumweru bibiri iraba yashyize hanze gahunda igaragaza uko ibi bigo bizagenda bitera amashyamba n’aho bizayatera.

Ni gahunda biteganyijwe ko izakorwa muri iki gihe cyo gutera amashyamba (kuva mu Ukwakira kugeza muri Gashyantare 2021), gusa ikazakomeza uko buri mwaka hazajya hagera igihe cyo gutera amashyamba.

Ikigo runaka kizajya gihabwa umusozi wo guteraho ishyamba, kirikurikirane kugeza rikuze ubundi rishyikirizwe Leta.

Ku ikubitiro hari ibigo byatangiye iyi gahunda birimo Banki ya Kigali uyu munsi yateye ishyamba mu Karere ka Rulindo.

Mu 2019 u Rwanda rwesheje umuhigo rwari rwarihaye wo kongera amashyamba akagera kuri 30% by’ubuso bw’igihugu, dore ko ubu ageze kuri 30,4%, gusa hari ikibazo cy’uko hakiri amashyamba y’abaturage afashwe nabi.

Mu rwego rwo gukomeza kurengera amashyamba, Leta muri gahunda yayo y’imyaka irindwi iteganya ko 80% by’amashyamba yayo azaba acunzwe n’abikorera mu 2024. Kugeza ubu ubu hegitari 21655 z’amashyamba ya Leta, zingana na 35,58% zimaze kwegurirwa abikorera.

Ibigo bya Leta n'iby'abikorera bigiye guhabwa imisozi bizateraho amashyamba bikanayakurikirana
Minisitiri Dr Mujawamariya Jeanne D'Arc yavuze ko mu byumweru bibiri buri kigo kiraba cyahawe aho kigomba gutera amashyamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .