Ibigo by’imari byasabwe kwitabira kwakira urubyiruko rwimenyereza umurimo

Yanditswe na Habimana James
Kuya 18 Gashyantare 2020 saa 07:22
Yasuwe :
0 0

Ikigo cy’Igihugu cy’Iterambere, RDB, cyasabye ibigo by’imari mu gihugu kwitabira kwakira urubyiruko rushaka kwimenyereza umurimo, nka gahunda ya guverinoma y’u Rwanda yo kugira urubyiruko rwize ariko runafite ubumenyi ngiro mu byo rukora.

RDB yabitangaje kuri uyu wa Kabiri tariki 18 Gashyantare 2020, ubwo yahuzaga abafatanyabikorwa bafatanyije muri gahunda ifasha urubyiruko kwiga umurimo biciye cyane cyane mu bigo by’imari.

Iyi nama yahuje Ihuriro ry’ibigo by’imari iciriritse mu Rwanda (AMIR), ikigo gishinzwe amahugurwa y’amakoperative, ibigo by’imari iciriritse ndetse na ba rwiyemezamirimo, RICEM, n’Umuryango wigenga w’Abadage ugira uruhare mu guteza imbere ibigo by’imari biciriritse, SBFIC.

Kugeza ubu ibigo by’imari 457 nibyo byemewe na Banki Nkuru y’u Rwanda, muri ibi ibirenga 95% bikaba biri muri AMIR.

RDB ivuga ko kuba ibi bigo ari byinshi, bisabwa no kuba byatanga umusanzu wabyo mu kwakira urubyiruko rwimeyereza umurimo, cyane ko nabyo ubwabyo biba byongera ubushobozi bw’abazabikoramo ejo.

Umuyobozi w’ishami rishinzwe guteza imbere ibikorwa by’umurimo muri RDB, Ngoboka François, yavuze ko impamvu bahuje ibi bigo ari uko akenshi usanga urubyiruko ariho rusaba kujya kwimenyereza umurimo, ibi bigo nabyo bigasaba muri RDB kubiha abo bantu.

Avuga ko iyo aba bantu bashaka kwimenyereza bageze muri ibi bigo hari ubumenyi ngiro baba badafite, ibi bikaba aribyo bisaba ko inzego zose zikorana ku buryo bahavana ubumenyi bwuzuye.

Yagize ati “Yego hari ibyo baba bazi ariko baba bagiye mu mwuga, bisaba ko cya kigo cy’imari kigira umuntu uberekera ibyo bakora, twabahurije hamwe kubera uruhare rwa buri kigo kugira ngo gahunda igende neza.”

Ibigo by’imari bisabwa gutera ingabo mu bitugu leta

Uyu muyobozi avuga ko nubwo RDB binyuze muri ngengo y’imari ya leta hari icyo bagenera abo bantu barimo kwimenyereza, ngo hari n’ibigo by’imari bibafasha mu kubona amafaranga bakoresha mu rugendo, agasaba ko n’ibindi bigo byabikora.

Yagize ati “Icyo dusaba ibigo by’imari ni ukwitabira uburyo bwo gufasha urubyiruko kwimenyereza umurimo kuko ubumenyi bwose ntabwo wabubonera mu ishuri, babakire kandi babafashe, no mu gihe babonye abakora neza aribo baheraho mu kubona akazi kandi banabafashe mu buryo bwo kuborohereza.”

Umuhuzabikorwa w’Umushinga SBFIC, Maria Knappstein, agaragaza ko kuva mu 2009 bari mu Rwanda aho batangiye bakora mu mishinga itandukanye, irimo kubakaba ubushobozi bw’ibigo by’imari bafayanyije na AMIR.

Avuga ko muri iyi gahunda yo kongerera urubyiruko ubushobozi, intego yabo ari uko ibi bigo by’imari bizagira abakozi bafite ubumenyi mu gihe kiri imbere.

Ati “Uru rubyiruko rugira igihe cyo gukorera mu bigo ariko bagira n’igihe cyo kwiga, tureba kandi niba koko ibyo babaha bifitanye isano n’ibikenewe, tukabakurikirana kugeza basoje ayo masomo.”

Uyu muyobozi avuga ko kongerera ubushobozi urubyiruko uretse kuba bizagabanya ubushomeri mu gihugu, bizanafasha ibigo by’imari kuzagira abakozi bafite ubumenyi buhagije.

Umuyobozi w’Ihuriro ry’ibigo by’imari iciriritse mu Rwanda AMIR, Nkuranga Aimable, avuga ko iyi gahunda ifasha abantu barangije amashuri ku buryo ibyo bize mu magambo, babihuza n’ibyo bakora mu kazi.

Ati “Abantu bose binjiye muri iyi gahunda babanza kugira amasomo bafata mu ishuri akaba agize 20%, nyuma bakamara ikindi gihe kingana na 80% mu kazi bashyira mu bikorwa bya bindi baba bize mu ishuri, ibi bituma umuntu ahindukamo umukozi uzi akazi kandi wumva neza ibyo yize akabihuza n’ibyo mu kazi.”

Akomeza agira ati “Ibigo by’imari tubisaba kwitabira gufasha uru rubyiruko kuko aba ni abantu barangije Kaminuza kandi basobanukiwe, iyo baje hari ibyo bafasha n’abakozi basanzwe mu kazi.”

Umuyobozi Mukuru wa RICEM, Dr Mukulira Olivier, avuga bo uruhare rwabo ari ugutegurira integanyanyigisho ifasha abarimu, no gutanga aho abahugurwa bahugurirwa, ndetse no gukurikirana ireme batanga.

Ati “Akenshi usanga abarangije kwiga ibyo bize bidahuye n’ibyo bakora, biba bisaba gutangira bushyashya, iyi gahunda aho ibera nziza ni uko bagira igihe bamara mu ishuri bakagira n’igihe bamara mu bigo by’imari, ibyo bize mu magambo bakagira n’igihe cyo kubikoresha.”

Umuyobozi Mukuru wa Goshen Finance Ltd, Musangamfura Ignace, we yagize ati “Buri mwaka twakira abantu bashaka kwimenyereza umwuga, aba baba barimo abarangije amasomo ariko hakaba n’abandi bamaze igihe barangije kwiga mu gihe kirekire, turabakurikirana bakabona ubumenyi buhagije.”

Yavuze ko uretse ubufasha bw’amafaranga RDB igenera aba baba bimenyereza umwuga, nabo babongereraho ibihumbi 50 bya buri kwezi ndetse n’itike ibafasha kuko baha agaciro ibyo bakora.

Abantu batandukanye bitabiriye gahunda yo gushaka uko abantu barangije Kaminuza bafashwa kwimenyereza
Abayobozi batandukanye basabwe kwakira urubyiruko rubagana
Abayobozi mu bigo by'imari batanze ibitekerezo by'uburyo bakwakira urubyiruko rushaka kwimenyereza
Abayobozi mu bigo by'imari biciriritse bitabiriye iki gikorwa
Abayobozi muri SBFIC bitabiriye iyi nama
Bamwe mu bahuguwe bagiye bavuga ko bahavana ubumenyi bwinshi
Umusangiza w'amagambo mu gikorwa RDB yakiriyemo ibigo bitandukanye bifasha mu gutanga ubumenyi mu barangije Kaminuza
Umuhuzabikorwa w’Umushinga SBFIC, Maria Knappstein, avuga ko mu byo bakora harimo kongerera ubushobozi ibigo by'imari biciye muri AMIR
Umuyobozi Mukuru wa Goshen Finance Ltd, Musangamfura Ignace, avuga ko ibigo by'imari bifite inshingano yo gufasha abashaka kwimenyereza umwuga
Umuyobozi Mukuru wa RICEM, Dr Mukulira Olivier, avuga bo uruhare rwabo ari ugutegurirwa integanyanyigisho ifasha abarimu
Umuyobozi w'ishami rishinzwe guteza imbere ibikorwa by'umurimo muri RDB, Ngoboka François yavuze ko ibigo by'imari bikwiye kugira ubushake bwo gufata abashaka kwimenyereza umwuga
Umuyobozi w’Ihuriro ry'ibigo by'imari iciriritse mu Rwanda AMIR, Nkuranga Aimable, avuga ko iyi gahunda ifasha abantu barangije amashuri ku buryo ibyo bize mu magambo, babihuza n’ibyo bakora mu kazi
Umuyobozi wa AMIR avuga ko ibigo by'imari bikwiye kugira umuco wo gufasha abarangije kwiga
Umukozi wa Minisiteri y'Abakozi ba Leta n'Umurimo ushinzwe guteza imbere umurimo, Mwambari Faustin ni imwe mu batanze ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .