00:00:00 IGIHE NETWORK KN KINYARWANDA EN ENGLISH FR FRANCAIS

Ibigo bikomeje gukerensa umutekano w’ikoranabuhanga byaburiwe

Yanditswe na Rabbi Malo Umucunguzi
Kuya 26 May 2022 saa 08:42
Yasuwe :

Muri Gashyantare uyu mwaka, uruganda rwa mbere ku isi rukora imodoka rwo mu Buyapani, Toyota, rwatangaje ko rwahagaritse imirimo nibura umunsi umwe, kubera ibitero by’ikoranabuhanga byibasiye kimwe mu bigo birugemurira ibikoresho byinshi rwifashisha.

Ibyo bitero byagabwe kuri Kojima Industries, byatumye Toyota nibura ihomba imodoka zigera mu 13,000.

Uretse ku nganda z’ubucuruzi, virus izwi nka Stuxnet yaje gutegwa muri flash disc mu biro by’abatunganyaga ingufu za kirimbuzi mu ruganda rwa Natanz muri Iran mu 2010, umwe mu bakozi ayicometse kuri mudasobwa ye, virus zijya mu byuma byatunganyaga uranium.

Yaje gutahurwa n’abahanga bo muri Belarus, ariko yishe imashini nyinshi, ikoma mu nkokora imishinga ya Iran yo kwikungahazaho ingufu kirimbuzi. Hari amakuru ko iyo virus yaba yarakozwe na Amerika hamwe na Israel.

Izo ni zimwe mu ngero umwalimu mu bijyanye n’umutekano w’ikoranabuhanga muri Carnegie Mellon University, Dr. Jema David Ndibwile, ashingiraho avuga ko ibigo bititondeye ikoranabuhanga muri iki gihe bishobora kuyatamo.

Kuri uyu wa Gatatu yaganirizaga abakora mu bijyanye n’umutekano w’ikoranabuhanga, mu nzego zitandukanye mu Rwanda.

Yakomeje ati "60% by’ibigo bito bifunga imiryango nyuma y’amezi atandatu bimaze kwinjirirwa mu makuru (hacked). Ikigo gishobora kuba ari gito, atari ukuvuga ngo kujya mu mabanga yabo hari icyo uri buvanemo mu buryo bw’amafaranga, ariko hari nk’abanyeshuri babikora bishimisha, bashaka kureba ko ibyo biga bikora."

Ibyo ngo bisaba ibigo guhora byiteguye, kuko kwinjirirwa mu makuru bishobora guteza ibihombo mu mafaranga, no gutererwa icyizere mu bakiliya bakabona ko ikigo cyawe kitizewe.

Ibyo kandi ngo bisaba kubaka ubumenyi mu bijyanye n’umutekano w’ikoranabuhanga, ababikunda bagatangira kubyiga ari abana, bakagira ubumenyi buhambaye kubw’abinjira mu mabanga y’ibindi bigo, bo bakabukoresha mu buryo bw’ubwirinzi.

Ibyo ngo bigomba kujyana no gufunga ibyuho usanga muri porogaramu ibigo bikoresha, ari nabyo bitanga urwaho ku bashaka kwinjira mu makuru rwihishwa.

Dr Ndibwile avuga ko mu bindi byo kwitwararika harimo kwirinda gufungura ubutumwa bwose umuntu abonye igihe akoresha ikoranabuhanga cyangwa atari no kurikoresha.

Hari ubwo usanga uwabwohereje yabuherekeresheje virus, wabukandamo bakabanza kukubaza ibintu byinshi, uko ubisubiza akaba ari nako virus zinjira, ikizwi nka phishing.

Umuyobozi ushinzwe gukurikirana ibyateza ingorane mu mutekano w’ikoranabuhanga muri Banki ya Kigali, Anatole Gahongayire, yavuze ko kugira ngo umutekno w’ikoranabuhanga ucungwe neza bisaba guhora umuntu yiyungura ubumenyi, kandi agahora ari maso.

Ati "Ni ngombwa gukora cyane kuko usanga n’ibitero by’ikoraabuhanga bikunda kuza mu masaha y’igicuku, ugomba guhora uri maso kandi ugahora wiyungura ubumenyi, bugendana n’ibikorwa aho kuba amagambo."

Uzaruharanira Marc uyobora Broadcasters of ICT yategye iri huriro, yabwiye IGIHE ko batangiye kuritegura mu 2019, bahuza abakora mu bijyanye n’umutekano w’ikoranabuhanga mu bigo bya Leta, ibyigenga, amashuri makuru za za kaminuza.

Abo bose bicara hamwe bakagira ku bigendanye n’umutekano w’ikoranabuhanga rikomeje kwaguka, rikagendana n’ibyago bishobora kurishingiraho.

Ati "Kuri iyi nshuro turimo turabahuriza hamwe kugira ngo dushishikarize ibigo bya leta n’ibyigenga buryo bikwiye kugira umuco umutekano w’ikoranabuhanga mu bigo byabo, ndetse tukongera umubare w’abagore n’abakobwa mu mirimo y’umutekano w’ikoranabuhanga."

Kuri uyu wa Gatatu abakobwa n’abagore 15 basoje amasomo yari amaze ibyumweru bitatu, ndetse intego ni uguhugura 500.

Bahugurwa ku buryo bwo kureba ibibazo byaba biri muri systems z’ikoranabuhanga bakoresha, bishobora guha urwaho abajura, bakamenya n’uburyo bwo kuziba ibyo byuho.

Uzaruharanira yavuze ko uretse n’ibigo, n’umuturage ashobora kugwa mu mutego utuma ategeza ibikoresho bye abajura mu by’ikoranabuhanga.

Mu buryo bw’ibanze, ni uko igikoresho kigomba kugira anti-virus, kandi umuntu akirinda gutanga amakuru ku wo atizeye.

Ati "Niba ukoresha ikoranabuhaga ryo guhererekanya amafaranga, menya ko ariho umuntu ashobora kwinjirira akaba yagutwara amafaranga yawe. Muri cyo gihe tubabwira ko niba bagiye gukoresha ikoranabuhanga, badakoresha umubare w’ibanga buri muntu wese yatekereza ngo awukoreshe."

Ubundi buryo abantu bakwiye kwitondera, ni igihe bohererezwa nk’ubutumwa kuri email mu mazina y’umuntu cyangwa ikigo ariko hakoreshejwe email mpimbano, umuntu akaba yakwihutira kuvufungura.

Yakomeje ati "Tubwira umuturage ko ubutumwa bwose yakiriye agomba kwitonda, akareba niba buturutse ahantu hizewe. Ubutumwa bwose abonye ntiyumve ko ari ingenzi kuri we, kuko bwinshi usanga harimo ibitero by’ikoranabuhanga."

Umuhoza Marie Grace ukora muri Banki ya Kigali wahuguwe ku mutekano w’ikoranabuhanga, yavuze ko nka banki baharanira gukaza umutekano, nk’abantu babika amakuru y’abakiliya ndetse n’amafaranga.

Ati "Abagaba ibitero mu ikoranabuhanga bashobora gukoresha ayo makuru bakaba bakwiba banki, kandi kwiba banki ni ukwiba abaturage."

Nk’ahantu hari amafaranga, ngo bahora bagenzura ibitero by’ikoranabuhanga mu rwego rwo gucunga neza umutekano w’amafaranga y’abakiliya.

Dr Ndibwile avuga ko umutekano w'ikoranabuhanga ari ikibazo ku bigo bito n'ibinini
Uzaruharanira Marc avuga ko bashaka kongera umubare w'abagore n'abakobwa mu bijyanye n'umutekano w'ikoranabuhanga
Iri huriro ryitabiriwe n'abakora mu bijyanye n'umutekano w'ikoranabuhanga mu nzego za leta, abikorera na za kaminuza
Umuyobozi ushinzwe gukurikirana ibyateza ingorane mu mutekano w’ikoranabuhanga muri Banki ya Kigali, Anatole Gahongayire, yavuze ko kugira ngo umutekno w’ikoranabuhanga ucungwe neza bisaba guhora umuntu yiyungura ubumenyi
Abakobwa 15 basoje amahugurwa ku mutekano w'ikoranabuhanga
Iri huriro ryitabiriwe n'abakora mu nzego za leta n'abikorera

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .