00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo bya Congo n’u Rwanda byafashe indi ntera; Ingendo za RwandAir zahagaritswe

Yanditswe na Philbert Girinema
Kuya 28 May 2022 saa 10:03
Yasuwe :

Ibibazo bya Guverinoma ya Congo n’u Rwanda bikomeje gufata indi ntera umunsi ku wundi, aho Inama Nkuru y’Umutekano muri RDC yashinje u Rwanda gufasha M23, iheraho ifata imyanzuro irimo guhagarika ingendo za RwandAir zigana muri iki gihugu.

Iyo nama yari iyobowe na Perezida wa RDC, Félix Tshisekedi, yitabiriwe n’abandi bayobozi bakuru mu gihugu mu nzego zose. Imyanzuro yavuyemo ni uko M23 yafashwe nk’umutwe w’iterabwoba, ndetse ikurwa mu biganiro bya Nairobi bigamije amahoro.

Ibi biganiro byari gusubukurwa mu ntangiriro z’ukwezi gutaha. Ubwo byabaga ku nshuro ya mbere, M23 yari ihagarariwe uhereye ku ruhande rw’abarwanyi bayo bahungiye mu Rwanda n’abari muri Congo.

Abavuye mu Rwanda bari i Nairobi, IGIHE yamenye ko bari batatu bayobowe na Bishop Jean Marie Runiga uyoboye umutwe wa politiki w’uyu mutwe.

Iyo nama u Rwanda narwo rwarayitabiriye nk’indorerezi rwohereje abasirikare babiri bakuru bakora mu rwego rw’ubutasi bwa gisirikare.

Indi myanzuro yafashwe na Congo, irimo uwo kwihanangiriza u Rwanda, aho itangazo ryashyizwe hanze rivuga ko Guverinoma y’u Rwanda ibangamiye inzira y’amahoro iri guterwa mu Burasirazuba bwa Congo.

Undi mwanzuro ni uwo “guhagarika ingendo za RwandAir ku butaka bwa Congo” ndetse byemezwa ko na Ambasaderi w’u Rwanda, Vincent Karega agomba guhamagazwa.

RwandAir yajyaga i Goma ku wa Mbere no ku wa Gatatu guhera ku wa 15 Ukwakira 2021. Ni mu gihe i Kinshasa ho yajyagayo Ku wa Mbere, ku wa Kabiri, ku wa Gatatu, ku wa Gatanu no ku wa Gatandatu na Lubumbashi kuwa Mbere no kuwa Gatatu.

Congo yashingiye kuki ifatira u Rwanda ibihano?

Mu byo Guverinoma ya Congo yashingiyeho ifatira u Rwanda ibihano, harimo ko ngo ruri gutera ingabo mu bitugu umutwe wa M23 ku buryo ngo hari n’impuzankano y’igisirikare cy’u Rwanda iherutse gufatirwa muri urwo rugamba ruhanganishije uwo mutwe na FARDC.

Amashusho yashyizwe ku mbuga nkoranyambaga na Guverinoma ya Congo, agaragaza abasirikare b’icyo gihugu, bicaye ahantu imbere yabo hari impuzankano imwe isa n’ikoreshwa n’Ingabo z’u Rwanda.

Umwe mu basesenguzi baganiriye na IGIHE, yavuze ko bitumvikana ukuntu igisirikare cya Congo cyavuga ko u Rwanda ruri gufasha M23 gishingiye ku mwambaro umwe cyabonye.

Ati “Barakwereka imyenda y’umuntu, ntiyapfuye, ntabwo bamugaragaza; none se imyenda aho utayidoda ni he? Ubundi ufata umuntu mpiri cyangwa ukamurasa ariko ntabwo ubona imyenda ye ngo uvuge ko wabonye umuntu. Ikindi ntabwo haboneka umwe gusa, habaye igitero nibura wafata nka batanu.”

Marc Hoogsteyns, ni umunyamakuru umaze imyaka irenga 25 akurikirana ibibera mu Burasirazuba bwa Congo, ndetse yataye amakuru ku ntambara zose zabereye muri iki gice ahari imbonankubone.

Yabwiye IGIHE ko ibyo Congo yavuze ko ifite impuzankano z’abasirikare b’u Rwanda bafasha M23 bidafite aho bihuriye n’ukuri.

Ati “ Ibyo ni ibintu basanzwe bakora, bafata abantu bakabakura muri gereza bakavuga ngo ni abasirikare. Ntabwo aribyo.”

Muri Werurwe, u Rwanda rwamaganye ibirego byatangajwe n’Ubuyobozi bwa Repubulika Iharanira Demokarasi ya Congo bishinja abasirikare barwo kugaba igitero mu duce twa Tchanzu na Runyoni i Rutshuru.

Icyo gihe itangazo ryashyizwe ahagaragara na Gen Brig Ekenge Bomusa Efomi Sylvain, Umuvugizi wa Guverineri wa Kivu y’Amajyaruguru, ryavugaga ko muri ibyo bitero, Ingabo za FARDC zafashe abasirikare babiri b’u Rwanda.

Abo ngo harimo uwitwa Adjudant Habyarimana Jean Pierre na Uwajeneza Muhindi John uzwi nka Zaje. Rivuga ko baturuka muri Batayo ya 65 n’iya 402 yo mu Ngabo z’u Rwanda.

Guverineri w’Intara y’Iburengerazuba, Habitegeko François, yamaganye ibyo birego, avuga ko ibishinjwa u Rwanda nta shingiro bifite.

Yavuze ko amazina y’abo bagabo babiri yatangajwe n’Ingabo za Congo hamwe n’inzego z’ubutasi yigeze gukomozwaho mu biganiro byahuje inzego z’ubutasi ku mpande zombi i Kigali ku wa 25 Gashyantare 2022.

Yakomeje agira ati “Itsinda ry’inzego z’ubutasi rihuriweho ntabwo ryigeze ryemererwa kubahata ibibazo kugira ngo hakorwe isesengura rihuriweho nk’uko bisanzwe bigenda.”

Yongeyeho ati “ RDF ntabwo ifite umusirikare n’umwe ufite amazina yatangajwe mu itangazo. Ibi ni uburyo bwo kuyobya abantu binyuze mu kugaragaza abantu bafashwe mu buryo butazwi mu gihe kirenga ukwezi, bakaberekana nk’abafashwe tariki 28 Werurwe 2022.”

Amakuru avuga ko Ingabo za Congo ziri kurwana na M23 zikomeje gushyigikirwa n’Ubuyobozi Bukuru i Kinshasa. Hari indege imwe yageze mu gace kari kuberamo imirwano itwaye abasirikare ndetse n’amakamyo abiri nayo yari atwaye abasirikare bagiye gutanga “umusada”.

Uwahaye amakuru IGIHE yagize ati “Hari na Fuso ebyiri zatwaye abasirikare zibanyuza Kibati berekeza Kibumba”.

Ku rundi ruhande, bivugwa ko imirwano yo ikomeje gufata intera kandi ko umunsi ku wundi FARDC iri kugenda ikurwa mu birindiro byayo na M23 ifite ubukana bwinshi.

Abaganiriye na IGIHE bose bavuga ko ikibazo gihari uyu munsi ari uko Congo idashaka kwemera ko Abanye-Congo bavuga Ikinyarwanda, ari abaturage bayo.

Ati “Bumva ko bagiye muri Congo bahagarariye u Rwanda aho kubabona nk’Abanye-Congo, igihe cyose bahagurutse baharanira uburenganzira bwabo, bizitirirwa u Rwanda kandi Congo iyobowe neza yagakemuye ikibazo cy’abaturage.”

“Ni igihugu kinini cyagakwiriye kugira umutima kigaha buri wese uburenganzira n’ituze bigatuma abantu batabasha gufasha intwaro.”

Marc Hoogsteyns asobanura ko kugira ngo ibintu bibe bigeze aha, byatewe n’uko Congo yananiwe gushyira mu bikorwa amasezerano yagiranye na M23, igatuma abarwanyi bayo bamara imyaka irenga umunani mu nkambi.

Ati “Ikindi ni uko abantu bavuga Ikinyarwanda, bameneshejwe, bikaba ngombwa ko bahunga. Ndaguha urugero ku Bagogwe bo muri Congo. Ibiri kuba uyu munsi rero ni ingaruka z’ibyo.”

Yavuze ko mu myaka 20 ishize, mu Burasirazuba bwa Congo hari Abagogwe barenga ibihumbi 200 ariko uyu munsi batageze mu bihumbi 10. Ngo barameneshejwe, barahunga.

Marc yashimangiye ko muri Congo hari ikintu gisa n’irondabwoko, binashimangirwa n’amagambo yavuzwe n’Umuyobozi wa Polisi i Goma muri iki Cyumweru, ko abaturage bakwiriye gufata imihoro bagatema Aba-Tutsi bose, kandi yitsaga ku bavuga Ikinyarwanda.

Tshisekedi yahinduwe n’iki?

Tariki 8 Ukuboza 2019, I Kigali habereye ikintu kidasanzwe. Perezida Kagame na Félix Tshisekedi, bagaragaye bari kumwe, bicaranye bari kuganira basa n’abahuje urugwiro bafatanye mu kiganza.

Ni ifoto yavugishije abantu benshi amangambure kugeza n’aho Abanye-Congo badakunda u Rwanda bajiginywe, bagatangira kuvuga ko bidakwiriye kubona uwo mubano hagati y’impande zombi.

Usubije amaso inyuma, biragoye kwiyumvisha uburyo Tshisekedi wari ubanye neza na Perezida Kagame, batabarana mu byago, bakanishimana mu byiza ariwe wahindukiye agashinja u Rwanda gutera igihugu cye.

Ubwo Tshisekedi yapfushaga se, Kagame yagiye ku mutabara. Ubwo Goma yibasirwaga n’umutingito, Kagame yagiyeyo anatanga inkunga yo kubakira umudugudu Abanye-Congo bagizweho ingaruka nawo.

Abasesenguzi bavuga ko impinduka mu mubano wa Tshisekedi n’u Rwanda zishingiye ku miterere ya Politiki ya Congo, cyane ko mu mwaka utaha hari amatora.

Umwe ati “Hari igitutu cy’uko bagiye mu matora umwaka utaha kandi yiyamamaza, yavuze ko amatora azaba Uburasirazuba bwa Congo bwaragize amahoro. Icyo cy’amahoro rero agomba kugira icyo agisobanuraho, agomba kugaragaza ko atari we watumye atagerwaho ko we yakoze ibishoboka byose.”

Mu myaka ibiri ishize, u Rwanda na Congo byari bibanye neza ku buryo bugaragarira buri wese ariko umubano wajemo urwijiji muri iki gihe

Ibitero ku Rwanda byaba bishaka kubangamira CHOGM?

Mu Cyumweru gishize, Ingabo za Congo zarashe ku butaka bw’u Rwanda, ibisasu bigwa mu Kinigi bisenya inzu z’abaturage binakomeretsa abaturage babiri. Byari bikurikiye ibindi byarashwe bikagwa i Burera muri Werurwe uyu mwaka.

Hari amakuru yatangiye kujya hanze ko ayo masasu yarashwe na FARDC, yari ubushotoranyi bugamije kubangamira inama ya CHOGM itegerejwe mu kwezi gutaha.

Marc asobanura ko u Rwanda rudashaka intambara, by’umwihariko muri ibi bihe, ariko ko byaba ibindi rukomeje kubangamirwa.

Ati “Ku bantu bamwe muri Congo, kurwana n’u Rwanda bwaba ari uburyo bwo kwikuraho icyasha. Abarundi murabizi barabigerageje na FLN, mu bihe bishize na Uganda yarabigerageje, Kagame ntiyabijyamo. Ubu bari kubigerageza na none ngo bimere nko mu gihe cya Nkunda.”

“Ariko mu gihe ubu bushotoranyi bwafata indi ntera, Umuryango Mpuzamahanga nawo uzaba ubibona ko nta bundi buryo buhari usibye kubasubiza. Uko ni ukuri.”

Umuvugizi wa Guverinoma y’u Rwanda, Yolande Makolo, aherutse gutangaza ko u Rwanda iyo rushaka rwari gusubiza Congo ku bitero rwagabweho ariko ko rwirinze kwinjira mu ntambara.

Ati “Mu gihe u Rwanda rushatse rwasubiza ibi bitero by’ubushotoranyi bya FARDC ku butaka bwarwo, ntabwo rwifuza kwinjira muri iyi mirwano iri kubera mu Burasirazuba bwa Congo ndetse nta nubwo ruyishorwamo.”

Marc asobanura ko nubwo u Rwanda rudashaka intambara, ariko abantu bakwiriye kwibaza icyaba mu gihe ibitero ku butaka bwarwo byaba bidahagaze.

Inkuru wasoma:

 Bikomeje kudogera i Goma: Sobanukirwa byimbitse ibiri kubera mu Burasirazuba bwa Congo

 U Rwanda rwamaganye ibirego bya Congo ku bagabye igitero biswe abasirikare ba RDF

 U Rwanda ntirwumva impamvu FARDC yifatanyije n’Interahamwe

Inama Nkuru y'Umutekano yafatiye ibihano u Rwanda, yayobowe na Perezida Tshisekedi
Patrick Muyaya Katembwe, Umuvugizi wa Guverinoma ya Congo, ni we watangaje imyanzuro yafashwe n'Inama Nkuru y'Umutekano mu gihugu
RwandAir yakoreraga ingendo eshanu i Kinshasa buri Cyumweru, ebyiri i Goma n'ebyiri i Lubumbashi. Zose zahagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .