00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo birindwi Guverineri Kayitesi yasabye ko byitabwaho by’umwihariko mu Karere ka Nyaruguru

Yanditswe na Prudence Kwizera
Kuya 26 May 2022 saa 07:51
Yasuwe :

Guverineri w’Intara y’Amajyepfo, Kayitesi Alice, yasabye abayobozi n’abafatanyabikorwa mu Karere ka Nyaruguru kwita ku bibazo birindwi bibangamiye imibereho myiza y’abaturage bigakemurwa kugira ngo babeho neza batuje.

Yabigarutseho kuri uyu wa Gatatu tariki ya 25 Gicurasi 2022 ubwo yifatanyaga n’Akarere ka Nyaruguru mu gikorwa kamazemo iminsi cy’Icyumweru cy’Umujyanama n’Umufatanyabikorwa cyatangiye ku wa 23 kigasozwa ku wa 27 Gicurasi 2022.

Muri icyo cyumweru gifite insanganyamatsiko igira iti ‘Ubufatanye mu iterambere ry’umuturage’ abayobozi, abajyanama n’abafatanyabikorwa b’akarere basura ibikorwa bitandukanye hirya no hino mu mirenge, bakareba uko byahinduye imibereho y’abaturage, bagasuzuma n’ibibazo bihari bagomba gukemura.

Ubwo Guverineri Kayitesi yaganiraga n’abo mu Murenge wa Cyahinda, yabasabye kwita ku bibazo birindwi by’umwihariko.

Kurwanya isuri

Icya mbere yabasabye ni ukurwanya isuri kuko ihombya abaturage n’igihugu kandi yakagombye gukumirwa.

Yavuze ko isuri itwara ubutaka ikangiza ibikorwa remezo byubatswe, igasenyera abaturage kandi ikaba yanabahitana cyangwa ikica amatungo yabo.

Ati “Nyamara iki kibazo dushobora gufatanya tukakibonera igisubizo, nkaba mbasaba duhereye ku baturage buri wese agire imbaraga zo kurwanya isuri mu murima we, ahadafite beneho cyangwa mu butaka bwa Leta tuhahurire mu muganda.”

Yasabye ko hakomeza gicibwa imirwanyasuri n’amaterasi y’indinganire, hagaterwa ibiti n’ibyatsi.

Akarere ka Nyaruguru kiganjemo imisozi miremire ku buryo mu bihe by’imvura isuri yibasira ibihingwa, abahinzi bakabura umusaruro. Mu myaka yashize hari bamwe bahingaga ntibagire n’ibiro 10 basarura bagahura n’ibibazo bikomeye by’inzara.

Kugeza ubu mu Karere ka Nyaruguru amaterasi y’indinganire amaze gukorwa ku buso bwa hegitari 6.030. Hasigaye ubundi buso bungana na hegitari 8000 nabwo bukeneye gucibwaho amatarasi y’indinganire; ubuyobozi buvuga ko bizakorwa uko ubushobozi buzagenda buboneka.

Abadafite ubwiherero

Guverineri Kayitesi yavuze ko kugeza ubu hakiri abaturage bataragira ubwiherero bwujuje ibisabwa asaba ko icyo kibazo nacyo cyitabwaho.

Ati “Hari abadafite ubwiherero n’abafite ubudatunganyije tukaba dusabwa kubafasha gukemura icyo kibazo.”

Imibare igaragaza ko mu mwaka wa 2021/22 mu Karere ka Nyaruguru habaruwe ingo 2031 zidafite ubwiherero bwujuje ibisabwa. Ubuyobozi ku bufatanye n’abafatanyabikorwa bafatanyije kuzubaka zose.

Umuturage asabwa gucukura umwobo muremure noneho umuganda ukamwubakira, ubuyobozi bukamuha amabati yo gusakara.

N’ubwo abo bubakiwe, haracyari ingo zifite ubwiherero butujuje ibisabwa ku buryo hakwiye ubukangurambaga bwo kuzishishikariza kubugira babwiyubakiye ubwabo, abafite ubushobozi buke bagaterwa inkunga.

Abasembera

Ikibazo cy’abaturage batagira aho kuba ni kimwe mu byo Guverineri Kayitesi yasabye ko cyitabwaho by’umwihariko kugira ngo buri wese agire aho ataha abashe no gukora ibikorwa bimuteza imbere.

Hari abatagira aho kuba bitewe n’ubukene, gusenyerwa n’ibiza ndetse n’ibindi bibazo.

Mu Karere ka Nyaruguru haherutse kubakirwa imiryango 15 itaragiraga aho kuba.

Kuri ubu hari kubarurwa abandi kugira ngo nabo bafashwe kubakirwa babigizemo uruhare.

Abafite inzu zitameze neza

Yagarutse no ku kibazo cy’imiryango iba mu nzu zitameze neza aho usanga zubatse mu buryo budakomeye ndetse n’izisa nabi asaba ko nacyo cyitabwaho mu bufatanye.

Mu 2021/22 mu Karere ka Nyaruguru habaruwe inzu 443 zitameze neza, ubuyobozi bwiyemeza gufatanya na ba nyirazo n’abafatanyabikorwa kuzitunganya. Kugeza ubu hamaze gutunganywa 436 zingana na 98.4% naho izindi zigeze mu mirimo ya nyuma.

Nyuma yaho hari abasenyewe n’ibiza nabo bakeneye ubufasha ndetse n’abandi inzu zabo zangijwe nazo zikeneye gusanwa.

Abakirarana n’amatungo

Mu Karere ka Nyaruguru hagaragaye ikibazo cy’abaturage bakirarana n’amatungo mu nzu bigateza umwanda ndetse bikaba byabatera n’indwara zikomoka ku isuku nke.

Ni ikibazo ubuyobozi bwahagurukiye ku bufatanye n’abafatanyabikorwa kuko mu 2021/22 habarurwaga ingo 586 zirarana n’amatungo mu nzu.

Hakozwe ubukangurambaga abaturage bafashwa no kubaka ibikoni n’ibiraro byo kurazamo ayo matungo.

Ubuyobozi bw’Akarere ka Nyaruguru buvuga ko abo bari babaruwe batakirarana nayo bose. Gusa hari abandi bagaragaye ko nabo bararana nayo, bityo bikaba bikenewe ko begerwa.

Imirire mibi no kugwingira

Mu Karere ka Nyaruguru kimwe n’ahandi mu gihugu haracyari ikibazo cy’abana bagwingiye biturutse ku mirire mibi.

Imibare iheruka yerekana ko abana bari ku kigereranyo cya 39,1% bagwingiye bitewe n’imirire mibi. Aka karere kari ku mwanya wa cyenda mu kugira abana benshi bagwingiye mu gihugu.

Abaturage bibutswa ko iyo umwana na nyina umutwite batitaweho kuva agisamwa kugeza ku minsi igihumbi, nta garuriro ryo kumurinda kugwingira riba rigihari.

Umubyeyi aba asabwa kurya indyo yuzuye, kuruhuka no kujya kwa muganga kwipimisha uko byagenwe kugira ngo we n’uwo atwite bamererwe neza.

Abana bavuye mu ishuri

Mu minsi ishize mu Karere ka Nyaruguru hagaragaye abanyeshuri batasubiye ku ishuri kubera ibibazo bitandukanye, bituma ubuyobozi bugaruka bujya kubashaka mu ngo iwabo kugira ngo bubikemure bagaruke kwiga.

Muri bo hari abari badafite ibikoresho, ababuze amafaranga yo kurira ku ishuri, abatewe inda imburagihe n’abavuyemo kubera gucika intege cyangwa kudashyigikirwa n’ababyeyi.

Kugeza ubu imibare yerekana ko muri rusange ahari abana 274 batari ku ishuri kandi bakagombye kuba biga.

Mu mashuri y’incuke abana bose babaruwe uko ari 8736 biga; mu mashuri abanza higa abana 71.147 mu 71.306 babaruwe; mu yisumbuye y’abiga bataha higa 16.499 mu bagera 16.571 bagombye kuba bari mu ishuri.

Mu mashuri y’imyuga mu biga bataha hagombye kuba higa 475 ariko kuri ubu haza 461. Naho mu mashuri y’imyuga mu biga baba ku ishuri higa 1045 kandi bagombye kuba 1046.

Mu banyeshuri biga bacumbikirwa ku bigo mu mashuri yisumbuye higa 4020 mu bagera ku 4049 bagombye kuba biga.

Guverineri Kayitesi ati “Ibi ni ibintu tubona twafatanya kandi duhereye ku musingi w’ibyo mufite, duhereye ku bafatanyabikorwa ndetse n’ibyo bagiye bakora.”

Yabasabye no kwita ku kibazo cy’abangavu baterwa inda imburagihe, bigakumirwa ndetse n’abamaze kuziterwa bakitabwaho mu bibazo bafite kandi bagafashwa gusubira mu ishuri.

Muri uyu mwaka mu Karere ka Nyaruguru hamaze gusubizwa mu ishuri abangavu 44 batewe inda imburagihe.

Guverineri w’Intara y’Amajyepfo, Kayitesi Alice, yasabye abayobozi n’abafatanyabikorwa mu Karere ka Nyaruguru kwita ku bibazo bibangamiye imibereho myiza y’abaturage
Guverineri Kayitesi yasabye abayobozi n'abafatanyabikorwa gukemura ibibazo bibangamiye imibereho myiza y'abaturage
Perezida w’Ihuriro ry’Abafatanyabikorwa mu Karere ka Nyaruguru, Pasiteri Kabarisa Anicet, yasabye abahabwa inkunga kujya bazibyaza umusaruro utuma imibereho yabo ihunduka myiza
Umuyobozi w'Akarere ka Nyaruguru, Murwanashyaka Emmanuel, yavuze ko ibibazo byagaragajwe bigiye kwitabwaho by'umwihariko
Abayobozi bishimanye n'abaturage mu Karere ka Nyaruguru
Amazi meza akomeje kwegerezwa abaturage
Abaturage bibukijwe ko inkunga bahabwa zigamije guhundira imibereho yabo kugira ngo bave mu cyiciro cy'abafashwa
Abaturage bari kwegerwa kurushaho muri iki cyumweru
Abatagira aho kuba bakomeje guhabwa inzu
Abaturage basabwe kugira uruhare mu bikorwa bibakorerwa kugira ngo bihindure imibereho yabo
Abayobozi, abajyanama n'abafatanyabikorwa basuye ibikorwa bitandukanye mu mirenge bareba impinduka biri kuzana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .