00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo bikeneye umwotso mu guteza imbere amarerero y’abana bato mu Rwanda

Yanditswe na Ntabareshya Jean de Dieu
Kuya 9 June 2022 saa 12:36
Yasuwe :

Burya koko ngo ’igiti kigororwa kikiri gito’ kandi ’umwana apfa mu iterura’. Guverinoma y’u Rwanda yabibonye kare ishyiraho gahunda zitandukanye zo guteza imbere uburere n’uburezi bw’umwana kuva akiri muto kugeza abaye umuntu ushobora kugira icyo yimarira, akakimarira umuryango n’igihugu muri rusange.

Iki cyerekezo ni cyo cyashibutsemo gahunda y’amarerero y’abana azwi nka ECD [Early Childhood Development Centers]. Aha uwahita mu rugo ha kabiri ku bana ntiyaba abeshye. Basangayo ababyeyi babitaho banabafasha gukura mu bwenge kuko uretse kubatoza uburere bukwiriye Umunyarwanda, banabigisha amasomo yo mu ishuri ku rwego rwabo.

Umubyeyi ahasiga umwana we akajya mu yindi mirimo ntacyo yishisha, ni ho ababyeyi bigishirizwa kwita ku burere bw’abana bakiri bato, uko babategurira indyo yuzuye, uko bashobora kwivana mu bukene, uko bakumira bakanakemura amakimbirane mu ngo no kwita ku burenganzira bw’umwana.

Kuri ubu amarerero ari mu byiciro bigera kuri bine; harimo ayazwi nka ’Home based ECDs’, aya ni amarerero aho umubyeyi ashobora gushyiraho ahantu runaka abana bashobora kwigira maze bakahahurira bagahabwa uburere buboneye ariko ari mu rugo rw’umuturage.

Hari kandi ’Community Based ECDs’ aho ibigo bitandukanye, imiryango itari iya Leta, amadini n’abandi bashobora gushyiraho irerero rizajya rifasha abana bato guhabwa uburere no kwitabwaho.

Uretse ayo marerero hari andi aboneka ku bigo by’amashuri bitandukanye ari byo bita School Based ndetse n’amarerero agirwa santeri (Center based ECDs) aho umurenge cyangwa akagari gashobora guhitamo ahantu runaka hazajya harererwa abana.

Ababyeyi barerera mu marerero bavuga ko bibafasha gukora akazi kabo batekanye kuko baba bazi ko aho abana basizwe hizewe.

Niyomugeni Sophie afite umwana umaze imyaka ibiri yiga mu irerero rimwe mu Mujyi wa Kigali mu Karere ka Kicukiro mu Murenge wa Kigarama, aganira na IGIHE yavuze ko mbere atabashaga kubona uko aca inshuro kubera uwo mwana.

Yavuze ko n’iyo yabonaga byanze yanyuzagamo umwana agasiga amufungiranye mu nzu ibintu byashoboraga kumuteza ibyago byinshi kuko uwo mwana yasigaraga ari wenyine.

Ati “Kuba umwana ari kwiga aha byaramfashije cyane, kuko mbere sinabonaga uko najya gushakisha. Hari ubwo nabonaga binyobeye ngahitamo kumufungirana mu nzu kugira ngo njye gushaka ibyatunga umuryango”.

Niyomugeni avuga ko irerero rimufasha kuko umwana aba afite aho ari kandi hatekanye ndetse bari no kumuha ubumenyi.

Uretse uyu hari n’abandi bo mu bice bitandukanye by’igihugu bagaragaza akamaro k’amarerero cyane ko kuri ubu biri no mu byifashishwa mu kurandura imirire mibi mu bice bicyugarijwe n’igwingira mu bana bato.

Nubwo bimeze bityo ariko abakoresha amarerero bagaragaza ko agifite ibibazo bitandukanye bikenewe gushyirwamo imbaraga mu kunoza imikorere no gutanga umusaruro wifuzwa.

Hari amwe mu marerero akigorwa no kubona amafunguro y'abana bigatuma abohereza mu rugo hakiri kare batarasonza

Imyubakire ya ECDs

Mu byiciro by’amarerero hari ayo mu byiciro bibiri ari byo Home based ECDs na Community Based ECDs ari na yo agize umubare munini w’amarerero ahari, ariko usanga agifite ikibazo cyo kuba adafite inyubako nziza akoreramo.

Biterwa n’uko ahanini bitegurwa n’abaturage, uwumva ko afite ubushobozi muri bo akaba ari we wemera kuzakira iryo rerero kugeza ubu usanga ayo marerero akorera mu nyubako zitaboneye ku buryo zitakorohereza abana kwiga.

Kuba aba banyeshuri bashobora kwigira mu rugo rw’umuntu cyangwa ahandi hantu rimwe na rimwe hatubatse neza bishobora guteza ikibazo ku migendekere y’imyigire y’abana n’umutekano wabo nka zimwe mu nshingano z’ibanze z’amarerero.

Umukozi Ushinzwe Ubuzima, Isuku n’Isukura mu Murenge wa Kigarama ho mu Karere ka Kicukiro, Rwemera Jean Damascène, yabwiye IGIHE ko iki kibazo kiramutse gishakiwe umuti urambye bishobora gufasha mu kunoza imitangire inoze y’uburere buhabwa abana.

Kubona amafunguro mu buryo buhoraho ni ingume

Iyi ni indi ngingo ikomeye kuko kuri ubu abana bajyanwa mu marerero ari ku rwego rwa Home Based na Community Based usanga ari ba ntaho nikora ku buryo bigorana kubona ibyo kubitaho bari ku ishuri.

Nubwo igiciro kitaba kiri hejuru kuko usanga ahenshi biri hagati y’ibihumbi 10 Frw na 20 Frw mu mezi atatu yo kunganira umwana kubona ifunguro ku ishuri, bikunze kuba imbogamizi kuko ababyeyi usanga ngo kuyabona bigorana.

Bitewe n’uko abajyanwa mu marerero ari abana bafite hagati y’imyaka ibiri n’imyaka itanu, biba bisaba ko nibura saa Yine bafata ifunguro rya mu gitondo ndetse na saa Sita bikaba bityo.

Iyo iryo funguro ritabonetse nkuko bikwiye bigira ingaruka kuko ishuri rihitamo kubasezerera ababyeyi babo batarava mu kazi mu rwego rwo kwanga ko bakomeza kwicira isazi mu maso y’ababitaho.

Umwe mu babyeyi twaganiriye yagaragaje ko iki ari ikibazo kibabangamira bityo ko bahawe ubufasha ku buryo abana babo bazajya bagaburirwa, gahunda yo kugaburira abana mu mashuri iri mu marerero amwe yo mu bigo by’amashuri ikagera no kuri Home Based na Community Based byabafasha kurushaho.

Muri ayo marerero usanga harimo abana benshi b’abakobwa babyaye inda zitateganyijwe n’abo mu miryango itishoboye.

Abana bafashwa no mu gukangura ubwonko bwabo

Imfashanyigisho ziboneye

Mu marerero, abana bato bahabwa uburere mbonezabupfura n’ubumenyi rusange kugira ngo bafungurwe ubwonko bakiri bato mu rwego rwo kubategura gutangira kwitegura amashuri abanza.

Muyizere Denise yigisha mu Irerero rya Byimana Home Based yavuze ko ubusanzwe mu marerero hatangirwamo ubumenyi bw’ibanze umwana uri mu kigero cy’imyaka itatu kugera kuri itandatu agomba kuba afite.

Yagize ati “Hari imfashanyingisho tugenderaho ku buryo tutakigisha ibintu twikuriye mu mutwe, kuko utamenya ngo uratanga ibingana gute ahubwo tugomba kugendera kuri iyo mfashanyigisho”.

Yavuze ko hakenewe imfashanyigisho ihamye kuri ayo marerero cyane ayo mu ngo, ay’abaturage n’ayo kuri za site yagiye atoranwa n’inzego.

Insimburamubyizi ihagije

Burya koko icyanga cy’isuka kibonekera mu musaruro w’ikivamo. Nubwo akazi ko kwita ku bana bato gasaba ubwitange bukomeye, abakora mu marerero bagaragaza ko kugeza ubu insimburamubyizi bahabwa ziri hasi cyane bigendanye n’ubushobozi buke bw’ababyeyi.

Kuba ababyeyi bafite amikoro make ni na yo ntandaro yo kuba insimburamubyizi kuri aba bakurikirana abana umunsi ku wundi ’caregivers’ bahabwa insimburamubyizi y’intica ntikize bikaba byanagira ingaruka ku migendekere myiza y’akazi ko kurera aba bana.

Umubare muke w’abanyeshuri bazigana

Hashingiwe ku nyungu aya marerero afite n’icyerekezo cya Guverinoma y’u Rwanda muri Gahunda y’Imyaka irindwi ya NST1, ubona ko ubwitabire bw’abagana aya marerero bukiri hasi.

Ibi benshi bagaragaza ko bigiterwa n’imyumvire itari myiza ababyeyi bafite ku gutanga uburere bw’umwana kuva akivuka kugera abaye umuntu uzagira icyo amarira umuryango, igihugu nawe ubwe.

Impungenge ziracyari ku bwitabire bw’abana bukiri hasi kuko usanga bikiri imbogamizi kubona hari amwe mu marerero adafite abana bahagije kandi nyamara ugasanga birirwa bazerera mu mihana.

Niwemugeni Sophie yabwiye IGIHE ko ababyeyi bari bakwiye kujyana abana babo mu marerero kuko bibagirira umumaro kandi bakirinda kwinubira kubajyanayo kuko abana bahakura uburere buhagije.

Ibi kandi birajyana n’ubukangurambaga bukwiye gukorwa mu nama zitandukanye zihuza abaturage kuko usanga akenshi biterwa n’ubumenyi buke babifiteho

Umukozi w’Akarere ka Kicukiro ukurikirana Ibikorwa by’Abafatanyabikorwa mu Iterambere ry’Akarere, Ntukabumwe Marceline, yavuze ko muri gahunda y’iterambere uburere bw’umwana budakwiye gusigara inyuma.

Yagaragaje ko ibibazo bikigarara mu marerero binyuze mu bufatanye n’inzego zitandukanye bikwiye gushakirwa umuti kugira ngo arusheho gutanga umusaruro ufatika.

Muri gahunda ya Leta NST1, Guverinoma y’u Rwanda yifuza ko ibikorwa by’amarerero hirya no hino byashyirwamo imbaraga ku buryo bahabwa ibikoresho bikenerwa birimo ibitabo, imfashanyigisho, kongerera ubushobozi abita ku bana, ibikorwaremezo by’ibanze n’ibikenerwa byose kandi iyi gahunda ikagera ku bana bose bari hasi y’imyaka itandatu y’amavuko.

Amarerero atandukanye agaragaza ko agihura n'imbogamizi zo kubona ibikoresho bihagije byo gukangura ubwonko bw'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .