00:00:00 IGIHE NETWORK KN KINYARWANDA EN ENGLISH FR FRANCAIS

Huye: Umugore akurikiranweho kwica musaza we amukubise itafari mu gahanga

Yanditswe na Prudence Kwizera
Kuya 5 Kanama 2021 saa 03:22
Yasuwe :
0 0

Umugore wo mu Murenge wa Mukura mu Karere ka Huye, akurikiranweho icyaha cyo kwica musaza we amukubise itafari mu gahanga nyuma y’amakimbirane bagiranye bakarwana.

Byabaye ku mugoroba ku wa 4 Kanama 2021 ahagana saa mbiri n’igice. Uwo mugore w’imyaka 55 yabaga mu nzu yegeranye n’iyo musaza we witwa Nyakayiro Firmin w’imyaka 59 yabagamo mu Mudugudu wa Gaseke mu Kagari ka Rango A.

Umwe mu baturanyi babo babwiye IGIHE ko bumvise bari kurwana, bihutira gutabara bahageze basanga uwo mugabo ari kuva amaraso menshi mu gahanga.

Ati “Twumvise bari kurwana tujya gutabara tugezeyo dusanga umugabo ari kuva amaraso menshi mu gahanga aryamye hasi. Twahise dutabaza ubuyobozi buraza bumujyana kwa muganga. Nubwo yahumekaga wabonaga ko byarangiye ari nk’aho yapfuye.”

Umunyamabanga Nshingwabikorwa w’Umurenge wa Mukura, Ngabo Fidele, yavuze ko uwo mugabo bamugejeje ku Kigo Nderabuzima cya Rango na cyo kimwohereza ku Bitaro bya Kabutare agezeyo yitaba Imana.

Yavuze ko uwo mugore bamaze kumufata bakamushyikiriza Urwego rw’Igihugu rw’Ubugenzacya, RIB.

Ati “Umugore yafashwe ariko avuga ko nta tafari yamukubise ahubwo ngo barwanye arigwaho. Twamaze kumushyikiriza RIB.”

Nyakayiro yari afite umugore n’abana ariko ntabwo bari bakibana. Mushiki we ukurikiranweho kumwica na we afite umugabo n’abana ariko ntabwo babanaga.

Inyubako y'Ibiro by'Akarere ka Huye mu Ntara y'Amajyepfo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .