Huye: Umubare munini w’impunzi ziba mu mujyi mu bishobora guhungabanya umutekano

Yanditswe na Prudence Kwizera
Kuya 13 Ukuboza 2019 saa 01:15
Yasuwe :
0 0

Ubuyobozi bw’Akarere ka Huye buvuga ko bufite impungenge z’umubare munini w’impunzi ziba mu Mujyi wa Huye zitagira icyo zikora, ko byaba urwaho rwo guhungabana k’umutekano.

Byagaragarijwe mu nama nyunguranabitekerezo yabaye ku wa 11 Ukuboza 2019 yahuje inzego z’umutekano n’abayobozi ku nzego z’ibanze mu turere twa Huye, Gisagara, Nyamagabe na Nyaruguru.

Yitabiriwe na Minisitiri w’Ubutegetsi bw’Igihugu, Prof Shyaka Anastase; Minisitiri w’Ubuhinzi n’Ubworozi, Mukeshimana Gérardine; Umugaba Mukuru w’Ingabo z’u Rwanda, Gen Kazura Jean Bosco; Guverineri w’Intara y’Amajyepfo, CG Gasana Emmanuel n’Umuyobozi Mukuru Wungirije wa Polisi y’u Rwanda ushinzwe ibikorwa, CP Namuhoranye Félix.

Umuyobozi w’Akarere ka Huye, Sebutege Ange, yavuze ko muri rusange umutekano wifashe neza, ariko hari ibintu bine bishobora kuwuhungabanya mu gihe nta gikozwe. Yavuze ko ibyo byaturutse ku isesengura ryakozwe n’ubuyobozi bw’Akarere ku bufatanye n’inzego z’umutekano.

Icya mbere yagaragaje ni ubujura buciye icyuho n’abajya kwiba ibiti mu ishyamba ry’Ibisi bya Huye. Icya kabiri ni ugukubita no gukomeretsa bikomoka ku icuruzwa ry’inzoga z’inkorano zitemewe, naho icya gatatu ni umubare munini w’urubyiruko rutagira akazi rwirirwa ruzerera mu mujyi.

Ati “Ikindi kibazo dufite ni umubare w’urubyiruko rudafite akazi; akenshi bagenda bafatirwa mu buzererezi. Ikigo kinyuzwamo inzererezi mu gihe gito cya Huye kiri mu byakira urubyiruko rwinshi ariko abenshi baba bafatiwe mu bibazo by’ubuzererezi.”

Sebutege yavuze ko mu Mujyi wa Huye hagaragara umubare munini w’impunzi ziganjemo Abarundi n’Abanye-Congo, zitaba mu nkambi kandi zitagira icyo zikora, avuga ko biteye impungenge.

Ati “Dufite umubare munini w’impunzi zitari mu nkambi ariko ziba muri uyu mujyi wa Huye; tubarura abasaga 900 ariko abo bose ntacyo bafite bakora. Muri rusange iyo urebye ubuzima bwabo n’uko babayeho, ngira ngo mu bijyanye n’umutekano nacyo tuba tubona ko ari ikibazo.”

Yakomeje avuga ko icyo cy’impunzi ari ikibazo gikomeje kwigwaho ku bufatanye n’izindi nzego.

Ni kenshi abatuye mu Mujyi wa Huye bagaragaje ikibazo cy’ubujura bukorwa n’abasore burira ibipangu bakiba icyo baonye cyose, kuko hari n’abaterura inkono basanze ku mbabura. Bagaragaza ko ubwo bujura bukorwa n’abasore batagira akazi birirwa bazerera mu mujyi.

Umwe mu baturage yagize ati “Aba basore birirwa bazerera mu mujyi kandi ugasanga batabura amafaranga yo kunywera inzoga, ni bo batwiba kuko nta kindi bakora kibaha amafaranga usibye kwirirwa biba.”

Minisitiri w’Ubutegetsi bw’Igihugu, Prof Shyaka Anastase, agaruka ku kibazo cy’umutekano n’ubuzererezi, yavuze ko abayobora inzego zibishinzwe zifite ibisubizo, ahubwo ishyirwa mu bikorwa rigenda ritsikira.

Ati “Buri Karere, buri Ntara, buri rwego rw’ubuyobozi, turifuza imikoranire y’inzego bireba kugira ngo byaba bisaba kwigisha, byaba bisaba guhanga imirimo, byaba bisaba kuganirizwa, byaba bisaba kugorora, bikorwe.”

Minisitiri Shyaka yavuze ko hari gahunda n’imishinga itandukanye bishobora gufasha abadafite imirimo, by’umwihariko urubyiruko ruzerera.

Yasabye uturere kubyitaho kugira ngo ibibazo bihari bikemuke ku buryo burambye.

Yasabye inzego zitandukanye kwita ku mishinga irimo ireba ibishanga, amterasi y’indinganire n’ibindi biganisha ku bikorwa biteza imbere abaturage.

Bamwe mu bitabiriye inama bateze amatwi ibiganiro byayitangiwemo
Iyo nama yitabiriwe n'abayobozi b'uturere twa Gisagara, Nyaruguru, Huye na Nyamagabe
Minisitiri Shyaka yavuze ko abayobora inzego zibishinzwe zifite ibisubizo ahubwo ishyirwa mu bikorwa rigenda ritsikira
Minisitiri Shyaka yasabye ko habaho ubufatanye bw'inzego mu gukemura icyo kibazo
Umwe mu bitabiriye inama atanga igitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza