00:00:00 IGIHE NETWORK KN KINYARWANDA EN ENGLISH FR FRANCAIS

Huye: RFL yijeje abaturage kurushaho kubegereza serivisi

Yanditswe na Prudence Kwizera
Kuya 26 Nzeri 2022 saa 02:10
Yasuwe :

Ubukangurambaga bwa Laboratwari y’u Rwanda y’Ibimenyetso bya Gihanga bikoreshwa mu butabera, RFL, bwakomereje mu Ntara y’Amajyepfo mu Karere ka Huye, abaturage bavuga ko serivisi zayo zibanyuze kandi bazitezeho ibyiza byinshi.

Ku wa Gatandatu tariki ya 24 Nzeri 2022, ubukangurambaga bwa RFL bwakomereje mu mujyi wa Huye, aho abakozi by’iyi Laboratwari baganiriye n’abaturage kuri Stade ya Huye.

Baganirijwe kuri serivisi iyi Laboratwari itanga zirimo gupima uturemangingo ndangasano (ADN), gupima uburozi n’ingano za alukoro (alcohol) mu maraso, gupima ibiyobyabwenge n’ibinyabutabire, ndetse no gupima inyandiko zigibwaho impaka n’ibikumwe.

Harimo na serivisi zo gusuzuma ibintu bitandukanye birimo ibimenyetso bishingiye ku ikoranabuhanga, inkomere n’imibiri y’abitabye Imana, ibyahumanijwe na mikorobe no gupima ibimenyetso by’imbunda n’amasasu.

Abaturage bo mu Karere ka Huye babwiye IGIHE ko basanga iyi Laboratwari ari igisubizo kuri bo, basaba ko yagira amashami mu ntara no mu turere.

Niwemugeni Delphine yavuze ko muri Jenoside yakorewe Abatutsi, umuryango we wose watsembwe ariko akabwirwa ko hari umwana w’umuhungu bavukana warokotse n’ubwo abishidikanyaho. Yishimiye ko iyi Laboratwari izabimwemeza.

Ati "Ikintu cyanshimishije cyane ni uko hari umuntu bavuga ngo ni musaza wanjye muto ariko Data yapfuye muri jenoside atabwimbwiye, rero byanshimishije ko ngiye kuzajya kureba niba ari byo koko. N’ibiciro babimbwiye nsanga bidahenze."

Ntirushwa Gaston na we yavuze ko icyamushimishije ari serivisi batanga zo gupima imirambo y’abapfuye bakamenya icyabishe.

Ati "Icyo namenye cyanshimishije ni uko bapima imirambo bakamenya umuntu n’icyamwishe. Ni serivisi dukenera kenshi nk’abaturage kandi tuzajya tubiyambaza."

Abaturage bo mu Karere ka Huye bahuriza ku gusaba ko serivise za RFL zashirwa no mu ntara n’uturere kugira ngo zijye zibageraho bitagoranye.

Umuyobozi w’ishami ry’Ubutabire muri RFL, Dr Justin Kabera, yashimye uburyo abaturage bo mu Karere ka Huye bari bafite amatsiko menshi uri serivisi zabo, abizeza ko bazarushaho kubegera bazana amashami mu ntara.

Ati "Iyo gahunda irahari, turagira ngo tujye dukorana n’ibitaro nko gupima za ADN twatangiye gukorana n’ibitaro i Rusizi na Rubavu, kandi tuzabikomeza ku buryo niba ushaka gupima ADN bitagusaba kujya i Kigali."

Yavuze ko hari na gahunda yo kugura laboratwari yimukanwa, ku buryo ukeneye serivisi bamusanga aho ari.

Muri ubwo bukangurambaga hari abahanzi batandukanye bataramiye abaturage, barimo Senderi International Hit na Tom Clause ndetse n’umushyushyarugamba Anitha Pendo.

Abaturage babwitabiriye bagiye babazwa ibibazo bijyanye n’ubutumwa bwatanzwe, abasubije neza bahabwa ibihembo birimo ibikapu, imipira n’ingofero byo kwambara.

Umuyobozi w'ishami ry'Ubutabire muri RFL, Dr Justin Kabera, yashimye uburyo abaturage bo mu Karere ka Huye bitabiriye iki gikorwa
Tom Close yari akumbuwe i Huye nk'ahantu yubakiye izina
Senderi International Hit yashimishije abaturage b'i Huye
Abahanzi bataramiye abaturage muri ubu bukangurambaga
Abitabiriye ubu bukangurambaga babazwaga ibibazo, ababitsinze bagahembwa
Anitha Pendo ni we wari umushyushyarugamba
Abaturage b'i Huye basobanuriwe serivisi za RFL

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .