Huye: Abamotari bifuza ko mituweli yashyirwa mu byangombwa basabwa na koperative

Yanditswe na Prudence Kwizera
Kuya 15 Kanama 2019 saa 12:21
Yasuwe :
0 0

Bamwe mu batwara ikinyabiziga cya moto bazwi nk’abamotari mu Karere ka Huye basaba bagenzi babo kwitabira gutanga umusanzu w’ubwisungane mu kwivuza kuko ari ingirakamaro; bakifuza ko mbere yo kwinjiza umunyamuryango muri Koperative yabo yajya asabwa ikarita ya mituweli.

Bavuga ko icyo cyifuzo bakigize nyuma yo kubona ko hari bagenzi babo bakora impanuka babageza kwa muganga bagasanga nta bwisungane mu kwivuza bagira bigatuma kubavuza bigorana kuko biba bihenze.

Uwitwa Habimana Jean Chrysostome ati “Nigeze kubaho umuyobozi w’abamotari mu Mujyi wa Huye; hari ibyagiye biba kandi na n’ubu biraba ugasanga umumotari akoze impanuka twamujyana kwa muganga tugasanga nta mituweli afite kumuvuza bikaduhenda ugasanga birasaba ko tumuteranyiriza inkunga.”

Abamotari bo mu Karere ka Huye baganiriye na IGIHE basabye ko mu byangombwa basabwa kugira ngo binjire muri koperative hakwitabwa no kuri mituweli.

Kuri ubu abamotari bose bakorera mu makoperative kugira ngo imikorere yabo igende neza.

Ubusanzwe ibyangombwa bisabwa kugira ngo umumotari yinjire muri koperative harimo indangamuntu, uruhushya rwo gutwara ikinyabiziga n’umugabane shingiro.

Bavuga ko koperative idakwiye kwishimira ko yakiriye umunyamuryango gusa ariko ubuzima bwe ntibwitabweho ngo ashishikarizwe no kugira ubwishingizi bw’ubuzima.

Mu mujyi wa Huye habarizwa koperative abyiri z’abamotari ari zo COTTAMOHU na CIM.

Perezida wa CIM, Hakizimana Athanase, yavuze ko bamaze kwemeranya ko bagiye kubyitaho kubera akamaro kabyo.

Ati “Muri ino minsi abantu twinjiza tubanza kureba ko bafite mituweli ariko hari abinjiye kera bamwe batazifite cyangwa zarangira ntibagure izindi. Twemeranyije ko tugiye gukora igenzura kuri buri wese akagira ubwisungane mu kwivuza.”

Perezida wa koperative COTTAMOHU, Bugingo Vedaste, we avuga ko mu rwego rwo gufasha abamotari kugira umutekano usesuye w’ubuzima bwabo biyemeje ko bazajya babatangira mituweli.

Ati “Twebwe twemeranyije ko abanyamuryango bose tuzajya tubatangira mituweli kandi muri koperative ni ko tubikora.”

Mu bamotari baganiriye na IGIHE hari abifuje ko no mu gihe Polisi ishinzwe umutekano wo mu muhanda ibahagaritse ibabaza ibyangombwa yajya ibabaza n’ikarita y’ubwisungane mu kwivuza.

Bifuza ko uwo muco wo kugira ubwisungane mu kwivuza wakwira n’ahandi mu gihugu ntihagire umumotari wemererwa kwinjira mu kazi adafite mituweli

Mu mujyi wa Huye hakorera abamotari barenga 1 000 barimo abakora ku manywa n’abakora mu ijoro.

Abamotari bo mu Karere ka Huye bifuza ko gutanga mituweli byakwitabwaho
Mu mujyi wa Huye hakorera abamotari barenga 1 000 barimo abakora ku manywa n’abakora mu ijoro
Bamwe mu bamotari bo mu Mujyi wa Huye

pru[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza