00:00:00 IGIHE NETWORK KN KINYARWANDA EN ENGLISH FR FRANCAIS

Hubakwe urukuta: Muzito wabaye Minisitiri w’Intebe wa RDC yubuye urwango ku Rwanda

Yanditswe na Iradukunda Serge
Kuya 15 June 2022 saa 02:05
Yasuwe :

Adolphe Muzito wigeze kuba Minisitiri w’Intebe wa Repubulika Iharanira Demokarasi ya Congo, yavuze ko kugira ngo igihugu cye kigire amahoro ari uko hakubakwa urukuta rugitandukanya n’u Rwanda.

Adolphe Muzito usanzwe umenyerewe mu mvugo zuje urwango ku Rwanda, yatangaje ibi mu nama nyunguranabitekerezo aherutse kugirana n’abayobozi bo mu nzego z’ibanze muri RDC barebera hamwe amategeko y’ubutaka.

Uyu mugabo usigaye ari Umuyobozi w’Ishyaka rya Nouvel Elan, yavuze ko kugira ngo RDC ikemure ibibazo ifite bizayisaba gushyira abasirikare ku mbibi zayo n’u Rwanda ndetse ikubaka n’urukuta ruyitandukanya n’iki gihugu cy’igituranyi.

Ati “Dushobora gushyira abasirikare ibihumbi 50 ku mbibi zidutandukanya na Uganda n’u Rwanda. Ku ruhande rw’u Rwanda dufite ubuso bwa kilometero 60 cyangwa 70 zo kubaka ubundi bikaba birarangiye, ahasigaye hose ni amazi cyangwa imisozi ariko ahantu hateye inkeke hangana na kilometero 60, twahakora urukuta rungana gutyo, ibya Uganda byo twaba tubireba neza mu gihe kiri imbere.”

Yakomeje avuga ko u Rwanda rufite gahunda yo kwirukana abaturage baba mu Burasirazuba bwa RDC rukahatuza abarwo babuze ubutaka bwo kubaho.

Ati U Rwanda binyuze mu gukoresha M23 rurashaka guca abaturage mu butaka bwacu bwo mu Burasirazuba ubundi rukahatuza abaturage bavuye hanze basanganywe ibibazo by’ubutaka. Ubu u Rwanda rutuwe n’abaturage 500 kuri kilometero kare, mu myaka 20 bazaba ari 1000 kuri kilometero kare. Kugira ngo dukemure iki kibazo burundu tugomba kubaka urwego rwacu rw’ingabo tukarugenera miliyari imwe y’amadolari cyane ko urwego rwacu mu bijyanye no gukusanya imisoro ruri kuzamuka.”

Si ubwa mbere Adolphe Muzito yumvikanye mu mvugo zibiba urwango hagati y’Abanyarwanda n’Abanye-Congo kuko no mu 2019 yigeze kuvuga ko kugira ngo amahoro aboneke n’ibibazo by’umutekano muke mu Burasirazuba bwa Congo birangire, ari uko batera u Rwanda kandi bakarufata bakarwomeka ku gihugu cyabo.

Muzito n’abandi banye-Congo bamwe na bamwe, umutekano muke umaze imyaka isaga 20 mu Burasirazuba bw’igihugu cyabo bakunze kuwutwerera u Rwanda mu rwego rwo gusibanganya amakosa yakozwe n’abayoboye icyo gihugu.

Kuzamba kw’ibintu kwahereye ku makosa ya Perezida Mobutu Sese Seko Kuku Ngbendu Wa Za Banga wayoboye icyo gihugu kuva mu 1965 kugeza 1997. Mu 1994 yahaye rugari abari bamaze gukora Jenoside mu Rwanda, batangira kwisuganya ngo bagaruke kurangiza Jenoside no guhungabanya ubutegetsi bushya bwari bumaze guhagarika Jenoside mu Rwanda.

Ibyo byatumye mu 1996 u Rwanda rwemera gufasha Laurent Desire Kabila n’ingabo ze, batangiza intambara yo kuvanaho Mobutu yarangiye mu 1997.

Nyuma y’umwaka umwe gusa, ikosa rya Mobutu ryasubiwemo na Kabila na we yitandukanya n’u Rwanda ahubwo amaso ayahanga imitwe ya ALIR yaje kuvamo FDLR, ayiha intwaro n’ibindi byangombwa ngo ibashe kugaruka gutera u Rwanda.

Ibyo byarakaje u Rwanda rusubira muri Congo mu ntambara yiswe iya kabiri ya Congo, igihugu kiba isibaniro ry’intambara yamaze imyaka ine ihuriyemo ibihugu bisaga bitanu.

Iyo ntambara yasize imitwe myinshi y’inyeshyamba muri Congo, imwe ari iy’imbere mu gihugu n’iyo mu mahanga, umutekano urushaho kuzahara mu Burasirazuba bw’icyo gihugu.

Joseph Kabila wagiye ku butegetsi nyuma y’urupfu rwa Se Desire Kabila mu 2001, na we ntiyabashije gutsinsura iyo mitwe yitwaje intwaro. Ahanini yakunze kugenda aruma ahuha ariko aza kugobekamo agakeregeshwa mu 2009 asinyana amasezerano n’u Rwanda, yaje gutuma habaho ibikorwa byo kurwanya imitwe y’inyeshyamba yitwaje intwaro irimo FDLR yakoreraga muri Congo Kinshasa byiswe "Umoja Wetu" na "Kimya II", hagamijwe ahanini gutsinsura uyu mutwe.

Icyo gihe abasirikare b’u Rwanda barenga 5000 binjiye ku butaka bwa Congo, batatanya abarwanyi ba FDLR agahenge kongera kugaruka yaba i Goma no mu nkengero z’umupaka i Rubavu.

Nubwo na byo bitaranduye ikibazo burundu ariko byacogoje imitwe y’inyeshyamba cyane cyane iyarwanyaga u Rwanda.

Adolphe Muzito yongeye kubura izi mvugo ze ku Rwanda nyuma y’uko umutwe wa M23 wongeye guhangana n’Ingabo za Leta kuko ushinja RDC kutubahiriza amasezerano bagiranye.

Guverinoma ya RDC yo ivuga ko uyu mutwe ushyigikiwe n’u Rwanda nubwo nta bimenyetso bifatika igaragaza.

Adolphe Muzito wigeze kuba Minisitiri w’Intebe wa Repubulika Iharanira Demokarasi ya Congo yavuze ko kugira ngo igihugu cye kigire amahoro ari uko hakubakwa urukuta rugitandukanya n’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .