00:00:00 IGIHE NETWORK KN KINYARWANDA EN ENGLISH FR FRANCAIS

Hibutswe abatutsi bajugunywe mu cyuzi cya Ruramira, hagaragazwa ubugome bwakoreshejwe

Yanditswe na Hakizimana Jean Paul
Kuya 18 April 2022 saa 07:50
Yasuwe :

Abaturage bo mu Murenge wa Ruramira mu Karere ka Kayonza, ubuyobozi n’imiryango ifite ababo bishwe bakajugunywa mu cyuzi cya Ruramira bibutse abishwe muri Jenoside yakorewe abatutsi bakajugunywa muri iki cyuzi.

Ni igikorwa cyabaye kuri iki Cyumweru tariki ya 18 Mata 2022 mu muhango watangijwe no kunamira abatutsi bajugunywe muri iki cyuzi, ubuyobozi n’imiryango yabuze ababo banashyira indabo muri iki cyuzi ndetse hanashyingurwa imibiri itandatu iheruka kugikurwamo.

Icyuzi cya Ruramira giherereye mu Karere ka Kayonza ni kimwe mu kifashishijwe mu kurimbura abatutsi muri Jenoside yakorewe abatutsi mu 1994.

Minisiteri y’Ubumwe bw’Abanyarwanda ivuga ko abarenga 4000 bakijugunywemo kuva tariki ya 9 Mata kugeza tariki ya 18 Mata.

Mu buhamya bwatanzwe na Ntazinda Augustin, wavuze mu izina ry’abafite ababo bashyinguwe mu Rwibutso rwa Jenoside yakorewe abatutsi rwa Ruramira, yavuze ko Abatutsi bajugunywe muri iki cyuzi bari baturutse impande zitandukanye.

Ngo harimo abavuye Mwulire, Rutonde, i Gasetsa, i Gikaya, Rwamagana Nyarusange n’ahandi henshi hatandukanye aho Interahamwe zabaga zihagaze kuri iki cyuzi zirindiriye kureba abashakaga kuhaca bahunze ngo zibajugunyemo.

Yavuze ko zabanzaga kubica abandi bakajugunywamo ari bazima.

Ntazinda yavuze ko benshi mu Nterahamwe zishe abatutsi zari zizi ko ngo zizagororerwa nkuko bamwe mu bishe Abatutsi mu 1960 ngo bagiye bagororerwa bagahabwa imyanya ikomeye mu buyobozi.

Perezida wa Ibuka mu Karere ka Kayonza, Ndindabahizi Didas, yashimiye Inkotanyi zagaruriye ubuzima n’icyizere abatutsi bicwaga.

Yashimiye Leta yashoboye gufasha abana bari imfubyi kongera kwiga, imiryango itari ifite aho kuba ikaba yarubakiwe kuri ubu ibintu bikaba bimeze neza.

Ati “ Ikindi dushimira cyane uyu munsi ni ijambo rikomeye rya Nyakubahwa Perezida wa Repubulika Paul Kagame rivuga ngo Never again, Jenoside ntizongera kubaho, ntituzongera kwicwa.”

Senateri Bideri John Bonds wari umushyitsi mukuru muri uyu muhango, yihanganishije imiryango ifite ababo biciwe mu Murenge wa Ruramira muri Jenoside yakorewe Abatutsi mu 1994.

Yavuze ko kwibuka ari uguha agaciro abishwe mu Jenoside ashimira ubufatanye bw’inzego zitandukanye bwatumye imibiri imwe y’Abatutsi bajugunywe mu cyuzi cya Ruramira iboneka igashyingurwa mu cyubahiro.

Ati “ Amateka y’ubwicanyi bwabereye hano ku cyuzi cya Ruramira n’ahandi mu gihugu, akwiriye kwandikwa kugira ngo urubyiruko n’abandi batazi ubwicanyi bwabereye aha n’ahandi hose mu gihugu bayamenye bibafashe kwirinda ibyabashora mu bikorwa bibi nk’ibi.”

Yasabye ko igikorwa cyo gushaka imibiri itari yaboneka cyakomeza kugira ngo na yo ishyingurwe mu cyubahiro.

Yavuze ko kandi kuri ubu u Rwanda ruhanganye n’abasize bahekuye igihugu bakomeje gushaka kugoreka amateka bakwirakwiza ingengabitekerezo ya Jenoside abenshi bakaba babarizwa mu mahanga.

Senateri Bideri yasabye ko abagikwirakwiza ingengabitekerezo ya Jenoside bakomeza gukurikiranwa mu nkiko zo mu Rwanda ndetse no mu mahanga bakagezwa imbere y’ubutabera.

Urwibutso rwa Jenoside yakorewe abatutsi ruherereye mu Murenge wa Ruramira, rushyinguwemo abatutsi 1280 harimo imibiri 283 yagiye ikurwa mu cyuzi cya Ruramira nyuma yo kugikamya.

Hashyinguwemo indi imibiri itandatu yaherukaga gukurwa muri iki cyuzi.

Icyuzi cya Ruramira cyifashishwaga mu kuhira imyaka y'abaturage cyajugunywemo abatutsi benshi
Bashyize indabyo ku nkombe z'icyuzi cya Ruramira cyajugunywemo Abatutsi muri Jenoside
Hunamiwe abatutsi bishwe bakajugunywa mu cyuzi cya Ruramira
Senateri Bideri yasabye ko ibikorwa byo gukamya iki cyuzi byongera bigasubukurwa
Imibiri y'abishwe muri Jenoside iherutse kuboneka yashyinguwe mu cyubahiro mu rwibutso rwa Ruramira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .