00:00:00 IGIHE NETWORK KN KINYARWANDA EN ENGLISH FR FRANCAIS

Hatangiye ibiganiro ku mwanzuro uzafatirwa Sgt Robert

Yanditswe na IGIHE
Kuya 17 May 2022 saa 01:20
Yasuwe :

Amakuru aturuka muri Uganda yemeza ko inzego za gisirikare n’iz’iperereza zatangiye ibiganiro ku mwanzuro ugomba gufatirwa Sgt Major Robert Kabera wahungiye ubutabera bw’u Rwanda muri icyo gihugu.

Ku wa Mbere, tariki ya 16 Gicurasi 2022 ni bwo byatangajwe ko Sgt Major Robert wabarizwaga mu Ngabo z’u Rwanda yatawe muri yombi i Kampala.

ChimpReports yatangaje ko kugeza ubu Sgt Major Robert afungiye ku cyicaro gikuru cy’Urwego rushinzwe Iperereza ryihariye giherereye mu Murwa Mukuru wa Kampala.

Amakuru aturuka muri iki gihugu avuga ko mu gitondo cyo kuri uyu wa Kabiri hateranye inama yahuje inzego z’igisirikare n’iz’iperereza ku mwanzuro ugomba gufatirwa uyu mugabo.

Hari gusuzumwa niba ashobora koherezwa mu Rwanda, gusa hari impungenge z’uko abanyamategeko ba Sgt Major Robert bashobora kwitambika iki cyemezo kuko yari yaramaze guhabwa icyemezo cy’ubuhunzi muri Uganda.

Uyu mugabo yatorotse igisirikare cy’u Rwanda mu 2020. Bikekwa ko tariki ya 21 Ugushyingo uwo mwaka, yasambanyije umwana we w’umukobwa ufite imyaka 15 mu rugo rwe ruri mu Murenge wa Ndera mu Karere ka Gasabo; nyuma yo gukora icyo gikorwa yahise aburirwa irengero.

Ubwo yari ageze muri Uganda, Sergeant Robert yagiranye ikiganiro n’Ikinyamakuru Daily Monitor cyo muri Uganda, aho yavuze ko yatorotse kubera impamvu za politiki no kurengera umutekano we.

Sgt. Maj. Kabera ni umuhanzi wakoze indirimbo zitandukanye zirimo izamamaye mu myaka icumi ishize nk’iyo yise “Impanda” n’izindi. Yagiye aririmba kandi izindi ndirimbo nyinshi zirata ubutwari bw’Ingabo z’u Rwanda dore ko ari n’umwe mu bari bagize itsinda ry’ingabo z’igihugu riririmba rizwi nka “Army Jazz Band”.

Sgt Major Robert uherutse gufatirwa muri Uganda ashobora koherezwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .