00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe umushinga wo kwita ku buzima bwo mu mutwe mu turere dutandatu

Yanditswe na Prudence Kwizera
Kuya 1 June 2022 saa 08:39
Yasuwe :

Umuryango Imbuto Foundation watangije umushinga witwa ‘Baho Neza Twite ku Buzima bwo mu Mutwe’ uzakorerwamo ibikorwa bitandukanye bigamije gukemura ibibazo bihungabanya ubuzima bwo mu mutwe bikaba byanatera uburwayi.

Uwo mushinga uzamara imyaka itatu watangirijwe mu Murenge wa Mata mu Karere ka Nyaruguru ku wa Kabiri, tariki ya 31 Gicurasi 2022.

Ni umushinga Imbuto Foundation izafatanya n’abandi bafatanyabikorwa bayo ukazakorera mu Turere twa Nyaruguru, Nyamasheke, Musanze, Bugesera, Nyagatare na Gasabo.

Ndejuru Radegonde wari uhagarariye Imbuto Foundation yavuze ko Umuryango Nyarwanda washegeshwe n’ingaruka za Jenoside yakorewe Abatutsi ndetse n’imibereho muri rusange bituma abantu bagira ibibazo bitandukanye birimo n’ibyo mu mutwe.

Ati “Amateka y’igihugu cyacu agaragaza ko umuryango washegeshwe n’ingaruka za Jenoside ndetse n’imibereho muri rusange. Ni yo mpamvu kuva mu 1994 igihugu cyacu cyashyize ingufu mu kongera gusana umuryango n’igihugu muri rusange. Umuryango rero ni ryo shingiro ry’Abanyarwanda, ni ryo shingiro ry’igihugu cyacu.”

Yavuze ko mu myaka 20 Umuryango Imbuto Foundation umaze, wiyemeje gutanga umusanzu wawo mu iterambere n’imibereho myiza y’abaturage, ubinyujije mu muryango n’ibyiciro byose by’ubuzima bw’abawugize.

Yagarutse kuri gahunda zitandukanye za Imbuto Foundation zirimo kwita ku mubyeyi utwite n’umwana kugeza igihe agize imyaka itandatu y’amavuko binyuze muri gahunda mbonezamikurire y’abana bato; gahunda zita ku cyiciro cy’ubugimbi n’ubwangavu; iz’urubyiruko n’izo kwita ku muryango muri rusange.

Ati “Mu kureba rero no kwita ku muryango twasanze bimwe mu byo twakora byawufasha kurushaho ari ukwita ku buzima bwiza bwo mu mutwe bw’abawugize.”

Yakomeje agira ati “Baho Neza rero ni gahunda igamije guteza imbere ubuzima bwiza bwo mu mutwe, duhereye ku kwita ku buzima bw’umubyeyi n’umwana no kugira umuryango ushoboye kandi utekanye.”

Kubungabunga ubuzima bwo mu mutwe bihera mu muryango

Ndejuru yabwiye abaturage bo mu Karere ka Nyaruguru ko kwita ku buzima bwo mu mutwe no kububungabunga bihera mu muryango nk’uko abahanga babigaragaje, abasaba ko birinda ibishobora kububangamira.

Ati “Bimwe muri byo ni ibibazo by’amakimbirane mu muryango, kutita no kudateganyiriza abana bacu, kugwingira kw’abana, inda ziterwa abangavu, bibazo by’ihohoterwa rikorerwa mu ngo n’ihohoterwa rishingiye ku gitsina, abantu babana n’agahinda gakabije, cyane cyane abarokotse Jenoside yakorewe Abatutsi , ikoreshwa ry’ibiyobyabwenge mu rubyiruko n’ibindi.”

Uko umushinga uzashyirwa mu bikorwa

Ndejuru yasobanuye ko umushinga uzashyirwa mu bikorwa binyuze mu bukangurambaga mu mirenge itandukanye y’uturere uzakoreramo, hagamijwe guhindura imyumvire iganisha ku buzima bwiza bwo mu mutwe no kumva ko kugana izo serivisi nta pfunwe ririmo.

Hazatangwa serivisi z’ubuzima bwo mu mutwe zitangiwe aho abaturage batuye, bikorwe mu matsinda cyangwa ku muntu ku giti cye.

Ati “Zizajya zitangirwa ahantu hizewe kandi mwihitiyemo. Aho bamwe bakunze kwita icyanya gitekanye.”

Izo serivisi zizajya zitangwa n’Abajyanama ku buzima bwiza bwo mu mutwe bazabihugurirwa. Ayo matsinda azajya yunganirwa n’impuguke mu kwita ku buzima bwiza bwo mu mutwe ndetse n’abaganga bo ku bigo nderabuzima.

Hazabaho gutanga serivisi z’ubuzima bwo mu mutwe ku kigo nderabuzima, cyane cyane muri gahunda zita ku buzima bw’umubyeyi n’umwana; gutanga serivisi za Isange One stop Center hitabwa cyane ku bahuye n’ihohoterwa.

Hazabaho kandi no kwita ku byiciro byihariye byugarijwe n’ibibazo by’ihungabana n’izindi ndwara zizahaza ubuzima bwo mu mutwe.

Ati “Nitwita ku buzima bwiza bwo mu mutwe, tukagira umuryango utekanye, umubyeyi utwite akagira amahoro, uwo atwite azakura akunda abantu, atigunga, ashaka ibisubizo mu bigoye yanyuramo, na we azubake umuryango ushoboye kandi utekanye maze twubake u Rwanda ruhamye koko.”

Bamwe mu baturage bo mu Murenge wa Mata i Nyaruguru bagaragaje ko bafite ibibazo bitandukanye bituma babaho bahangayitse badatekanye.

Uwineza Chantal yatewe inda imburagihe bituma ava mu ishuri, ahura n’ibibazo by’ihungabana.

Ati “Hari igihe ureba mugenzi wawe ari ku ishuri ukumva urihebye ngo ‘nanjye iyo mba ndi kwiga nari kugira ubuzima bw’ejo hazaza’. Natwe rero urubyiruko rwa Mata twifuza ko mwadufasha gukira ibyo bikomere.”

Ujya gukira indwara arayiganira

Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho Myiza y’Abaturage, Ingabire Assoumpta, yasabye abaturage kuzitabira gahunda z’umushinga wo kwita ku buzima bwo mu mutwe kugira ngo zibagirire akamaro.

Ati “Urabona uburyo bitabiriye ku nshuro ya mbere bagafunguka bakavuga, ni ibi tubasaba igihe habaye amatsinda bakayitabira, serivisi zizamanuka zo kubatega amatwi bakabagira inama. Uwo bazasanga afite uburwayi bukeneye umuganga wihariye bazajya bamwoherezayo. Ni ukubyitabira bakaza bakaboneka kuko abazabikora ni inzobere mu buzima bwo mu mutwe. Bakwiye kuza bakabafasha kuko ni cyo umushinga ugamije.”

Yasabye abayobozi mu nzego z’ibanze kwita ku gukemura ibibazo by’abaturage no kubatega amatwi kuko hari ibyo bamarana igihe kirekire bikabaremerera bikaba byabatera guhungabana mu buzima bwo mu mutwe.

Abaturage bibukijwe mu Kinyarwanda baca umugani bagira bati ‘Ujya gukira indwara arayiganira’ bishatse kuvuga ko uruhare rw’umuntu ku giti cye ari ingenzi mu kugaragaza ibibazo afite kugira ngo habeho ubufatanye mu kubishakira ibisubizo.

Muri uwo mushinga uzamara imyaka itatu hazakirwa buri wese uzawugana akeneye ubufasha bwo kwitabwaho.

Ndejuru Radegonde wari uhagarariye Imbuto Foundation yavuze ko Umuryango Nyarwanda washegeshwe n’ingaruka za Jenoside yakorewe Abatutsi n’imibereho muri rusange bituma abantu bagira ibibazo birimo n’ibyo mu mutwe
Uwakeneraga serivisi zijyanye n'ubuzima bwo mu mutwe yazihabwaga
Urubyiruko rwaririmbye indirimbo zikangurira abantu kwirinda ibihungabanya ubuzima bwo mu mutwe
Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho Myiza y’Abaturage, Ingabire Assoumpta, yasabye abaturage kuzitabira gahunda z’umushinga ugamije kwita ku buzima bwo mu mutwe
Ni igikorwa cyitabiriwe n'abayobozi batandukanye
Bibukijwe ko kubungabunga ubuzima bwo mu mutwe bihera mu muryango
Hatangijwe umushinga wo kwita ku buzima bwo mu mutwe mu turere dutandatu
Basabwe kwirinda ibibazo birimo amakimbirane yo mu ngo kuko biri mu bitera ibibazo byo mu mutwe
Bamwe mu bafatanyabikorwa ba Imbuto Foundation muri uwo mushinga
Babajije ibibazo bitandukanye bijyanye n'imibereho yabo
Abitabiriye bahawe umwanya wo gutanga ibitekerezo
Abaturage basabwe kwitabira ibikorwa bibafasha kugira ubuzima bwo mu mutwe bwiza
Abaturage basuzumwe indwara zitandukanye zigira aho zihurira n'ubuzima bwo mu mutwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .