Hatangijwe umushinga wa miliyoni 900 Frw w’ubufatanye bwa Kaminuza zo mu Rwanda n’iz’i Burayi

Yanditswe na Twarabanye Venuste
Kuya 17 Gashyantare 2020 saa 07:58
Yasuwe :
0 0

Umuryango w’Ubumwe bw’u Burayi (EU) watangije umushinga w’ubufatanye hagati ya Kaminuza enye zo mu Rwanda n’eshatu z’i Burayi, uzafasha abanyeshuri b’abanyarwanda kujya guhaha ubumenyi mu byerekeye Ubumenyi mu bijyanye n’ibiribwa, Ikoranabuhanga no kurengera ibidukikije muri izo kaminuza no kubona abarimu baziturutsemo baza kubigisha mu Rwanda.

Ni umushinga uzatwara miliyoni 900 Frw mu myaka itatu uzamara. Ugamije guteza imbere uburezi muri kaminuza mu masomo yihariye hagamijwe iterambere rirambye (Enhancement of Rwandan Higher Education in strategic fields for sustainable growth:EnRHEd).

Ku mugabane w’i Burayi hasanzwe hari gahunda izwi nka Erasmus+ ifasha abanyeshuri baturutse muri kaminuza zitandukanye guhura bakungurana ubumenyi. Umunyeshuri ava muri Kaminuza akajya mu yindi afite ibyo ahakorera mu gihe runaka. Ahavana ubumenyi atari asanzwe abona no kumenyana n’abantu.

Ibyo nibyo bizaba hagari ya Kaminuza y’u Rwanda, INES Ruhengeri, Ishuri ry’Imyuga n’Ubumenyingiro rya Musanze (IPRC Musanze) na kaminuza y’ikoranabuhanga n’Ubugeni ya Byumba (UTAB) zo mu Rwanda na kaminuza ya Parma yo mu Butaliyani, Rheinische Fachhochschule University of Applied Science Cologne - RFH yo mu Budage na Liège mu Bubiligi.

Ambasaderi wa EU mu Rwanda, Nicola Bellomo yavuze ko gutangiza uwo mushinga biri muri gahunda ya EU ya Erasmus+ no gushyigikira gahunda ya leta y’u Rwanda yo kubaka ubushobozi bw’umuturage mu cyerekezo cyo kuzamura ubukungu bw’igihugu.

Ati “Bijyanye n’intego za EU zo gushyigikira ingufu u Rwanda ruri gushyira mu kongerera ubushobozi abaturage. Kuko umuturage ushoboye niwe shingiro ry’iterambere ry’igihugu kandi mu Rwanda umutungo ukomeye w’igihugu ni abanyarwanda.”

Umuyobozi muri Kaminuza y’u Rwanda ushinzwe amasomo n’u Bushakashatsi, Emile Bienvenue yavuze ko nka Kaminuza y’u Rwanda basanze bikenewe kwinjira muri Erasmus+. Yavuze ko buri Kaminuza bayihisemo kubera impamvu y’igikenewe mu bumenyi bw’abanyarwanda muri gahunda igihugu gifite.

Yavuze ko bahisemo Kaminuza ya Parma yo mu Butaliyani kubera iteye imbere muri Siyansi yerekeye ibiribwa, Kaminuza ya Cologne yo mu Budage bayihitamo kubera iteye imbere mu bidukikije naho Liège yo mu Bubiligi bayihitamo kubera ariyo iyoboye ku mugabane w’i Burayi mu bijyanye n’ikoranabuhanga mu burezi.

Ati “Muri kaminuza y’u Rwanda twasanze iyi gahunda ikenewe kuko itaragera muri Afurika niyo mpamvu twakoranye na Kaminuza zo mu Budage, u Butaliyani n’u Bubiligi kugira ngo tuyizane mu Rwanda.”

Itsinda rya Kaminuza z’i Burayi zaje gutangiza umushinga ryakiriwe na Ambasaderi wa EU mu Rwanda iwe mu rugo Kacyiru ku mugoroba wo kuri iki Cyumweru tariki 16 Gashyantare 2020.

Itsinda ritangiza umushinga ryakiriwe mu rugo rwa Ambasaderi wa EU mu Rwanda
Kaminuza zizajya zihana abarimu bamarane igihe n'abanyeshuri
Roberto Valentino ukomoka muri Kaminuza ya Parma yo mu Butaliyani yatangiye kwigisha mu Rwanda muri uyu mushinga wa EU n'u Rwanda.CR2
Wabaye umugoroba wo kuganira nk'abantu bahuriye mu mushinga umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .