Iyi politike yiswe ‘Entrepreneurship Development Policy (EDP)’ yatangijwe kuri uyu wa 30 Ugushyingo yubakiye ku nkingi zirindwi arizo ubufasha mu bijyanye n’abakozi n’imicungire y’ikigo, inyunganizi mu bijyanye n’ubucuruzi, gutera inkunga ubucuruzi, gushyiraho imikorere yorohereza ubucuruzi, ubufasha mu bijyanye n’amasoko, ikoranabuhanga n’ibikorwaremezo ndetse n’ubutoza mu bijyanye no kuba rwiyemezamirimo.

Ni politike Minisiteri y’Ubucuruzi n’Inganda izakorana n’abafatanyabikorwa batandukanye, hagamijwe kuzamura urwego rw’abikorera mu Rwanda. Ubwo iyi politike yatangizwaga abafatanyabikorwa bayo baganiriye ku ngingo zitandukanye zijyanye n’uburyo izashyira mu bikorwa.

Minisitiri w’Ubucuruzi n’Inganda, Hakuziyaremye Soraya, yavuze ko yitezweho kurushaho gufasha ba rwiyemezamirimo mu bikorwa byabo bitandukanye.

Yagize ati "Guhanga imirimo byabaye kimwe mu by’ingenzi bigize ingamba zo guteza imbere ubucuruzi n’ubukungu. Nta gushidikanya ko guhanga imirimo ari kimwe mu by’ingenzi bizagira uruhare mu kugabanya ubukene, kuzana impinduka mu mibereho, gushimangira gahunda yo guhanga udushya no guteza imbere ubukungu."

"EDP ifite intego yo gutanga uburyo bukomatanyirije hamwe bugamije gufasha ba rwiyemezamirimo kubona uburyo bwo gukoreramo bufasha urwego rw’abikorera gutera imbere, guhanga udushya ndetse no kwirengera ingaruka bikenewe cyane muri iki gihe cy’ubukungu butera imbere mu buryo bwihuse."

Minisitiri Hakuziyaremye yavuze ko kugira ngo ishyirwa mu bikorwa ry’iyi politike rizagende neza hakenewe uruhare rw’ibigo bya Leta n’iby’abikorera.

Minisitiri w'Ubucuruzi n'Inganda Hakuziyaremye Soraya yavuze ko iyi politike ije kugira ngo ba rwiyemezamirimo bafashwe kurushaho kunoza ibyo bakora

Minisitiri Hakuziyaremye, Minisitiri Musoni Paula na Guverineri wungirije wa BNR Nsanzabaganwa bitabiriye itangizwa ry'iyi politike

Habayeho ibiganiro bigamije kurebera hamwe inyungu ziri muri iyi politike