Hatangijwe ikoranabuhanga rizafasha kugenzura ko abacamanza buzuza inshingano ku gihe

Yanditswe na Evariste Nsengimana
Kuya 25 Ugushyingo 2019 saa 01:13
Yasuwe :
0 0

Perezida w’Urukiko rw’Ikirenga Prof Sam Rugege, yatangije ku mugaragaro ikoranabuhanga rifasha kugenzura no gukurikirana imikorere y’abakozi b’Inkiko n’ibikorwa byazo hagamijwe ko buri wese anogerwa na serivisi z’ubutabera.

Iri koranabuhanga ryitwa ‘Judicial Performance and Monitoring Evaluation System’ ryatangijwe kuri uyu wa 25 Ugushyingo 2019, umuhango wahuriranye no gutangiza icyumweru cy’ubucamanza mu Rwanda.

Ni urubuga buri mukozi w’urwego rw’ubucamanza azajya yinjiramo akuzuzamo raporo y’ibikorwa bye, nyuma hakagenzurwa niba ibyo yasabwaga gukora yarabikoze uko bikwiye nta bukererwe cyangwa uburangare yagize.

Umukozi w’Urukiko rw’Ikirenga ushinzwe gusesengura ibikorwa akaba n’inzobere mu by’ikoranabuhanga, Karungi Niceson, yavuze ko iri koranabuhanga ryubatse ku buryo n’ibindi bikorwa n’imirimo y’abakozi b’inkiko ikorwa bizajya bigenzurwa.

Ati “Niba umucamanza yagombaga gusoma urubanza mu minsi 30 nyuma yo kurupfundikira, iri koranabuhanga ni nk’ijisho rireba niba urubanza yararusomye mu minsi 30. Yaba atararusomye rukabigaragariza umuyobozi.”

Rizajya rinashyirwamo raporo y’uko imanza zasomwe cyangwa zarangijwe n’imbogamizi zabaye kugira ngo hamenyekane niba nta burangare bwabayeho.

Ni kimwe no ku bandi bakozi b’uru rwego kuko ruzajya rugenzura ibikorwa byabo niba byarakozwe uko bikwiye. Urugero niba urwego rw’ubucamanza bwariyemeje kugurira mudasobwa abacamanza bose ku itariki runaka, ruzajya rugenzura niba yarabikoreye ku gihe yaba atarabikoze rugaha amakuru umuyobozi we.

Prof Sam Rugege yavuze ko uru rubuga rushinzwe gukurikirana no kugenzura imikorere y’abacamanza izafasha kugenzura abakora neza bagashimwa n’abatanga umusaruro mucye bakareba aho bipfira, basanga ari amakosa yabo bakabihanirwa.

Yavuze ko gukurikirana no kugenzura imikorere y’abacamanza bigiye koroshywa n’uru rubuga byisumbuye, abantu bakarushaho kwishimira ubutabera.

Ati “Ubundi twabireberaga ku rukiko rwose, tukabirebera hamwe muri rusange ariko uburyo bwo gukurikirana imikorere ya buri wese kugira ngo turebe ibyo yakoze, uko yabikoze hanyuma niba hari ibisobanuro agomba gusabwa akabisabwa.”

Yakomeje agira ati “Turabona bizadufasha kwihutisha imanza cyane cyane ko buri wese azi ko ibyo arimo gukora birimo gukurikiranwa ku ikoranabuhanga.”

Prof Rugege yavuze ko umwaka uzajya urangira hagatangwa amakuru, abakoze neza bagashimwa naho abagize uburangare bakareba icyabibateye baba ari abakeneye amahugurwa bakayahabwa ndetse n’ababitewe n’uburangare bakabiryozwa.

Iri koranabuhanga rije ryiyongera ku ryo u Rwanda rwatangiye muri Mutarama 2016, rifasha abantu gutanga ibirego bifashishije ikoranabuhanga ryitwa “Integrated Electronic Case Management System”(IECMS).

Iri ryatumye imanza zadindiye hagati ya 2011-2012 ziva ku 18416 mu manza 42670 zari zashyikirijwe inkiko zigera ku 4857 mu 20874 zari zakiriwe hagati ya 2016-2017.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .