Hatangijwe icyumweru cyahariwe kurwanya ruswa, inzego zitandukanye zizafatanya gushaka icyakorwa ngo icike

Yanditswe na Uwimana Abraham
Kuya 10 Ukuboza 2020 saa 05:15
Yasuwe :
0 0

Urwego rw’Umuvunyi rwatangije Icyumweru cyahariwe kurwanya ruswa, kizabamo ibikorwa bitandukanye birimo ibiganiro bigamije gushishikariza inzego zitandukanye n’abaturage kurebera hamwe icyakorwa kugira ngo ruswa icike.

Muri iki cyumweru cyatangijwe ku wa 9 Ukuboza 2020, giteganyijwemo n’amarushanwa y’abanyamakuru n’umukino w’umupira w’amaguru, mu rwego rw’ubukangurambaga.

Itangizwa ry’Icyumweru cyahariwe kurwanya ruswa ryahuriranye no kwizihiza Umunsi Mpuzamahanga wo Kurwanya Ruswa ufite insanganyamatsiko igira iti “Twese hamwe, ntawe usigaye inyuma turwanye ruswa”; kizasozwa ku wa 22 Ukuboza 2020.

Umuvunyi Mukuru w’u Rwanda, Nirere Madeleine, yavuze ko muri iki cyumweru bateguyemo ibikorwa bitandukanye birimo ibiganiro n’inzego zitandukanye ndetse n’ubukangurambaga mu baturage, byose bigamije kurebera hamwe icyakorwa kugira ngo ahakigaragara ibyuho bya ruswa bikumirwe.

Yagize ati “Harimo ibikorwa bitandukanye, harimo ibiganiro ku ruhare rw’umuturage mu kurwanya ruswa, hari ubufatanye bw’inzego mu kugaruza umutungo ukomoka kuri ruswa, hari na none ubutumwa buzatangwa binyuze mu mupira w’amaguru uzahuza Rayon Sports na APR FC.”

Yakomeje avuga ko hari n’ibindi bikorwa bizaba birimo kwizihiza Umunsi wahariwe Itangazamakuru hagamijwe kurwanya ruswa, aho hazahembwa abanyamakuru bagize uruhare mu kwandika inkuru zo kurwanya ruswa, hakazaba n’inama nyunguranabitekerezo ku byuho bya ruswa muri serivisi z’ubutaka n’icyakorwa.

Umuvunyi Mukuru Nirere yavuze ko hakwiye kongerwa imbaraga mu gukora ubukangurambaga bukangurira abantu kugira umuco wo kurwanya ruswa no gutoza urubyiruko ruto rugakurana indangagaciro Nyarwanda no kwanga umugayo.

Ati “Tukaba dusaba inzego gushyira mu bikorwa izi ngamba zafashwe zigamije kurwanya ruswa, cyane cyane ariko kwigisha abaturage, niba dushaka ko kurwanya ruswa biba umuco byagombye guhera hasi mu rubyiruko, mu nzego zitandukanye aho tunyura cyangwa aho dukorera dufite aho duhurira n’urubyiruko twese.”

Yongeyeho ati “Ni byiza rero ko tubifata nk’umukoro ko twese mu nzego zacu zitandukanye, tugiye kwihatira kwigisha abaturage, tukabakangurira ububi bwa ruswa n’ingaruka zayo, maze tugakomeza tukiyubakira igihugu.”

Ikibazo cya ruswa muri serivisi z’ubutaka cyagaragajwe nk’ikigiteye impungenge, aho Umuyobozi wa Transparency International Rwanda (TIR), Ingabire Marie Immaculée, yavuze ko hari n’ahazamo ibisa n’ubugome.

Yagize ati “Muri biriya byangombwa byo kubaka harimo ruswa nyinshi cyane, rwose kandi harimo n’ubugome, kuko hari ubwo babibaha babizi ko amaherezo bazabasenyera, umuturage bamwaka ruswa akayitanga bwacya bakamusenyera, uwo muntu we abakwiye guhanwa kabiri kuko ni n’umugome.”

Raporo y’ibikorwa by’Urwego rw’Umuvunyi y’umwaka wa 2019-2020 yagaragaje ko muri rusange ibibazo rwakiriye mu 2019-2020, birimo iby’akarengane 3,360 muri byo 640 ni ibyakiriwe mu nyandiko, aho 207 muri byo bihwanye na 32.4% ni ibirebana n’ubutaka.

Mu bindi bibazo byakiriwe harimo ibibazo bireba imanza zitarangizwa ku gihe bingana na 22%, ibibazo bijyanye na serivisi z’imari bingana 11%, ibibazo bijyanye no kwimura abantu ku nyungu rusange bingana na 8%, hari kandi ibibazo birebana n’imitungo itari iy’ubutaka, ibibazo by’imibereho myiza y’abaturage n’ibindi.

Uretse ibi byakiriwe binyuze mu nyandiko, hari n’ibindi bibazo uru rwego rwakiriye binyuze muri za “Cyber Café” bakorana hirya no hino mu gihugu, hakaba n’ibibazo 2033 byakiriwe muri gahunda yo gukumira no kurwanya akarengane mu turere, muri byo 50% byahise bikemurwa ibindi bisigirwa uturere ngo tubikurikirane.

Umuvunyi Mukuru w’u Rwanda, Nirere Madeleine, yavuze ko mu cyumweru cyahariwe kurwanya ruswa, hateganyijwe kuba inama nyunguranabitekerezo igamije kureba ku byuho bya ruswa muri serivisi z’ubutaka ndetse n’icyakorwa.

Yagize ati “Aho rero tuzaganira uburyo amategeko agenga ubutaka ashyirwa mu bikorwa n’ingamba zihari, kuko kurwnya ruswa bitareba inzego runaka gusa ahubwo biratureba twese.”

Minisitiri muri Perezidansi ya Repubulika, Uwizeye Judith, yavuze ko Leta ikomeje gushyira imbaraga mu kurwanya ruswa no kugerageza kugaruza umutungo wayo uba waribwe cyangwa waranyerejwe, akenshi ngo uribwa ukajya guhishwa mu bihugu by’amahanga ukabiteza imbere, aho wagateje imbere igihugu.

Yavuze ko n’ubwo mu Rwanda nta bushakashatsi burakorwa ngo bwerekane igihombo leta igira buri mwaka bitewe na ruswa, ariko hashingiwe kuri raporo y’Umugenzuzi Mukuru w’Imari ya Leta, bigaragara ko hakiri imicungire mibi y’umutungo wa Leta, igateza igihombo gishobora kuba gifitanye isano na ruswa.

Yagize ati “Mu by’ukuri inzego zose zari ziri hano twabiganiriyeho, ariko tutirengagije n’ikibazo gikomeye cy’imitungo ihishwa, imitungo irahishwa haba hano mu gihugu cyangwa se no hanze y’igihugu, ariko amakuru agiye atangwa ku nzego zose, abaturage twese tukabigiramo uruhare, turizera ko umutungo wabasha kugaruzwa ku kigereranyo twifuza.”

Leta yagiye ishyiraho amategeko kugira ngo umutungo wayo wibwe ushobore kugaruzwa, ndetse yiyemeje kugaruza umutungo wibwe nibura ku kigero cya 90% mu mwaka wa 2023/2024. Kugeza ubu imaze kugaruza asaga miliyari 4 Frw kuva iyi gahunda yatangira.

Minisitiri muri Perezidansi ya Repubulika, Uwizeye Judith, yavuze ko intambwe yatewe mu kurwanya ruswa ari nziza ariko hagikenewe izindi mbaraga
Umunsi Mpuzamahanga wo Kurwanya Ruswa wari witabiriwe n'abo mu nzego zitandukanye zifite aho zihuriye no kurwanya ruswa
Umuvunyi Mukuru w'u Rwanda, Nirere Madeleine, yavuze ko hakwiye kwiyongeraho uruhare rw'abaturage mu kurwanya ruswa
Byagaragajwe ko u Rwanda ruhagaze neza mu kurwanya ruswa ariko ngo imbaraga ziracyakenewe kugira ngo icike
Hagaragajwe ko hagikenewe kongerwa imbaraga kugira ngo umutungo wa Leta unyerezwa ubashe kugaruzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .