Hatangajwe amatariki yo gusezeraho bwa nyuma Dr Vuningoma James wayoboraga RALC

Yanditswe na Uwiduhaye Theos
Kuya 22 Mutarama 2020 saa 10:22
Yasuwe :
0 0

Ku wa 20 Mutarama 2020, u Rwanda rwahombye Dr Vuningoma James wari intiti mu ndimi binagaragazwa n’ibigo bikomeye yakozemo yaba mu Rwanda no hanze yarwo.

Uyu mugabo witabye Imana afite imyaka 72 yari Umuyobozi w’Inteko Nyarwanda y’Ururimi n’Umuco(RALC) kuva mu 2012 yashingwa. Yagarutse mu Rwanda ku wa Gatanu w’Icyumweru gishize nyuma yo kuva mu Buhinde kwivuze umuvuduko w’amaraso.

Dr Vuningoma azashyingurwa ku wa 25 Mutarama 2020, aho saa 8: 30 bazajya gufata umurambo we ku bitaro byitiriwe Umwami Faisal aho aruhukiye. Ku isaha ya saa tanu hazabaho umuhango wo gusezera ku murambo mu rugo iwe ku Kacyiru, saa saba kugera saa cyenda asengerwe mu rusengero rw’Abangirikani i Remera mu Giporoso mu gihe guhera ku isaha ya saa kumi aribwo azashyingurwa i Rusororo.

Dr Vuningoma yakoze imirimo itandukanye mu nzego zinyuranye z’igihugu yaba mu rwego rw’uburezi no mu bijyanye n’umuco. Yabaye Umuyobozi Mukuru wungirije w’iyari Kaminuza yigisha Inderabarezi, KIE.

Inshingano nyinshi yakoze zishingiye ku bwarimu, yari afite Impamyabushobozi y’Ikirenga mu masomo nyafurika cyane cyane ubuvanganzo nyemvugo n’ubuvanganzo nyandiko.

Mbere y’uko ajya gukora muri RALC, yabaye umwarimu kuva ubwo yarangizaga muri Kaminuza ya Makerere ndetse n’iya Bordeaux mu Bufaransa ari naho yakuye Masters na PhD.
Icyiciro cya kabiri cya Kaminuza yakirangije mu by’indimi n’uburezi mu bijyanye n’Amateka, Igifaransa, Icyongereza na Filozofiya; icyo gihe arangije yahise ajya kwigisha mu mashuri yisumbuye.

Arangije PhD, yigishije muri KIE ibijyanye n’Ubuvanganzo Nyafurika, ndetse ubumenyi yakuye mu mashuri bwamuhaga ubushobozi bwo kuba yakwigisha mu gihugu kivuga Igifaransa cyangwa Icyongereza.

Yari umuntu ukunda gukorana n’itangazamakuru, agatanga ibiganiro bigaruka ku muco nyarwanda. Usibye uburezi n’iby’umuco, Vuningoma yakoze no muri The NewTimes, nk’umuntu ushinzwe kugenzura inkuru mbere y’uko zitambuka.

Ku wa 18 Mutarama 2018, Dr Vuningoma yashyizwe n’Inama y’Abaminisitiri mu bagize Inama y’Ubutegetsi y’Inama Nkuru y’Itangazamakuru.

Indi nkuru wasoma: Dr Vuningoma James wayoboraga RALC yitabye Imana

Dr Vuningoma James azashyingurwa ku wa 25 Mutarama 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .