Hashyizweho ikigega cya miliyari 9 Frw azatuma impunzi zibona inguzanyo zikoroherezwa kwishyura

Yanditswe na Uwimana Abraham
Kuya 1 Ukuboza 2020 saa 09:20
Yasuwe :
0 0

Leta y’u Rwanda ku bufatanye na Banki y’Isi binyuze mu mushinga wiswe “Jya Mbere”, yashyizeho ikigega cya 9.000.000 $, ahwanye na miliyari 9 Frw, acungwa na Banki Itsura Amajyambere y’u Rwanda (BRD), agamije gufasha impunzi ndetse n’abaturage baturiye inkambi z’impunzi kwishyura inguzanyo bahabwa n’ibigo by’imari.

Muri uyu mushinga wa “Jya Mbere” icyiciro cya kabiri, BRD izajya ikorana n’ibigo by’imari bisanzwe bikorana n’abaturage bo mu turere turimo inkambi z’impunzi, kugira ngo impunzi ndetse n’abaturage bo muri utwo turere bahabwe inguzanyo, BRD ibunganire mu kuzishyura.

Ku ikubitiro, BRD yasinyanye amasezerano na AEC RT (Africa Entrepreneur Collective Rwanda Trustee Company Ltd.), isanzwe ifasha cyane imishinga ikorwa n’impunzi, ndetse na Banki y’Abaturage y’u Rwanda (BPR Plc), hakaba hitezwe no kwakira ubusabe bw’ibindi bigo byifuza kwinjira muri iyi gahunda.

Uyu mushinga wa “Jya Mbere”, uzakorana n’uturere dutandatu dusanzwe turimo inkambi z’impunzi, ari two Kirehe, Gatsibo, Gicumbi, Gisagara, Nyamagabe ndetse na Karongi, aho abaturage ndetse n’impunzi batuye muri utwo turere, bazajya basaba inguzanyo mu bigo by’imari byasinyanye na BRD, bazajya bunganirwa mu kuzishyura.

Impunzi ndetse n’abaturage bo muri utwo turere bazajya bunganirwa bitewe n’ingano y’inguzanyo bahawe, aho ku nguzanyo iri munsi ya miliyoni 5 Frw, umuntu zajya abona nkunganire (grant) ya 50%.

Hagati ya miliyoni 5 Frw na miliyoni 25 Frw, umuntu azajya abona nkunganire ya 40%, ni ukuvuga ko azajya yishyura 60%, andi BRD ikayamwishyurira, naho inguzanyo iri hejuru ya miliyoni 25 Frw, umuntu azajya yunganirwa 30%.

Uhagarariye ibikorwa by’Umushinga wa “Jya Mbere” muri BRD, Karemera Claire, yavuze ko uyu mushinga ugamije guteza imbere Abanyarwanda no kubageza ku iterambere, ndetse unagamije gufasha impunzi kwigira.

Ati “Gushyira mu bikorwa uyu mushinga ni ikintu cyiza n’ubundi kijyanye n’inshingano BRD ifite, BRD ifite mu nshingano zayo guteza imbere Abanyarwanda bose bakagera ku iterambere ryifuzwa, dukurikije gahunda ya Leta.”

Umunyamabanga Uhoraho muri Minisiteri Ishinzwe Ibikorwa by’Ubutabazi (MINEMA), Kayumba Olivier, yavuze ko uyu mushinga ugamije gutuma impunzi zigira, zikibeshaho zidategereje inkunga, ndetse uzanafasha mu kwagura ibikorwaremezo mu turere turimo inkambi z’impunzi.

Yagize ati “Byerekeye gufasha impunzi kwigira, bakazashingira ubucuruzi bituma bibeshaho badategereje imfashanyo iva muri HCR cyangwa mu yindi miryango.”

Uyu mushinga wa “Jya Mbere” washyizweho na Leta y’u Rwanda, ugabanyijemo ibyiciro bine, BRD ikaba iri gushyira mu bikorwa icyiciro cya kabiri gihwanye na Miliyoni 9 z’amadolari, mu gihe umushinga wose ufite agaciro ka miliyoni 60$, ukazamara igihe cy’imyaka itanu.

Kayumba Olivier yavuze ko uretse iki cyiciro cya kabiri kigamije gufasha impunzi n’abaturiye inkambi z’impunzi kubona no kwishyura inguzanyo, hari n’icyiciro cya mbere kizafasha mu kwagura ibikorwaremezo mu turere turimo inkambi z’impunzi.

Ati “Uretse igice cya kabiri, hari igice cya mbere kizajya gifasha ahatuye impunzi, mu turere dutandatu, bazagezayo ibikorwaremezo, harimo imihanda, harimo amavuriro, harimo kongera ibyumba by’amashuri, harimo kongera amazi agera muri utwo duce, hari ndetse n’amavuriro amwe n’amwe tuzongera ibikoresho.”

BRD yishimiye uyu mushinga, ndetse inashimira ibigo by’imari byafashe iya mbere mu kwitabira ubu bufatanye, ndetse inashishikariza ibindi bigo by’imari nabyo kuza kwitabira uyu mushinga, kugira ngo bifashe abaturage kugera ku iterambere ryifuzwa.

BRD yasinyanye amasezerano na AEC RT mu gufasha impunzi kuzishyura inguzanyo zizahabwa mu kuzifasha kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .