Hari gukorwa igishushanyo mbonera kizakemura burundu ikibazo cy’ibura ry’amazi muri Kigali

Yanditswe na Iradukunda Serge
Kuya 14 Gashyantare 2020 saa 10:30
Yasuwe :
0 0

Ikigo gishinzwe Amazi, Isuku n’Isukura (WASAC) ku bufatanye n’Ikigo cy’u Buyapani cy’Ubutwererane Mpuzamahanga (JICA) hari gukorwa igishushanyo mbonera cy’Umujyi wa Kigali mu bijyanye no gutanga amazi meza, cyitezweho kuzaba igisubizo kirambye ku ibura ryayo rya hato na hato mu mujyi no mu nkengero zawo.

Kuri uyu wa 14 Gashyantare 2020 nibwo habaye inama aho ubuyobozi bwa JICA iri gukora iki gishushanyo mbonera kizarangira mu 2021 bwamurikiye abayobozi ba WASAC aho imirimo yo kugikora igeze.

Muri iyi nama JICA yavuze ko icyiciro cya mbere cy’iki gishushanyo mbonera cyatangiye gukorwaho muri Werurwe 2019 kimaze kurangira.

Umuyobozi Mukuru wa WASAC, Muzola Aimé, yabwiye itangazamakuru ko mu gihe iki gishushanyombonera kizaba kirangiye kizatanga ishusho ku mitangire y’amazi.

Ati “Kizarangira kiduha ishusho y’uko amazi ahagaze mu Mujyi wa Kigali ndetse kinerekana uburyo amazi azatangwa kugeza mu 2050 nk’icyerekezo Leta y’u Rwanda ifite kikazaduha kandi uburyo bw’ishoramari mu bikorwa by’amazi muri Kigali.”

Muzola avuga ko iki gishushanyombonera kizatanga igisubizo cya burundu ku bibazo by’ibura ry’amazi muri Kigali.

Ati “Hari imishinga iri gukorwa igambiriye kugira ngo icyo kibazo cy’amazi gikemuke, iyo mishinga turi gukora izarangira ihaye abaturage bose amazi yo biri ubu ngubu naho iki gishushanyo cyo kirareba n’ahazaza kugira ngo tutazongera kugira icyo kibazo cy’ahantu muri Kigali baba batabona amazi cyangwa bakayabona ari make.”

Kugeza uyu munsi igice cya mbere cy’iki gishushanyombonera cyararangiye, icya kabiri ari nacyo cya nyuma kizatangira gukorwaho muri Werurwe 2020 kirangire muri Mata 2021.

Umuyobozi wa JICA Rwanda, Maruo Shin, yavuze ko iki gishushanyombonera kizakemura ibibazo by’igenamigambi ridakozwe neza.

Ati “Igishushanyombonera kizakemura ibibazo by’ibura ry’amazi ahanini byaturukaga ku igenamigambi ridakozwe neza. Kizaba kigaragaza ahari amasoko, ingano y’amazi akenewe n’abaturage bitewe n’agace baherereyemo, ishoramari rikenewe n’aho rikenewe.”

Iki gishushanyombonera kandi kizatanga ishusho y’amazi mu bice biri mu nkengero z’Umujyi wa Kigali birimo Shyorongi, Runda, Rugarika, Ntarama, Muyumbu, Gahengeri na Nyakaliro.

Muri Gahunda y’Igihugu yo kwihutisha Iterambere (NST1) ya 2017-2024, u Rwanda rwiyemeje ko mu myaka irindwi amazi meza azaba agera ku baturage bose, ibigo nderabuzima, amashuri na sosiyete z’ubucuruzi.

JICA yavuze ko icyiciro cya mbere cy'iki gishushanyombonera cyamaze kurangira
Muri iyi nama ubuyobozi bwa JICA Rwanda bwagaragarije WASAC aho iki gishushanyombonera kigeze gikorwa
Umuyobozi Mukuru wa WASAC, Muzola Aimé, yavuze ko iki gishushanyombonera kizaba igisubizo kirambye ku ibura ry'amazi muri Kigali
Umuyobozi wa JICA Rwanda, Maruo Shin, aganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza