Hari aho ugisanga imirire mibi ishingiye ku myumvire- Mukabalisa avuga ku igwingira ry’abana

Yanditswe na Iradukunda Serge
Kuya 7 Ukuboza 2020 saa 08:07
Yasuwe :
0 0

Perezida w’Inteko Ishinga Amategeko y’u Rwanda Umutwe w’Abadepite, Mukabalisa Donatille, yagaragaje ko hari ahantu usanga ikibazo cy’imirire mibi n’igwingira ry’abana giterwa n’imyumvire aho kuba ubukene nk’uko benshi bakunze kubivuga.

Ibi yabigarutseho kuri uyu wa 7 Ukuboza 2020, ubwo abadepite bari mu nama igamije kureba uburyo ingengo y’imari ikoreshwa muri gahunda zigamije kurwanya imirire mibi.

Ni inama yanitabiriwe n’abayobozi b’Ishami ry’Umuryango w’Abibumbye ryita ku Bana, Unicef Rwanda n’abandi bafatanyabikorwa batandukanye.

Depite Mukabalisa yavuze ko abagize Inteko Ishinga Amategeko bafite inshingano zo guhugura Abanyarwanda ku bijyanye n’imirire myiza kuko hari n’igihe usanga abantu barya nabi atari ukubera ubukene ahubwo ari ukubera imyumvire.

Ati "Dufite inshingano nk’Abanyarwanda kandi nk’abayobozi zo guhugura no kwigisha Abanyarwanda mu midugudu aho dutuye, dufasha mu guhindura imyumvire no kuzana impinduka, kuko hari n’aho usanga ikibazo cy’imirire mibi kidashingiye ku mikoro make ahubwo ku myumvire.”

Yemeje ko mu gihe cyo gutora ingengo y’imari hazajya harebwa niba ikibazo cyo kurwanya imirire mibi cyarahawe ingengo y’imari ihagije ndetse ko no mu igenzura ry’ibikorwa bya Guverinoma hazajya hagenzurwa uko ikibazo cyo kurwanya imirire mibi cyitabwaho.

Ikigo cy’Igihugu cy’Ibarurishamirare giherutse kugaragaza ko ibipimo byo kugwingira mu bana mu Rwanda byagabanutseho 5% ugereranyije n’imyaka itanu ishize, kiva kuri 38 ku ijana kigera kuri 33 ku ijana.

Ubwo yatangazaga ibyabonetse mu bushakashatsi, Umuyobozi Mukuru w’Ikigo cy’Igihugu cy’Ibarurishamibare, Yusuf Murangwa, yavuze ko guverinoma yakoze ibishoboka mu kugabanya umubare w’abana bari munsi y’imyaka itanu bagwingiye, kandi byatanze umusaruro.

Ati “Guverinoma yakoze ibishoboka kugira ngo kugwingira bigabanuke, ku buryo mu myaka itanu ishize abana bagwingiye bagabanutseho 5%, bava kuri 38% bagera kuri 33% by’abana usanga badahuye n’imyaka bafite.”

Muri rusange, 1% by’abana bari munsi y’imyaka itanu bari bafite ibilo bike bikabije ugereranyije n’uburebure bafite mu 2020, bavuye kuri 2% mu 2015, mu gihe 8% by’abana bari munsi y’imyaka itanu bari bafite ibiro bike ugereranyije n’imyaka cyangwa amezi bafite mu 2020, ugereranyije na 9% mu 2015.

Abaganga bagaragaza ko kugwingira biterwa no kuba umwana atarabonye indyo yuzuye igihe kirekire no kurwaragurika, bikagira ingaruka z’igihe kirekire kuko bibarwa ko igwingira rigabanya ubukungu bw’igihugu ku kigero cya 3% by’umusaruro mbumbe w’igihugu, kubera ko umwana wagwingiye adatanga umusaruro nk’uwa mugenzi we bangana.

Abahanga kandi bagaragaza ko ari ngombwa kwita ku mwana hakiri kare kuko hafi ya 80% by’ubwonko bwe biremwa mu myaka itandatu ya mbere. Iyo umwana agwingiye mu bwonko, mu mitekereze ye no mu gihagararo, aba atakaje amahirwe atazongera kugaruka no mu bukuru bwe.

Perezida w'Inteko Ishinga Amategeko y'u Rwanda, Mukabalisa Donatille, yavuze ko hari aho imirire mibi iterwa n'imyumvire aho kuba ubukene
Iyi nama yitabiriwe n'abantu batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .