Hari abafashwe binjiye mu Rwanda bitwaje ibyemezo bihimbano by’uko batanduye COVID-19

Yanditswe na Rabbi Malo Umucunguzi
Kuya 13 Ukuboza 2020 saa 08:02
Yasuwe :
0 0

Minisitiri w’Ubuzima, Dr Ngamije Daniel, yavuze ko hari abantu bagenda bafatwa bagerageza kwinjira mu gihugu bitwaje ibyemezo by’ibihimbano bigaragaza ko batanduye COVID-19 kandi barwaye, rimwe na rimwe ugasanga bashyize mu byago abantu muri ibi bihe.

Ubwo yagaruka kuri zimwe mu mpamvu zikomeje gutuma ubwandu bushya bwa COVID-19 bwiyongera mu Rwanda, Minisitiri Ngamije yavuze ko hari abantu bajya mu tubari bakamarana igihe kinini baganira, bikazamura ibyago byo kwandura kuko baba barenze ku mabwiriza yo kwirinda.

Ni ibintu ngo bimaze kwigaragaza, ku buryo bidasaba ubushakashatsi kugira ngo umuntu abashe kubibona.

Yakomeje ati “Umuntu arabibona mu rubyiruko, ugasanga turi gusuzuma abantu, ugasanga abana 30 baranduye, wabaza amakuru ugasanga habayeho umwe wagiye iwabo aragaruka, ubwo aho yagiye iwabo yagize aho ahurira n’abanduye, agarutse mu kigo cy’ishuri arabakongeje.”

Yavuze ko no mu bacuruzi harimo icyo kibazo, hakiyongeraho abantu bajya hanze basuzumwe, mu kugaruka mu Rwanda bagakoresha ibyangombwa bigaragaza ko ari bazima kandi barwaye COVID-19.

Minisitiri Ngamije yakomeje ati “Mu kugaruka, nubwo bisuzumisha, hari amakuru dufite ko hari abantu basigaye bashakisha ibyangombwa by’ibihimbano, hari n’abagiye bafatwa na Polisi barazwi, bahimbye ibyangombwa by’uko batanduye kandi banduye, bakagaruka mu gihugu. Bigatuma rero ubwiyongere bw’ubwandu buzamuka kubera imyumvire mibi.”

Yavuze ko gufungura ibikorwa bitandukanye muri ibi bihe bya COVID-19 byari ukugira ngo abantu bige kubana na yo mu bushishozi igihugu kidahagaze. Gusa ngo ubwandu bukomeje kwiyongera no mu bakozi bo kwa muganga.

Ati “Ubu se ni nde uza kongera kuvura Abanyarwanda niba COVID igiye kugera kwa muganga? Kuko umunyururu ari kuza kwivuza cyangwa se umunyeshuri, akaba yanduje uwo kwa muganga, uwo kwa muganga na we akanduza abandi barwayi, akanduza abakozi bo kwa muganga.”

Minisitiri Ngamije yavuze ko hari igikwiye gukorwa, kuko igihe cyose habagaho ubwiyongere bw’ubwandu hafatwaga ibyemezo bikomeye, mu byumweru bibiri cyangwa bitatu ukabona ubwandu busubiye hasi.

Yavuze ko abantu bakwiye gukaza ingamba zo kwirinda, kuko hari icyizere ko icyorezo cya COVID-19 cyaba kiri hafi gutsindwa.

Yakomeje ati “Dusigaje igihe gitoya urukingo rukaboneka, si cyo gihe dukwiriye kudohoka, ahubwo ni cyo gihe dukwiriye gukaza ingamba kugira ngo urukingo rudusange tumeze neza, urukingo turukwize mu Banyarwanda, ikibazo cya COVID-19 tugishyire ku ruhande.”

“Mu mezi atatu ari imbere urukingo rushobora kuba rugeze mu gihugu, ubu twongereye tugafata ingamba zikaze zo kongera kubahiriza amabwiriza, byatuma tugerayo amahoro kandi urukingo rukatugeraho igihugu kitazambye.”

Kugeza kuri uyu wa Gatandatu abanduye COVID-19 mu Rwanda ni 6528 barimo 5892 bakize (90.2%, mu gihe abitabye Imana ari 56.

Minisitiri w'Ubuzima Dr Daniel Ngamije yavuze ko hari abantu bahimba ibyemezo ko batanduye COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .