Hamuritswe uburyo bushya bwo kurwanya Kirabiranya hifashishijwe ikoranabuhanga

Yanditswe na Hakizimana Jean Paul
Kuya 10 Ukwakira 2019 saa 10:06
Yasuwe :
0 0

Ikigo cy’Igihugu gishinzwe Iterambere ry’Ubuhinzi n’Ubworozi (RAB) ku bufatanye n’Ikigo Mpuzamahanga cy’ubushakashatsi mu by’ubuhinzi (IITA, International Institute of Tropical Agriculture) bamuritse porogaramu ya telefone yitwa ‘BXW Application’ izajya yifashishwa mu kumenya insina zamaze kwandura kirabiranya zigakurwa mu zindi bitabaye ngombwa ko urutoki rwose rutemwa.

Iyo porogaramu iminsi igeragezwa mu turere umunani aritwo Gatsibo, Kayonza, Muhanga, Gisagara, Rulindo, Burera, Karongi na Rubavu, yifashishwaga n’abajyanama mu by’ubuhinzi mu midugudu bakajya mu rutoki bagafata amakuru ku nsina hakamenyekana niba zifite kirabiranya.

Uburyo ikora, umuhinzi ajya mu rutoki rwe, akinjira muri iyo porogaramu ikajya imubaza ibibazo bigendanye n’ibimenyetso ari kubona ku nsina ye. Bitewe n’ibisubizo watanze, porogaramu irabikusanya ikakumenyesha niba insina yawe irwaye cyangwa ari nzima.

Aho bamaze kuyibona bifashisha amakuru ari muri iyo porogaramu avuga ku kuntu wayirwanya n’ibyagufasha, byose bikaba byanditse mu Kinyarwanda bagafasha umuhinzi kumenya insina zirwaye kirabiranya mu rutoki rwe, bakanamufasha kuzikuramo hatabayeho gutema urutoki rwose.

Umushakashatsi akaba n’umukozi ushinzwe gahunda y’urutoki muri RAB Svetlana Gaidashova, yavuze ko uretse kuba iyi porogaramu igaragaza insina zagezweho na kirabiranya, ngo inarimo uburyo bwo kuyirwanya no gufata neza insina.

Yakomeje agira ati “Abaturage bayizere kuko amakuru itanga arizewe, tumaze kuyikoresha ahenshi ndetse tukanongeramo n’andi makuru menshi kuburyo twayishyize hanze tumaze kuyigerageza inshuro ebyiri , abafite ubushobozi bwo gukoresha telefone zigezweho turabasaba kuyikoresha.”

Svetlana akomeza avuga ko kirabiranya ari indwara ikomeye cyane kuburyo ikwiye kurwanywa n’abantu bose ngo kuko uretse gutuma intoki zicika ngo inatuma hari amwe mu moko y’insina akendera.

Ati “Usanga aho indwara yaje ifata insina zose noneho kuko abaturage batayifiteho ubumenyi, ingamba za mbere bahita bafata ni ugutema insina zose n’inguri zazo, bigatuma amoko y’insina zacu za Kinyarwanda agabanuka kubera kirabiranya.”

Umujyanama mu by’ubuhinzi mu mudugudu wa Kinunga ya mbere mu Kagari ka Rukara mu Murenge wa Rukara , Umutoni Mathilde avuga ubu buryo bushya buzihutisha amakuru mu buryo bworoshye ndetse bukanafasha abahinzi kutarandura insina zose.

Yakomeje agira ati “Mbere twagendaga twandika mu makaye umuturage ufite insina zirimo kirabiranya bikadufata n’urugendo kugira ngo dutange raporo ku murenge, none ubu tujyana n’umuhinzi mu rutoki tukamusuzumira niba nta kirabiranya irimo amakuru tubonye tukayoherereza ku bashinzwe ubuhinzi mu murenge tutarindiriye kujyayo.”

Safari Bonaventure utuye mu Kagari ka Kabura mu Murenge wa Kabarondo avuga ko mbere muri aka gace bari bafite intoki nziza zeraga ibitoki binini bifite nk’ibiro 150 cyangwa 200, ariko ngo Kirabiranya yaraje ituma zose bazirandura.

Ati “ Ubu iri koranabuhanga rishya ryaje turyitezeho kudukemurira ikibazo cya kirabiranya gikunda kurangwa hano, mbere yafataga insina imwe ugasanga umuturage aranduye urutoki rwose none ubu batwigishije uburyo dukuraho ya nsina imwe yarwaye tukita kuzisigaye kuburyo zakomeza kubyara umusaruro.”

Indwara ya Kirabiranya iterwa n’agakoko bita banana xanthonomas campestris of Cubans, irangwa nuko amakoma y’insina araba cyane kandi ugasanga asa n’ayo basutseho amazi ashyushye, mu mutumba no mu nguri havamo umushongi w’umuhondo.

Kuri ubu mu gihugu hose abajyanama mu by’ubuhinzi bagera kuri 69 bakomoka mu turere umunani twatangiriyemo igerageza nibo bari gukoresha ubu buryo basuzumira abaturage niba nta kirabiranya iri mu ntoki zabo gusa ngo n’umuturage wifuza kuyikoresha yayibona kuri Google play store aho yitwa ‘BXW Application’.

Insina irwaye kirabiranye iyo bigaragaye hifashishijwe porogaramu irarimburwa yonyine aho kurimbura urutoki rwose
Iyi porogaramu izafasha abahinzi kumenya niba urutoki rwabo rurimo kirabiranya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza