Hagiye gufungurwa ibigo 18 bikorerwamo ibizamini by’impushya z’agateganyo kuri mudasobwa

Yanditswe na Akayezu Jean de Dieu
Kuya 11 Ugushyingo 2019 saa 09:18
Yasuwe :
0 0

Polisi y’u Rwanda yatangaje ko hagiye gufungurwa andi mashami 18 y’ahantu hazajya hatangirwa serivisi zo gukora ibizamini by’impushya z’agateganyo zo gutwara ibinyabiziga hifashishije ikoranabuhanga.

Ubu ni uburyo Polisi y’igihugu yazanye bwifashisha mudasobwa abantu bagakurikiza amabwiriza bakora ibizamini hagamijwe korohereza abanyarwanda kubasha gukora ibizamini ari benshi kandi mu buryo butangiza igihe cyabo.

Umuvugizi wa Polisi y’u Rwanda, CP Kabera Jean Bosco yavuze ko imirimo yo kwagura irajyana n’uko hari ahandi hantu 18 hagiye gutangizwa mu bihe bya vuba.

Yagize ati “Vuba aha turafungura ibindi bigo 18 bizajya bikorerwamo ibizamini kuri mudasobwa mu turere twa Bugesera, Kayonza, Kirehe, Nyagatare, Rwamagana, Muhanga, Ruhango, Huye, Gisagara, Nyaruguru, Gicumbi, Musanze, Rubavu, Rutsiro, Ngororero, Karongi, Nyamasheke na Rusizi”.

Polisi y’u Rwanda kandi yasohoye itangazo imenyesha abantu ko kubera imirimo yo kwagura imikorere y’ikigo gikorerwamo ibizamini by’uruhushya rw’agateganyo bikorewe kuri mudasobwa, abifuza iyi serivisi bose ko ishami rya Kigali ku Muhima ribaye rihagaze mu gihe cy’icyumweru.

Iri tangazo rikomeza rivuga ko imirimo yo kwagura ibikorwa izakorwa hagati ya tariki 11-17 Ugushyingo 2019, nyuma imirimo ikazahita ikomeza nk’uko byari bisanzwe.

Ishami rya Polisi y’igihugu rishinzwe umutekano wo mu muhanda ritangaza ko ubu buryo bushya budasimbura ubwo gukorera ibizamini muri stade ahubwo abantu babikoresha byose bitewe n’amahitamo yabo mu buryo bwo gutanga serivisi inoze ku bantu benshi mu gihe gito.

Kuri ubu ibizamini by’impushya z’agateganyo zo gutwara ibinyabiziga bikorwa hanifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza