Habonimana Charles yashyikirijwe inshingano zo kuyobora Ikigo Gishinzwe Ibibuga by’Indege

Yanditswe na IGIHE
Kuya 1 Nyakanga 2020 saa 09:05
Yasuwe :
0 0

Habonimana Charles uheruka kugirwa Umuyobozi w’Ikigo cy’Igihugu Gishinzwe Ibibuga by’Indege (RAC) yahererekanyije ububasha na Lt. Col. Firmin Karambizi wari kuri uwo mwanya kuva muri Mata 2019.

Umuhango w’ihererekanyabubasha wabereye mu biro bya RAC biherereye ku Kibuga Mpuzamahanga cy’Indege cya Kigali i Kanombe, kuri uyu wa 1 Nyakanga 2020. Wayobowe na Minisitiri muri Mininfra, Gatete Claver. Mu bitabiriye iki gikorwa harimo Umuyobozi Mukuru w’Inama y’Ubutegetsi y’Ikigo cy’Igihugu Gishinzwe Ibibuga by’Indege, Niyonkuru Zephanie.

Habonimana Charles yagizwe Umuyobozi Mukuru w’Ikigo cy’Igihugu Gishinzwe Ibibuga by’Indege ku wa 25 Kamena 2020, binyuze mu itangazo ryavuye mu Biro bya Minisitiri w’Intebe.

Mu butumwa yanditse kuri Twitter, yashimiye Perezida Kagame wamugiriye icyizere cyo gukorera igihugu cye, avuga ko atewe ishema no gukorera u Rwanda.

Habonimana Charles yakoze mu Karere ka Kicukiro imyaka umunani muri serivisi zitandukanye zirimo ibikorwaremezo n’imiturire, imiyoborere myiza, amakoperative n’ubucuruzi ndetse no muri serivisi y’imicungire y’abakozi.

Mbere yaho yakoze muri Sosiyete z’Ubwubatsi za Sogea Satom na Stragab mu birebana n’iyubakwa ry’imihanda.

Mbere yo guhabwa imshingano nshya zo kuyobora Ikigo cy’Igihugu Gishinzwe Ibibuga by’Indege, Habonimana yakoraga muri REG aho yari Umuyobozi ushinzwe ibirebana no gusuzuma ubushobozi bw’abakozi n’amahugurwa muri serivisi y’imicungire y’abakozi, umwanya yari amazeho imyaka itatu.

Afite Impamyabushobozi yo ku rwego rwa Masters mu kurwanya Jenoside ndetse n’Impamyabushobozi yo ku rwego rwa Kaminuza mu bijyanye n’Imiyoborere. Yize Ubwubatsi mu mashuri yisumbuye.

Habonimana kandi yanakoze amahugurwa anyuranye mu nzego zitandukanye arimo ibirebana n’imiyoborere, imicungire y’amasoko ya Leta n’imicungire y’abakozi.

Habonimana amenyerewe mu ruhando rw’ubwanditsi bw’ibitabo. Ni we wanditse Igitabo ‘Moi, le dernier Tutsi’ gikubiyemo ubuhamya bw’imibereho y’Umututsi mbere ya Jenoside, inzira ikomeye yanyuzemo mu gihe cya Jenoside n’uburyo Ingabo za FPR Inkotanyi zatumye arokoka.

Habonimana Charles wagizwe Umuyobozi w’Ikigo cy’Igihugu Gishinzwe Ibibuga by’Indege yahererekanyije ububasha na Lt. Col. Firmin Karambizi wari kuri uwo mwanya kuva muri Mata 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .