00:00:00 IGIHE NETWORK KN KINYARWANDA EN ENGLISH FR FRANCAIS

Guverinoma yakubye kane nkunganire nyuma y’itumbagira ry’ibiciro by’ifumbire mvaruganda

Yanditswe na Akayezu Jean de Dieu
Kuya 4 April 2022 saa 11:34
Yasuwe :

Guverinoma y’u Rwanda yatangaje ko nyuma yo kubona ibiciro by’ifumbire mva ruganda bikomeje gutumbagira, yakubye inshuro enye ikiguzi yashyiraga muri nkunganire igenerwa ifumbire mva ruganda.

Byatangajwe na Minisitiri w’Intebe, Dr Ngirente Edouard, ubwo yagezaga ku bagize Inteko Ishinga Amategeko imitwe yombi, ibikorwa bya Guverinoma bijyanye na gahunda yo kugeza ku baturage inyongeramusaruro zo mu rwego rw’ubuhinzi.

Ni ikiganiro yari yitabiriye ari kumwe na Minisitiri w’Ubutegetsi bw’Igihugu, Gatabazi Jean Marie Vianney; Umunyamabanga wa Leta muri Minisiteri y’Ubuhinzi n’Ubworozi, Dr Ngabitsinze Jean Chrysostome n’abayobora ibigo bishamikiye kuri iyi minisiteri.

Dr Ngirente yagaragaje ko abahinzi bashyiriweho uburyo bworoshye bwo kubagezaho inyongeramusaruro mu buryo bwihuse binyuze ku rwego rw’Akarere.

Hanashyizweho kandi uburyo bw’ikoranabuhanga bwifashishwa mu kunoza serivisi y’imitangire y’inyongeramusaruro z’ubuhinzi (imbuto, ifumbire mvaruganda n’ishwagara), no gucunga neza ubuhunikiro bw’inyongeramusaruro.

Mu kwegereza abahinzi b’imbuto n’ifumbire, mu duce dutandukanye tw’igihugu, hongerewe umubare w’ububiko bunini bw’imbuto n’ifumbire. Kugeza ubu, mu gihugu hari ububiko bunini bw’imbuto 57 (Ubuhunikiro bunini bw’imbuto n’ifumbire) buvuye ku 18 muri 2017, bivuze inyongera ya 200%.

Ingamba ku itumbagira ry’ibiciro by’ifumbire mva ruganda

Dr Ngirente yagaragaje ko gahunda yo kongera umusaruro w’ubuhinzi ku bihingwa byatoranyijwe yazamuye imyumvire ku kamaro ko gukoresha ifumbire mvaruganda ku buryo abaturage basigaye bayikoresha ku bwinshi.

Imibare igaragaza ko kugeza ubu kuri hegitari imwe y’ubutaka buhinzweho hakoreshwa ibilo 60 by’ifumbire mvaruganda mu gihe byari ibilo 30 kuri hegitari yariho mu 2017.

Muri gahunda yo kwihutisha iterambere ya NST1, biteganyijwe ko mu 2024 hazaba hakoreshwa ibilo 75 by’ifumbire kuri hegitari imwe.

Minisitiri w’Intebe Dr Ngirente yavuze ko u Rwanda rufite gahunda yo kubaka uruganda rutunganya ifumbire mvaruganda kuko hari gahunda yo kuba mu myaka mike iri imbere nta fumbire izaba itumizwa hanze.

Mu minsi ishize habayeho izamuka rikabije ry’ibiciro by’ifumbire mvaruganda kubera ko ibihugu bisanzwe biyikora byagabanyije iyo byohereza ku isoko mpuzamahanga kugira ngo nabyo byongere umusaruro w’ibikomoka ku buhinzi.

Iri zamuka ryatumye ifumbire itumizwa mu mahanga igera mu Rwanda ihenze cyane, bitewe n’izo mpamvu ziyongera ku kuba ibikomoka kuri peteroli byarahenze.

Ingero z’ibiciro byifumbire zirimo nk’iyitwa NPK aho mu 2020 yageraga mu Rwanda ihagaze agaciro ka 710Frw ku kilo kimwe ariko kuri ubu ikaba igera mu Rwanda ifite agaciro ka 1307Frw.

Aha habayeho izamuka rya 91% mu gihe kitageze ku myaka ibiri.

Ikilo cy’ifumbire ya UREE cyageraga mu Rwanda gifite agaciro ka 639Frw mu 2020 ubu isigaye igera mu gihugu ifite agaciro ka 1280Frw. Ni ukuvuga ko yo yazamutse hafi ku 100%.

DAP yageraga mu gihugu igura 739Frw ku kilo kimwe mu 2020, ubu igera mu gihugu ihagaze 1435Frw. Nayo yazamutse hafi kuri 94%.

Dr Ngirente ati “Guverinoma y’u Rwanda ntabwo yabirebeye aho ngaho gusa ahubwo twongereye ya nkunganire, yari isanzwe iriho ariko ibiciro ku isoko mpuzamahanga bimaze kuzamuka na leta yongereye nkunganire.”

Minisitiri w’Intebe yagaragaje ko amafaranga Guverinoma itanga muri nkunganire ku ifumbire mvaruganda yiyongereye kugira ngo abaturage badakomeza guhendwa bikomeye.

Mbere y’uko ibiciro bizamuka, nko ku ifumbire ya NPK leta yatangaga nkunganire ya 107 Frw ku kilo, ariko kuri ubu guverinoma yishyurira umuhinzi 475Frw ku kilo. Ibi bishatse kuvuga ko nkunganire yishyurwa na leta yikubye kane.

Kugira ngo byumvikane neza; niba umuhinzi w’ibirayi [i Kinigi muri Musanze] yagombaga kwishyura ikilo kimwe cy’ifumbire kuri 1357Frw, ubu iyo agiye kuyigura yishyura 882Frw.

Ibi niko bimeze no ku bundi bwoko bw’ifumbire mvaruganda aho nk’iyo mu bwoko bwa UREE, umuhinzi yishyura 768Frw ku kilo kimwe, iyo hatabaho iyo nkunganire yari kuba yishyura 1280Frw. Ibi bisahtse kuvuga ko kuri buri kilo kimwe leta imutangira 512Frw.

Minisitiri w’Intebe Dr Ngirente agaragaza kandi ko uko ibi bijyana no kuba ingengo y’imari ishyirwa mu kugeza ifumbire mva ruganda ku bahinzi igenda yiyongera.

Nko mu mwaka w’ingengo y’imari wa 2018/2019, yari miliyari 5Frw mu gihe muri uyu mwaka w’ingengo y’imari wa 2021/2022, hashyizwemo miliyari 13Frw.

Minisitiri w’Intebe Dr Ngirente ati “Guverinoma kandi ikomeje gushishikariza abahinzi gukoresha ifumbire y’imborere mu rwego rwo kunganira ifumbire mva ruganda. Ni muri urwo rwego hirya no hino mu gihugu hari ibigo by’abikorere bakora ifumbire y’imborere.”

Yakomeje agira ati “Dukomeje gushishikariza buri muhinzi kugira ikimoteri cyo gutunganya ifimbire y’imborere igamije kunganira ifumbire mva ruganda.”

Senateri Bigumisa Théoneste yavuze ko igihugu gikeneye gushyiraho ingamba zikomeye zirimo no guteza imbere ubushakashatsi cyangwa gushyiraho inganda zitunganya iyo fumbire.

Yavuze ko iyo urebye usanga icyo umuhinzi ashora kiba kiri hejuru ugereranyije n’igiciro aba yaguriyeho iyo nyongeramusaruro bityo ugasanga bishobora gushyira abahinzi mu gihombo.

Leta ikomeje gushishikariza abahinzi kuvanga ifumbire mvaruganda n'iy'imborera
Minisitiri w'Intebe, Dr Edouard Ngirente, yatangaje ko Guverinoma yakubye kane nkunganire ishyirwa mu guhangana n'izamuka ry'ibiciro by'ifumbire mvaruganda
Perezida w’Inteko Ishinga Amategeko, Umutwe w’Abadepite, Mukabalisa Donatille yitabiriye ikiganiro Minisitiri w'Intebe yagejeje ku Nteko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .