Guverinoma yabajijwe icyo ikora ngo impunzi ziri mu Rwanda zitahe mu bihugu byazo

Yanditswe na Akayezu Jean de Dieu
Kuya 7 Mata 2019 saa 09:36
Yasuwe :
0 0

U Rwanda nk’igihugu cyanyuze mu bihe bikomeye by’amacakubiri byasize umubare munini w’abarwo babaye impunzi, rwiyemeje gufasha abari mu buzima bubi kuba baruturamo nk’impunzi, ababishaka bakaba banasaba kuba abenegihugu.

Mu gihe rwita ku mpunzi rucumbikiye ariko rwashyize imbaraga mu gushishikariza impunzi z’Abanyarwanda gutaha ku bushake, runashyiraho uburyo bwo guha pasiporo abadashaka gutaha ariko bafite akazi bakora mu bihugu barimo, bakahaguma nk’Abanyarwanda baba muri Diaspora aho kwitwa impunzi.

Ku wa 31 Ukuboza 2017 rwakuyeho burundu sitati y’ubuhunzi ku Banyarwanda bahungiye mu bihugu by’amahanga hagati y’umwaka wa 1959 na 1998.

Muri Nzeri 2018, abarenga 2400 nibo bari bamaze gutahuka mu gihugu bavuye muri Repubulika Iharanira Demokarasi ya Congo, Congo Brazzaville n’ahandi.

Ku rundi ruhande ariko u Rwanda ni igihugu cyabayeho igihe kinini abaturage bacyo baragizwe impunzi n’ubutegetsi bubi bwariho kuva muri za 1959.

Ni amateka atuma igihugu cyarafunguye amarembo ku baturage b’ibindi bihugu bashaka kuba impunzi. Imibare iheruka y’ Ishami ry’Umuryango w’Abibumbye ryita ku mpunzi (UNHCR), igaragaza ko u Rwanda rucumbikiye impunzi 152,428. Muri zo, 52% zikomoka muri Repubulika Iharanira Demokarasi ya Congo naho 47% ni izo mu Burundi.

Minisiteri ishinzwe ibikorwa by’Ubutabazi [MINEMA], ivuga ko impunzi zimaze igihe kinini mu Rwanda ari izo muri Repubulika Iharanira Demukarasi ya Congo kuko zimaze imyaka igera kuri 23.

Kuva mu 2015, ubwo Perezida Pierre Nkurunziza yiyamamarizaga manda ya gatatu bigateza imvururu, byatumye abasaga 311,956 bava mu byabo ndetse 81565 bahungira mu Rwanda.

Ku wa 5 Mata 2019, Minisitiri ushinzwe Ibikorwa by’Ubutabazi , Kamayirese Germaine yari yitabye Komisiyo y’Ububanyi n’Amahanga, Ubutwererane n’Umutekano kugira ngo asobanure ingamba zihari zo gutabara bwangu iyo habaye imyuzure, imitingito, inkongi z’umuriro, impanuka z’ibinyabiziga n’ibindi nk’uko bikubiye mu ntego za politiki y’umutekano mu gihugu.

Abadepite babajije Minisitiri ingamba guverinoma yaba ifite ku mpunzi muri rusange kugira ngo zifashwe gutaha mu bihugu byazo.

Depite Senani Benoit yagize ati “Tubona hari impunzi ziri mu gihugu cyacu ndetse zihamaze igihe kinini, bishobora kuba nk’abanyarwanda bidusaba kugira ngo twite kuri izo mpunzi, ndetse ibyo dukoresha tuzitaho bikaba byashorwa mu yindi mishinga itandukanye.”

Yakomeje agira ati “Nkibaza nti muteganya iki kugira ngo zisubire mu bihugu byazo? Nkamwe mubishinzwe ku bufatanye n’izindi Minisiteri mukora iki kugira ngo ntizikomeze gufashwa, ahubwo zifashwe gusubira mu bihugu byazo.”

Minisitiri Kamayiresi yavuze ko bari mu biganiro na HCR ndetse n’ibihugu impunzi zikomokamo kugira ngo zitahuke cyangwa zijyanwe mu bindi bihugu.

Avuga ko ariko nka leta itafata umwanzuro wo kwirukana impunzi ndetse n’uzashaka kuba umunyarwanda kugira ngo ature amarembo afunguye kandi hari n’amategeko abigenga.

Ati “Muri politiki mpuzamahanga twanasinye wenda bigendanye n’amateka y’igihugu cyacu, icyo dutanga ni ukubarinda. Ntidushobora kwirukana impunzi zaduhungiyeho ni ibisanzwe ariko na none ibihugu bikwiye guhamagarira abaturage babo gutahuka.”

Yakomeje agira ati “Hari ibiganiro twagombaga kuba twaragiranye na HCR, na leta ya Congo mu Ukuboza 2018, ntabwo byashobotse ariko tuzakomeza gusaba iki gihugu kugira ngo tugirane ibiganiro.”

Minisitiri Kamayiresi yavuze ko mu gihe ibyo biganiro bitarabaho hari imishinga leta y’u Rwanda ikomeza gushyiraho irimo kurihira abanyeshuri b’impunzi amashuri no gufasha imiryango yabo kwigira.

Muri Kanama 2018, nibwo leta y’u Rwanda n’Ishami ry’Umuryango w’Abibumbye ryita ku Mpunzi batangiye gutanga ikarita ndangampunzi izafasha impunzi guhabwa serivisi zirimo ubwisungane mu kwivuza.

Uwari Minisitiri Ushinzwe y’Imicungire y’Ibiza n’Impunzi, Jeanne d’Arc De Bonheur, icyo gihe yavuze ko gutanga izi karita ari umuhigo leta yari yarahize mu nama yabereye i New York mu 2016.

Kugeza ubu ufite ikarita ndangampunzi ashobora gukorera uruhushya rwo gutwara ibinyabiziga agahabwa ubwisungane mu kwivuza, abanyeshuri bemererwa kwiga amashuri abanza, ayisumbuye na Kaminuza zo mu Rwanda.

Minisitiri ushinzwe Ibikorwa by’Ubutabazi , Kamayirese Germaine, yavuze ko hari ibiganiro leta iteganya kugirana na HCR na RDC ku kibazo cy'impunzi zo muri iki gihugu zimaze imyaka 23 mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .