00:00:00 IGIHE NETWORK KN KINYARWANDA EN ENGLISH FR FRANCAIS

Guverinoma ya Congo yabeshye abaturage bayo - Mukuralinda

Yanditswe na Rabbi Malo Umucunguzi
Kuya 23 Mutarama 2023 saa 06:46
Yasuwe :

Umuvugizi wungirije wa Guverinoma y’u Rwanda, Alain Mukuralinda yavuze ko mu bihe bitandukaye, Guverinoma ya Congo yabeshye abaturage bayo ku buryo binagira ingaruka mu rugendo rwo gushaka amahoro.

Yabivuze mu kiganiro yatanze kuri RBA, kuri iki Cyumweru.

Hashize amezi abiri i Luanda muri Angola abakuru b’ibihugu byo muri Afurika y’Iburasirazuba bemeje ko mu Burasirazuba bwa RDC, hoherezwa umutwe w’Ingabo zihuriweho za EAC n’ubwo iz’u Rwanda zitemerewe kuwujyamo.

Izi ngabo zoherejwe ntabwo inshingano ya mbere zahawe ari iyo kurwanya M23 ahubwo zari zigamije kurinda umutekano mu duce uwo mutwe umaze kuvamo nkuko no mu masezerano babisaga uwo mutwe.

Mu gihe M23 yakwanga kuva muri utwo duce ku neza, nibwo hashobora gufatwa icyemezo cyo kuyivanamo ku ngufu nubwo bisaba ko abakuru b’ibihugu bahura bagafata iyo myanzuro.

Leta ya Congo yo yabwiye abaturage ko izo ngabo zaje kurwana, ari nabyo byatumye mu minsi ishize bigaragambya, bavuga ko izo ngabo ntacyo zimaze kuko zitarwanya M23.

Umwe yabwiye France 24 ko izi ngabo zaje kubafasha ariko zimeze nk’izibereye mu butembere gusa .

Mukularinda yagize ati "Ni gute nyuma y’amezi abiri umuhuza n’abo bafatanyije gushyiraho umutwe wa EAC [bawushyizeho] ushobora gutinyuka ukajya mu myigaragambyo yo kurwanya uwo mutwe. Mu mezi abiri urawunenga iki?"

Ni ingabo zageze muri RDC, abayobozi baho bavuga ko zigiye guhangana na M23 mu gihe zajyanywe no gushyiraho uburyo bwafasha mu guhosha imirwano.

Ni ibinyoma byose ngo bishingiye ku myanzuro igamije gushaka amahoro mu burasirazuba bwa RDC, y’inama z’abakuru b’ibihugu z’i Luanda na Nairobi.

Ni imyanzuro ihuriza ku guhagarika imirwano, gusubiza inyuma imitwe irimo M23 no gushyiraho umutwe w’ingabo uzakurikirana ibyo bikorwa.

Ati "Guverinoma ya Congo yabeshye abaturage bayo, mbere na mbere bababwira ko barimo kurwana n’umwanzi, barimo bamuhashya, ubwa kabiri bakababwira ko uwo mwanzi kugira ngo bavugane na we agomba gusubira iyo yaturutse, ubwa gatatu bakavuga ko aho umwanzi azava, ingabo za Congo zizahajya, ngo umwanzi ni M23 afatanyije n’u Rwanda."

Ni ibintu nyamara Perezida Tshisekedi yari azi neza, kuko yanavuze ko badashaka u Rwanda muri uwo mutwe, rurabyemera.

Ni mu gihe ngo aho abarwanyi ba M23 bavuye hagombaga kujya EACRF, ikinyoma cya mbere kiba kirigaragaje.

Ikindi kinyoma cyavuyeho ni uko uko M23 yagumishijwe muri Congo kuko ari abaturage bayo, mu gihe mbere abayobozi bavugaga ko ari abanyamahanga bagomba gusubira iwabo.

Icya gatatu, ni uko ingabo zagaragaje ko zitajyanywe muri RDC no kurwana mbere na mbere, maze kubera ibinyoma bya Guverinoma, bituma abaturage bavuga ko "ziri mu bukerarugendo kubera ibyo batasobanuriwe."

Yakomeje ati "Kugira ngo ziriya ngabo zirwane ni uko umutwe zashaka kurwanya uwo ari wo wose, bawusaba kugira ibyo ukora, ukanga. Wamara kwanga, umuhuza akora raporo, akayikorera abakuru b’ibihugu, akaba ari bo bonyine bafata icyemezo cyo kuvuga ngo noneho nimubarase, ariko ntabwo binjira, baje kurwana. Ariko bibaye ngombwa barwana, wumva inzira bigomba kunyuramo."

Kuba abayobozi barabeshye abaturage, ngo byoroshya no kubabwira ngo bajye mu muhanda, bagahita batangira kwigaragambya.

Yavuze ko bisa n’aho RDC irimo kwivana mu masezerano ya Luanda na Nairobi, agamije gushaka umuti ku bibazo biri mu burasirazuba bwayo.

Yakomeje ati "Niba ushaka kwivana mu masezerano , hari ibintu bibiri bishoboka. Ni ugukomeza kugira akavuyuyo muri kariya gace, cyangwa se ni ukuba wavuga ngo reka nshoze intambara kuri cya gihugu mpora nshija ko ari cyo kidutera."

Icyo gihe yavugaga ko hari icyizere ko ubuhuza bushobora gutanga umusaruro, byakwanga, wenda abahuza bakazasanga Congo ari yo iseta ibirenge.

Umutwe wa M23 umaze iminsi uva mu duce tumwe na tumwe wari warigaruriye, mu rwego rwo gushyira mu bikorwa ibyo wasabwe. Byanatumye umuhuza Uhuru Kenyatta abakira ku meza baraganira, mu gihe Leta ya Congo yo yatumiwe ngo bahure ikabyanga.

Umuvugizi wungirije wa Guverinoma y'u Rwanda, Alain Mukuralinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .