00:00:00 IGIHE NETWORK KN KINYARWANDA EN ENGLISH FR FRANCAIS

Guverinoma mu nzira zo kuvugutira umuti gatanya z’abakurikiye imitungo

Yanditswe na Akayezu Jean de Dieu
Kuya 23 Ukuboza 2022 saa 08:26
Yasuwe :

Mu ntangiriro z’iki cyumweru, ubwo nari mu Burasirazuba bw’u Rwanda, umugabo twaganiriye yambwiye inkuru ya mushiki we uherutse gushyingiranwa n’umugabo mu buryo bwemewe n’amategeko, hashize icyumweru kimwe bahita batandukana.

Iyi si inkuru nziza yo kwandika ariko nanone akariho karavugwa. Biragoye kubona abantu bamaze icyumweru kimwe cyangwa ukwezi kumwe bashyingiranwe, biruka mu nkiko basaba gatanya.

Nigarukiye kuri cya kiganiro, Umucamanza yanzuye ko abari bamaze icyumweru bashyingiranywe batandukana kandi bakagabana imitungo yabo yose bigendanye n’isezerano bari bagiranye.

Imitungo yabariwe asaga gato miliyoni 100Frw, umugabo afata miliyoni 47Frw n’umugore afata 47Frw, andi agenda mu manza, kwishyura abagenagaciro n’ibindi.

Kuri ubu hashize imyaka ibiri abo batandukanye, umugabo yibereye muri Leta Zunze Ubumwe za Amerika, umugore nawe aherereye ku mugabane wa Afurika ndetse yaje gushakana n’undi musore ubu bafite umwana w’amezi atandatu.

Byari kungora kumenya neza icyatumye uwo mugore atandukana n’uriya mugabo wa mbere bari bamaranye icyumweru basezeranye, gusa uwo mugabo twaganiraga abimbwira yavuze ko uwo mugore yari yakurikiye imitungo kuri uwo mugabo.

Ni ibintu byeze

Ni kenshi havugwa inkuru z’abantu bashakana ariko hashira igihe gito bagasubira imbere y’ubuyobozi gusaba gatanya.

Imibare y’Ikigo cy’Igihugu cy’Ibarurishamibare igaragaza ko mu 2019, ingo zasenyutse binyuze muri gatanya zageze ku 8,941 zivuye ku ngo 1331 zari zasenyutse mu mwaka wawubanjirije wa 2018.

Ni ibintu bisobanuye ko ingo zisenyuka zari zikubye inshuro 6.8 mu gihe cy’umwaka umwe gusa.

Raporo igaragaza ko ingo nyinshi ari izasenyutse zitaramara imyaka 15 zibayeho kuko zingana na 80%. Ikindi cyagaragaye kandi ni uko abo mu Mujyi wa Kigali ari bo batandukana cyane.

Kigali yari ifite abantu batandukanye 2400 mu gihe ingo zasenyutse bivuye kuri gatanya mu Majyepfo zari 1989 naho Uburengerazuba zikaba zari 1820.

Raporo y’Ibikorwa by’Ubucamanza ya 2021-2022, igaragaza ko ikibazo cyiganje kuruta ibindi mu manza mbonezamubano ari gutandukana burundu, aho kingana n’imanza 3,322.

Impamvu zishyirwa mu majwi nk’izitera izi gatanya zirimo kuba hari abajya mu rushako bafite ibyo bakurikiyemo bagerayo bamaze kubibona cyangwa kubibura bagahitamo gusenya.

Imitungo niyo iza ku isonga aho usanga umukobwa ashobora guhitamo kwemerera umusore gushyingiranwa nawe kugira ngo nibamara gusezerana ahite asaba gatanya, bityo bagabane imitungo.

Iyi niyo mpamvu Guverinoma y’u Rwanda yatangiye urugendo rwo gukemura burundu ikibazo cy’abantu bashyingiranwa umwe akurikiye imitungo y’undi aho ahita asaba ubutane bataramara kabiri babana kugira ngo bagabanemo kabiri.

Ni umushinga w’Itegeko ryerekeye abantu n’umuryango, imicungire y’umutungo w’abashyingiranywe, impano n’izungura, byari bisanzwe ari amategeko abiri atandukanye.

IGIHE yamenye ko uyu mushinga uri gutegurwa na Minisiteri y’Uburinganire n’Iterambere ry’Umuryango, MIGEPROF, aho ikomeje kuganira n’izindi nzego bireba n’abantu b’ibyiciro bitandukanye kugira ngo hakusanywe ibitekerezo byashyirwa muri iryo tegeko.

Mu mushinga wateguwe na Migeprof, Umucamanza yahawe ububasha bwo kujya abanza gusuzuma niba abagiye gutandukana byemewe n’amategeko [Divorce] bagomba kugabana imitungo mu buryo bungana.

Bimwe mu bitekerezo bishya biri mu mushinga w’itegeko

Mu gihe Migeprof yaba yemerewe guhindura iri tegeko, biteganyijwe ko ibijyanye nuko urukiko rwakiriye ikirego gisaba ubutane rufata umwanya wo kunga abashaka gutana byavanywe mu mushinga mushya w’itegeko.

Impamvu ni uko byafataga igihe kirekire kandi ntibitange umusaruro witezwe, hamwe na hamwe ugasanga icyo gihe cyo gutegereza giteje ibibazo n’andi makimbirane arimo kubaho nabi kw’abana n’abashakanye no kuba bamwe bakwambura abandi ubuzima.

Hari kandi kongera mu itegeko ibijyanye n’imirimo yo kwita ku rugo idahemberwa. Ubushakashatsi bwagaragaje ko abagore bakora amasaha atatu buri munsi kuruta abagabo mu mirimo yo kwita ku rugo.

Iyi mirimo iramutse ihawe agaciro mu mafaranga uyikora akayihemberwa byagira inyungu nyinshi mu iterambere ry’uwayikoze.

Impamvu byashyizwe mu Itegeko ni ukugira ngo mu gihe cyo kugabana imitungo biturutse ku butane bw’abari barashyingiranywe, umucamanza azite ku gaciro k’iyi mirimo yafashije guteza imbere urugo.

Ababana mu buryo bw’ivangamutungo rusange iyo batandukanye bagabana umutungo mu buryo bungana (50/50).

Impamvu ngo ni uko byagaragaye ko hari abashyingiranywa ariko bagamije imitungo ya bagenzi babo, nyuma y’igihe gito bagasaba ubutane.

Uyu mushinga urateganya ko umwe mu basaba ubutane ashobora gusaba umucamanza ko hatabaho kugabana mu buryo bungana (50/50). Ibi bizajya bisuzumwa n’umucamanza.

Hari kandi kongera mu mpamvu zo gusaba ubutane ko iyo kubana kw’abashyingiranywe bitagishobotse biba na byo impamvu ishingirwaho n’umwe mu bashyingiranywe mu gusaba gutanga ubutane.

Ikindi ni ugukura mu itegeko igihe cy’imyaka ibiri yo kubana yasabwaga kugira ngo abifuza gutana biturutse ku bwumvikane babyemererwe.

Abashyingiranywe bashobora kwemeranywa gutana mbere y’iyo myaka ibiri, kuko gukomeza kubahambiriza amategeko bishobora guteza ibindi bibazo.

Abateguye uyu mushinga kandi bifuza kongera mu itegeko ko ibijyanye no guhindura uburyo bw’imicungire y’umutungo w’abashyingiranwe bishobora gukorwa n’umwanditsi w’irangamimerere mu gihe abashyingiranywe babyemeranywa.

Ikindi ni ugukura mu Itegeko ibijyanye no gufata ku ibendera ku bashyingirwa kuko byagombye gukorwa n’umwanditsi w’Irangamimerere nk’umukozi uri mu nshingano zo gushyingira.

Hari kandi no kongera mu Itegeko ubwunganizi buhabwa abafite ubumuga mu gihe basaba serivisi z’irangamimerere.

Umushinga w'itegeko uraha umucamanza ububasha bwo gusuzuma niba abagiye gutana bagabana imitungo bakaringaniza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .