Guverinoma igiye gusaba ibigo by’amashuri kutajya guhaha ibiribwa by’abanyeshuri kure

Yanditswe na Habimana James
Kuya 14 Ukwakira 2019 saa 05:09
Yasuwe :
0 0

Minisitiri w’Uburezi, Dr Eugène Mutimura, yatangaje ko harimo kurebwa uko hanozwa politike ituma ibigo by’amashuri bigaburira abana ibihingwa biboneka aho biherereye, aho kurenga imisozi bijya guhaha kure.

Dr Mutimura yabigarutseho kuri uyu wa Mbere ubwo iyi minisiteri yahuraga n’inzego zitandukanye, haganirwa kuri gahunda irimo guteganywa yo kureba uburyo kugaburira abanyeshuri bigomba kunozwa.

Mu 2014 Leta y’u Rwanda yatangije gahunda yo kugaburira abana biga mu burezi bw’ibanze bw’imyaka 9 na 12, hagamijwe kubafasha kuzamura urwego rw’imitsindire.

Nubwo bimeze gutya, kugeza ubu mu bigo bimwe by’umwihariko iby’uburezi bw’ibanze bw’imyaka 12, bamwe mu banyeshuri baracyabura amafunguro kuko badashobora kubona amafaranga yo kwishyura.

Imibare igaragaza ko ingo ibihumbi 464 mu gihugu zitabona ibiryo bihagije, naho izirenga ibihumbi 42 zo zikaba zibona ibiryo mu buryo bugoye.

Iki kibazo kigaragara cyane mu Ntara y’i Burengerazuba kuko gihagaze ku kigero cya 29.9%, mu Ntara y’Amajyepfo kiri 20.5%, mu Majyaruguru ni 19.8%, mu Burasirazuba ni 16.2% naho mu Mujyi wa Kigali ni 2.2%.

Guverinoma ivuga ko mu gihe ibigo by’amashuri byaba bitanga ifunguro ryinshi kandi ryujuje ibisabwa, uretse kuba abana benshi bakwitabira kwiga byanagabanya n’ikibazo cy’igwingira ry’abana.

Ikibazo gihari ni uko bigo by’amashuri usanga bikivana ibihingwa mu bice bitandukanye by’igihugu, bikaza bihenze kandi bikaba bidahagije.

Dr Mutimura yavuze ko ubu harimo kurebwa uko ibigo by’amashuri bikoresha ibihingwa byera muri ako gace aho kujya kubivana mu tundi Turere.

Yagize ati “Leta y’u Rwanda ishyigikiye gahunda yo kugaburira abana mu mashuri cyane cyane ko yabifasheho umwanzuro mu nama y’abayobozi mu 2014 ndetse ibitangaho umurongo.”

Yakomeje agira ati “ Ikindi dushaka gukora ni uko iyi politike nimara kwemezwa, hagomba kubaho umurongo unoze kugira ngo abana bajye bagaburirwa ibiryo biboneka hafi ku mashuri ni ukuvuga aho mu Murenge cyangwa mu Karere, tugabanye ibiciro by’ibyo kurya ku mashuri kuko ubundi wasangaga ishuri rigura ibiryo bivuye kure kandi atari ngombwa.”

Dr Mutimura yavuze ko wasangaga nko mu karere ka Nyabihu cyangwa Musanze, ibigo by’amashuri bijya guhaha umuceri kandi wenda bakabaye bahaha ibirayi bihera, muri Ngoma cyangwa Kirehe aho bagahashye ibitoki, ugasanga barahaha ibiryo bidahari.

Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Dr. Munyakazi Isaac yavuze ko bashaka gukoresha amafunguro akomoka ku bihingwa bikomoka mu gace runaka bikaba byujije intungamubiri , abana bagafata ifunguro rihagije, ababyeyi bakaba basabwa kubigiramo uruhare.

Mushatsi Claver, umuyobozi w’Urwunge rw’Amashuri rwa Nyagatare mu karere ka Nyagatare, avuga ko imbogamizi zihari mu kugaburira abanyeshuri ari imyumvire y’ababyeyi, aho bumva ko leta ariyo igomba kujya igaburira abanyeshuri gusa.

Yagize ati “Nk’ubu usanga abana bari mu cyiciro cya mbere aribo usanga barya, ariko byaza mu cya kabiri nibo barya gake, ikibazo rero ubona ko ari imyumvire.”

Gahunda yo kugaburira abana ku ishuri itaratangira, hari abana bigaga amasomo ya nyuma ya saa Sita ugasanga barasinzira abandi basiba kubera inzara, mu gihe abandi batahaga bakagaruka ku ishuri bakerewe kubera ko basanze ibiryo bitarashya cyangwa se kubera urugendo rurerure bakora.

Dr Mutimura yavuze ko ubu harimo kurebwa uko ibigo by’amashuri bikoresha ibihingwa byera muri ako gace aho kujya kubivana mu tundi Turere
Abayobozi batandukanye bahuriye hamwe harebwa uko ibigo by'amashuri byajya bigaburira abanyeshuri bitagombye kujya guhaha kure
Mushatsi Claver, umuyobozi w’Urwunge rw’Amashuri rwa Nyagatare mu karere ka Nyagatare, avuga ko imbogamizi zihari mu kugaburira abanyeshuri ari imyumvire y’ababyeyi

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza