Gutitira, icyoba no kugwa mu kantu muri MRCD nyuma y’ifatwa rya Rusasebagina; Twagiramungu arabogoza

Yanditswe na Musangwa Arthur
Kuya 1 Nzeri 2020 saa 02:28
Yasuwe :
0 0

Inkuru y’ifatwa rya Paul Rusesabagina, yabibye icyoba no kugwa mu kantu mu basangirangendo be yari yarijeje ko azaruhuka ahiritse ubutegetsi bw’u Rwanda akaruganzamo nk’umunyapolitiki uhamye.

Gusa ariko Umunyarwanda yabivuze neza ko ikinyoma gihabwa intebe rimwe. Rusesabagina wakinweho filimi y’ikinyoma ‘Hotel Rwanda’, nk’uwarokoye abantu 1268 muri Hôtel des Mille Collines, abayobejwe nayo bagatangira kumuhundagazaho ibihembo, kuri iyi nshuro filimi yo guhirika ubutegetsi uwavuga ko yashyinguwe ikiri mu mishinga ntiyaba abeshye.

Hambere aha mu 2016, Rusesabagina wiyumvise nk’icyatwa nyuma yo gukinwaho filimi, yeruye ku mugaragaro ko ‘bidasubirwaho yinjiye muri politiki kandi we n’abo bafatanyije batazaruhuka badahiritse ubutegetsi bw’u Rwanda burangajwe imbere na FPR-Inkotanyi’.

Ng’uko uko yahamije umugambi atangira ibikorwa byo gushaka inkunga ari nako yikomanga ku gituza ko bidatinze azaba ari i Kigali abyina intsinzi ko yabohoye Abanyarwanda akabakura mu maboko y’ubutegetsi bwa FPR.

Rusesabagina yaje gushinga Ishyaka PDR Ihumure (Party for Democracy in Rwanda- Ihumure), bidatinze yihuza na RRM (Rwandese Revolutionary Movement) yashinzwe na Nsabimana Callixte ‘Sankara’ na CNRD Ubwiyunge ya Gen Irategeka Wilson, bibyara ihuriro MRCD (Mouvement Rwandais pour le Changement Démocratique).

Iri huriro ryayoborwaga na Paul Rusesabagina nka Perezida, Gen Irategeka aba Visi Perezida wa Mbere naho Nsabimana Callixte aba Visi Perezida wa Kabiri.

Bashinze Umutwe w’Ingabo uhuriweho bawita FLN, mu kugabana inshingano Nsabimana yahawe kuba Umuvugizi. Uyu mutwe wagiye ugaba ibitero by’iterabwoba mu Majyepfo y’u Rwanda winjiriye mu Burundi.

Muri Kamena 2019, aya mashyaka yaje kwinjira mu bufatanye na RDI Rwanda Rwiza ya Faustin Twagiramungu, bidasubirwaho uyu wigeze kuba Minisitiri w’Intebe w’u Rwanda yinjira mu iterabwoba gutyo.

Umutwe wa FLN ushamikiye ku Ihuriro MRCD, wagabye ibitero i Nyabimata mu Karere ka Nyaruguru muri Kamena 2018 wica abaturage babiri abandi batatu barakomereka, utwika imodoka ndetse unasahura imitungo y’abaturage. Hari kandi ibitero byo muri Nyungwe mu Karere ka Nyamagabe mu Ukuboza 2018.

Rusesabagina yigambye ibi bitero byose avuga ko ‘guhera muri Nyakanga 2018, umutwe wa FLN watangije urugamba rwo kubohora Abanyarwanda ingoyi y’ubutegetsi bwa FPR-Inkotanyi kandi ibintu bimeze neza bari ku muryango bakomanga’.

Yagize ati “Igihe kirageze ngo dukoreshe uburyo bwose bushoboka tuzane impinduka mu Rwanda. Kuko inzira zose za politiki zageragejwe zikananirana, iki nicyo gihe cyo kugerageza amahitamo ya nyuma.”

Rusesabagina yiyemeje gutanga ubufasha bwose atizigamye ku barwanyi ba FLN, yavugaga ko bahanganye n’ingabo za Kagame kugira ngo babohore Abanyarwanda. Yaboneyeho gusaba imiryango ya politiki n’iya sosiyete sivile gushyigikira urwo rubyiruko yavugaga ko rwatangiye urugamba rwo kubohora igihugu.

Aba bahungu be ariko ntibamaze kabiri kuko abatarahuriye n’akaga mu Rwanda, ntibahonotse ibitero by’ingabo za FARDC. Ababashije kurusimbuka bari mu maboko y’ubutabera.

Rusesabagina wari wariyemeje gufata u Rwanda akoresheje imbunda yatawe muri yombi

Icyoba no kugwa mu kantu muri MRCD

Ku kazuba k’agasusuruko mu Mujyi wa Kigali, kuri uyu wa Mbere inkuru yabaye kimomo ko Rusesabagina warotaga kwicara mu Urugwiro ari mu maboko y’Urwego rw’Igihugu rw’Ubugenzacyaha (RIB), akurikiranyweho iterabwoba, gutwika, ubushimusi n’ubwicanyi byakorewe abaturage b’inzirakarengane b’Abanyarwanda.

Ni inkuru yatunguranye cyane kuva i Kigali, kugera mu bice biherereyemo abarwanya Leta y’u Rwanda nka Afurika y’Epfo, u Bubiligi, Canada, n’ahandi hose. Muri make, nta wari witeze ko umugabo ufite uruhara, wambaye ikoti, karuvati itukura n’inkweto z’ingozi z’umukara, yamanuka mu modoka ya RIB ngo yerekwe itangazamakuru.

Byabaye agahomamunwa ubwo iyi foto iherekejwe n’inkuru y’ifatwa rya Rusesabagina byageraga mu maso no mu matwi y’abasangirangendo be.

Umwe mu bayoboke ba MRCD wari mu nama bisanzwe y’uwo mutwe yarimo na Twagiramungu Faustin, yumvikanye yacanganyikiwe cyane, mbese bya bindi bita gukubitwa n’inkuba nyuma yo kumva ko Rusabagina yafashwe ndetse yagejejwe i Kigali.

Mu ijwi ririmo igihunga, uwo mugabo yagize ati “Muvandi njye bihise, birancanze … sinamenya ibyo ari byo singiye kugushuka kuko nimugoroba twari turi mu nama ya MRCD gusa we ntawari urimo batubwira y’uko ngo yapfushije murumuna we. Ubwo rero ibyo ntasobanukiwe, niba yagiye agiye guhamba murumuna we, niba se murumuna we yaguye mu Rwanda, ubu sindamenya ibyo ari byo singiye kukubeshya ndimo ndumva bincanga.”

Uwo mugabo wasaga n’uwavugaga yifashe ku mutwe yabuze ayo acira n’ayo amira, yakomeje agira ati “Byandenze, sindamenya ni ibiki, sinzi niba ari ibiki…njye bihise bintungura ko umuntu wari uhari ni muzehe Twagiramungu mu nama, nta kintu yigeze atubwira…birimo birancanga biranansiga, nayobewe uko mbisobanura.”

Bidatinze, Twagiramungu Faustin yahise atura agahinda BBC, avuga ko ubwa nyuma baheruka Rusesabagina yari muri Amerika, muri Leta ya Texas, mu mujyi wa San Antonio, bakaba bazi neza ko yafashwe ari wo mujyi avuyemo.

Abajijwe aho Rusesabagina yerekezaga, Twagiramungu yagize ati “Ntabwo twabimenya kuko ntabwo yatubwiye ko azajya mu rugendo, iyo tumenya ko azajya mu rugendo ubu twari kumenya n’igihe yagendeye, tukamenya wenda n’uburyo yagezeyo ariko ibyo ntabwo twari tubizi. Ngira ngo yari ari mu bintu bye bwite bidafitanye isano n’ibingibi by’amashyaka tubamo cyangwa se by’impuzamashyaka”.

Twagiramungu avuga ko muri Amerika Rusesabagina yari ahamaze amezi arenga atandatu ndetse hari hashize amezi arindwi RIB igiye kumuhata ibibazo mu Bubiligi ndetse isaka no mu rugo rwe yibwira ko birangiye.

Ati “Ibyo mu Bubiligi nibyo umuntu yavugaho, haje abantu bavuye mu Rwanda bo muri RIB nanone, Rusesabagina yagiye mu ibazwa, twumvise ko bagiye no gusaka iwe. Ntabwo rero bamufashe ngo bamufunge uretse ko hari abantu bavuze ko ngo bashatse kubwira Ababiligi ko banamufata bakamujyana mu Rwanda, bababwira ko Rusesabagina afite ubwenegihugu bw’Ababiligi ko batapfa kumufata nk’uko basanzwe bafata abantu mu Rwanda.”

“Ntabwo yari azi ko hari ibindi bizaba, kuba baramusatse hanyuma bakamureka hanyuma akajya muri Amerika, nta kintu cyamubujije kwinjira muri Amerika, ubwo ni uko nta kintu yikangaga mu by’ukuri, yari azi ko ibyo bintu byarangiye. Namenye mbibwiwe n’umuntu ko Rusesabagina ari mu rugendo, hashize iminsi ibiri ariko uyu munsi nibwo namenye ko urugendo yari arimo yari muri Afurika.”

Umukobwa wa Rusesabagina, Anaïse Kanimba, yavuze ko se yari ari mu rugendo i Dubai akaba yari yahageze ku wa Kane ndetse akabamenyesha ko yahageze. Nibwo bwa nyuma bavuganye bongera kumenya amakuru ye ejo ku wa Mbere ubwo yerekanwaga na RIB.

Kanimba yabwiye BBC ati “Ni bwo bwa nyuma duheruka kumwumva atubwira ko ahageze, ntabwo twongeye kumwumva kuva ubwo kugeza uyu munsi [yavugaga ku wa Mbere] ubwo twabonye ko yafashwe n’ubutegetsi bw’u Rwanda.”

Uyu mukobwa wa Rusesabagina yakomeje agira ati “Ntabwo tuzi uko yageze hariya n’ibyabaye, ni yo mpamvu dutekereza ko yashimuswe kuko ntabwo yari kujya mu Rwanda ku bushake bwe.”

Rudi Rever uzwi cyane mu guhakana no gupfobya Jenoside yakorewe Abatutsi, ni undi musangirangendo wa Rusesabagina waguye mu kantu yibaza uko uyu mugabo yafashwe.

Ati “Paul Rusesabagina wafashwe akajyanwa i Kigali, yerekeje i Dubai nubwo umuryango we n’inshuti batazi neza niba ari ho yafatiwe cyangwa niba indege yarahagaze gato (cyangwa igahindurirwa icyerekezo) muri Ethiopia.”

Amagambo y’aba bagabo bombi, yumvikanamo ubwoba bwinshi cyane ndetse hari n’abatebya bakavuga ko ‘Twagiramungu ameze nk’usaba ubuhungiro mu Nyanja ya Pacifique’.

Uwitwa Valens Rutagengwa kuri Twitter yagize ati “Nibikomeze bibacange rwose @FTwagiramungu na we ibyo woshyaga abana b’u Rwanda guhungabanya umutekano w’Abanyarwanda na MRCD yawe nabo yishe mu bitero bitandukanye nibyo uvuga upfobya Jenoside yakorewe Abatutsi, nawe ni ikibazo k’igihe gusa uzabisobanura tu.”

Ubwoba ni bwose kuri Twagiramungu wari umusangirangendo w'akadasohoka wa Rusesabagina
Umwaka ushize ubwo Rusesabagina yari amaze gusinya amasezerano y'ubufatanye na Twagiramungu

Umugambi wa Rusesabagina ku iherezo!

Uwavuga ko umugambi wa Rusesabagina ugana ku iherezo ntiyaba abeshye kuko umwaka wa 2019 na 2020, atazapfa ayibagiwe. Ni imyaka yaburiyemo abasangirangendo be, bamwe baricwa, abandi barafatwa. Muri make hasigaye mbarwa.

Ubwo Nsabimana Callixte ‘Sankara’, yafatirwaga muri Comores, Rusesabagina yarahije imigeri abeshya amahanga ko u Rwanda rwoherejeyo abantu ngo bamufate, ariko MRCD ye ikamubambura.

Ati “Sankara ari ahantu hizewe kandi hari umutekano”. Ni mu gihe hari hashize iminsi azanywe mu Rwanda, afunzwe na RIB nk’uko byaje gutangazwa n’uwari Minisitiri w’Ububanyi n’Amahanga, Dr Sezibera Richard ndetse bidatinze akerekwa itangazamakuru akaganishwa iy’ubutabera ku byaha 16 ashinjwa.

Rusesabagina akaba asanze Nsabimana Callixte muri gereza n’uwamusimbuye ku buvugizi bwa FLN, Nsengimana Herman werekanywe na RIB muri Mutarama 2020.

Wilson Irategeka yari Umugaba w’Ikirenga wa FLN, magingo aya ntakibarizwa ku Isi y’abazima nyuma yo kwicwa n’Ingabo za RDC [FARDC].

Abasirikare ba FLN babashije guhonoka ikibatsi cya FARDC bagera kuri 57 barimo n’umuhungu wa Wilson Irategeka, baherutse kwerekanwa na RIB nyuma yo gufatirwa muri RDC.

Gen Jean Pierre Gaseni wari umwe mu barwanyi bakomeye ba FLN yarishwe, Brig Gen Shemeki Shaban na Muhawenimana Théogène barishwe Col Sinayobye Barnabé yagizwe Umugaba Mukuru wungirije ushinzwe Ibikorwa yaburiwe irengero n’abandi benshi.

Abasesenguzi bagaragaza ko umugambi wa Rusesabagina na bagenzi be ushobora kuba uri ku iherezo kuko umeze nk’usigaye uhagaze ku kaguru kamwe nako karimo guhirima.

Rusesabagina yeretswe itangazamakuru kuri uyu wa Mbere mu buryo butunguranye kuko ntawakekaga ko yagezwa i Kigali
Nsabimana Callixte 'Sankara' wari amizero ya Rusesabagina na we ari muri gereza

Umuburo ku basangirangendo ba Rusesabagina

Perezida Kagame ubwo yatangizaga Inama y’Igihugu y’Umushyikirano umwaka ushize, yavuze ko nko mu myaka ibiri ishize mu Rwanda hakomeje kugaragara ibikorwa by’abahungabanya umutekano, ariko na byo ngo biri mu marembera.

Yageneye ubutumwa abari mu bikorwa nk’ibyo. Yagize ati “Bafite amatwi ariko barabwirwa ntibumve, bafite amaso ariko ntibabona, twagiye tubabwira ko uko byagenze ari uko bizagenda.”

Mu Ugushyingo 2019 ubwo yakiraga indahiro z’abayobozi bari baherutse gushyirwa mu myanya, Perezida Kagame yongeye kuvuga ko abifuza guhungabanya umutekano w’Abanyarwanda bazabibazwa ku kiguzi cyose, by’umwihariko, ku bantu bihisha inyuma y’ibibazo bya politiki bagashaka guhungabanya umutekano w’Igihugu.

Yagize ati “Abashobora kuba bahari bashobora kwisubiraho hakiri kare, kuko nibatabikora bazabibazwa ku kiguzi icyo ari cyo cyose byasaba. Ikiguzi cyose byasaba ku bifuza guhungabanya umutekano w’u Rwanda twakizamura, haba mu rwego rw’ubushobozi tuzashyiramo ngo twizere ko dufite icyo bisaba cyose ngo tube dufite umutekano w’igihugu cyacu, maze Abanyarwanda bakomeze bagere ku iterambere”.

“Ntuzagambanira u Rwanda ngo ubikire, uwo ari we wese n’ukiriho, bizamugaruka. Kandi imbaraga twahawe n’Imana zo kubirinda zirahari, uwo ari we wese, ni igihe gusa.”

Umuvugizi wa RIB, Dr. Murangira B. Thierry, yavuze ko uru rwego rutanga ubutumwa ku bantu bose bari hanze y’u Rwanda mu bikorwa byo guhungabanya umutekano, ko mu gihe kidatinze nabo bazafatwa.

Ati “Turababwira ko ukuboko k’ubutabera ntaho kutagera. Abo nabo mu minsi mike bazafatwa, ubushobozi burahari, ubushake burahari ndetse n’ubufatanye n’ibindi bihugu kuko ubu nta gihugu na kimwe gishyigikiye ko abantu bapfa mu bindi bihugu, n’abandi nabo bazafatwa kuko nta muntu wakwica Abanyarwanda ngo yidegembye ngo yumve ko atafatwa. Ukuboko k’ubutabera ni kurekure tuzamugeraho nawe.”

Rusesabagina ubwo yerekwaga itangazamakuru yari yabuze ayo acira n'ayo amira
Umuvugizi wa RIB, Dr. Murangira B. Thierry, yavuze ko uru rwego ruburira buri wese ushaka guhungabanya umutekano w'Abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .