Gusubira ku ishuri bambaye impuzankano byatumye abajyaga bashuka abanyeshuri babicikaho

Yanditswe na Thamimu Hakizimana
Kuya 5 Mutarama 2020 saa 08:43
Yasuwe :
0 0

Ababyeyi n’abanyeshuri biga mu mashuri yisumbuye biga mu Ntara zitandukanye cyane cyane biganjemo abakobwa , bemeza ko gusubira cyangwa kuva ku ishuri bambaye imyenda y’ishuri, byatumye abagabo n’abasore babategeraga mu nzira bakabashuka kugira ngo basambanye babicikaho.

Ibi bamwe muri aba banyeshuri n’ababyeyi babo babitangarije IGIHE kuri uyu wa Gatanu tariki ya 3 Mutarama 2020,ubwo bamwe mu banyeshuri bo mu Ntara y’Amajyepfo n’iy’Iburengerazuba basubiraga ku bigo bigamo.

Bahamya ko iyo abana b’abakobwa basubiye ku ishuri bambaye imyambaro y’ishuri bidapfa korohera ababa bifuza kubashukisha ibintu ngo bajye kubasambanya.

Iranzi Jules Junior, wiga muri Pétit Seminaire ku Karubanda, yemeza ko iyo abakobwa basubiye ku ishuri bambaye imyenda y’ishuri bituma buri mugabo ushatse ku bashuka atinya.

Ati “ Gusubira ku ishuri twambaye imyenda y’ushuri byatumye biba byiza kuko abakobwa iyo batambaye imyenda y’ishuri bambara wenda imyenda migufi bigatuma abagabo babifuza bakabashuka kuko hari ababa banabona ko bakuze ariko iyo bayambaye bituma batinya ko ubabona wese aramenya ko bari kumwe n’abana bato."

Uwase Dalila, wiga mu Karere ka Nyamagabe yagize ati " Mbere wasangaga hari abakobwa bajya ku ishuri ntibahite bajyayo ahubwo bakigira mu zindi gahunda nko gusura abasore b’inshuti zabo kandi ababyeyi ntibabe babimenya, ariko kuko ubu baba bambaye imyenda y’ishuri nta bagabo bagipfa kubashuka kubera ko banatinya ko hari uwababona baganira n’utwana twambaye imyenda y’ishuri.”

Umubyeyi witwa Muhimpundu Judith na we yemeza ko kuba abana basigaye basubira ku ishuri bambaye imyambaro y’ishuri byagabanyije umurindi w’abagabo bahoraga bashaka kubashuka.

Ati “ Byarakemutse kuko abana bajyaga ku mpande n’impande batambaye imyenda y’ishuri ariko ubu ntiyakata ngo ajye ahantu kuko aba yambaye umwenda w’ishuri kubera ko abantu bose baba bamureba bamutandukanya n’utayambaye.”

Yongeyeho ko atapfa kwemeza ko iyi ngeso yacitse burundu kuko hari n’abakobwa bashobora kugera mu nzira bagakuramo iyo myenda ariko ashimangira.

Ushinzwe Ibikorwa muri sosiyete itwara abantu ya Horizon Express, Mihigo Olivier, na we yavuze ko kwambara imyenda y’ishuri ku banyeshuri basubiye ku ishuri bibafasha mu buryo butandukanye.

Ati “Iyo yambaye imyenda y’ishuri ni ikirango cyiza cy’uko buri wese umubonye amuha agaciro kandi bikamufasha kurindwa na buri wese yaba umubyeyi we natwe turi mu kazi n’undi wamubona. Kwambara imyenda y’ishuri ni umutekano mwiza ku banyeshuri kuko bituma aho ariho hose bafashwa.”

Yongeyeho ko kwambara imyenda y’ishuri ku banyeshuri bagiye ku ishuri binatuma bahabwa serivise mu buryo bwihuse kuko bibarinda gutonda imirongo kugirango badakererwa.

Mu 2014 nibwo MINEDUC yasabye ko abana bose bajya basubira ku ishuri bambaye umwambaro w’ishuri bigaho, bafite ikarita y’ishuri ibaranga mu kwirinda umuvundo w’abanyeshuri bajya gutega imodoka bikabaviramo kwibwa no kurara mu nzira n’ibindi bibazo byari byaragiye bigaragara.

Umutesi Uwase Emeline yavuze ko gusubira ku ishuri bambaye imyenda y'ishuri hari byinshi byakemuye
Umubyeyi witwa Muhimpundu Judith, wemeza ko kuba abana basigaye basubira ku ishuri bambaye imyambaro y’ishuri byagabanyije umurindi w’abagabo bashaka kubashuka
Ushinzwe ibikorwa muri Horizon, Mihigo Olivier yemeza ko kuba abana basigaye basubira ku ishuri bambaye imyenda yishuri byatumye abagabo bahoraga bifuza gusambanya abakobwa bagabanuka
Iranzi Junior Jules wiga muri Petit Seminaire yo ku Karubanda, na we yemeza ko kwambara imyenda basubiye ku ishuri byatumye nta mugabo ugipfa gushuka umunyeshuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza